རྩ་བའི་བླ་མར་རྒྱང་མཇལ་ཞུས་པ།

རྩོམ་པ་པོ། རོང་ཕྲུག

ཀ་དག་གི་གནས་ལུགས་རྗེན་གཅེར་དུ་མཁྱེན་ནས།།

ཁ་དོག་དང་དྲི་རོར་ཞེན་པ་དེ་ལྡོག་ཅིང་།།

ག་གེ་མོའི་རྒྱུ་རྟོག་ཡེ་གདོད་ནས་སྤངས་ཏེ།།

ང་ཁོ་ཡི་ཉེ་རིང་ཏིལ་འབྲུ་ཙམ་མེད་པ།།

ཅ་ཅོ་ཡི་འདུ་རྫི་སྣ་ཚོགས་ལས་གྲོལད་ཅིང་།།

ཆ་ལུགས་དེ་དམ་ཆོས་འདུལ་བ་དང་མཐུན་པ།།

ཇ་ཆུ་ལས་གཞན་པའི་འཐུང་རྫས་དག་དོར་ནས།།

ཉ་ཆུ་ལ་བསྟེན་བཞིན་འདུལ་ཁྲིམས་དེ་སྲུང་པོ།།

ཏ་ཐཱ་དེ་ག་ཏ་གཉིས་སུ་རང་མེད་པའི།།

ཐ་མལ་གྱི་ཚུལ་དུ་འཇིག་རྟེན་འདིར་བྱོན་ཏེ།།

ད་ལྟ་དང་ཕྱི་མའི་ལམ་སྣ་ཀོ་བསྟན་ནས།།

ན་རག་དང་མཚུངས་པའི་འཁོར་བ་ལས་སྐྱབས་སོ།།

པ་ཏྲ་ལྟར་མཛེས་པའི་ཚུལ་ཁྲིམས་ལ་གནས་ནས།།

ཕ་རོལ་ཏུ་ཕྱིན་པའི་ཡོན་ཏན་རྣམས་རྫོགས་པ།།

བ་གླང་དང་འདྲ་བའི་རྨོངས་པ་དག་འུ་ལ།།

མ་མ་ལས་ལྷག་པའི་ཐུགས་བརྩེ་ཡིས་བསྐྱངས་སོ།།

ཙ་རི་ལ་སྐོར་བའི་དུས་ཡུད་ཙམ་མ་བཏང་།།

ཚ་གྲང་ལ་མ་ལྟོས་ཕ་རོལ་པོའི་དོན་དུ།།

ཛ་དྲག་གི་སྒོ་ནས་གཞན་དོན་ལ་བརྩོན་པ།།

ཝ་མོ་ཡིས་སྟག་ལྤགས་གྱོན་པ་དང་མི་མཚུངས།།

ཞ་ཆག་གི་སེམས་ཅན་ཐར་ལམ་དུ་འགོད་པོ།།

ཟ་ཧོར་གྱི་མཁན་པོ་དེ་ཉིད་ཀྱི་ཐུགས་སྲས།།

འ་ཅག་གི་ལས་དང་སྨོན་ལམ་གྱི་མཐུ་ཡིས།།

ཡ་མཚན་གྱི་བླ་མ་ཁྱེད་ཉིད་ནི་མཇལ་སོང་།།

ར་རི་དང་བྲལ་བའི་ཡོན་ཏན་ཉིད་མངའ་བ།།

ལ་མཐོ་ཡི་རྩེ་བཞིན་དབུ་འཕང་ཡང་མཐོ་འོ།།

ཤ་ཚ་བའི་སེམས་ཅན་སྡུག་བསྔལ་ལས་འགྲོལ་པོ།།

ས་ཐོབ་པའི་འཕགས་པ་པདྨ་ཡི་ནོར་བུ།།

ཧ་ལས་པའི་བླ་མ་མཚན་ཉིད་དང་ལྡན་པ།།

ཨ་དབྱིངས་སུ་ཡལ་ནས་ཡང་སྤྲུལ་དེ་ཕེབས་པ།།

དུས་ནམ་ཞིག་ཁྱེད་མཇལ་ཁྱེད་གསུང་དེ་ཐོས་པའི།།

སྙིང་རུས་པའི་གཏིང་ནས་སྨོན་ལམ་ཞིག་བཏབ་ཡོད།།

སྤྱ་ལོ་ ༢༠༢༠ ཟླ་བ་ ༩ པའི་ཚེས་ ༣ གྱི་དགོང་མོར་བལ་ཡུལ་ཀབ་རེ་ནས་ཤར་མར་བྲིས།

 

ཡོང་ཁུངས། ངེད་དྲྭ་བ།