ལྷོ་གོ་ཆའམ་ཀུན་བཟང་ཉི་མའི་ཆེད་འགོད་སྙན་ངག་གསུམ།

ལོ་ནག་དང་ཁ་གཡང་།

ནད་ཡམས་ཀྱིས་བཙིར་བའི་ཉིས་སྟོང་ཉི་ཤུ་ལགས།

ད་ནས་ཁྱོད་ལ་བདེ་མོ་འཇོག

མི་ཡུལ་ལ་ཁྱོད་ཀྱིས་བཞག་པའི་རྨ་ཤུལ་དག

གཤག་བཅོས་ཐེངས་གཅིག་གི་སྐྱ་ཐིག་ཡིན་སྲིད་མོད།

 

ང་ལ་མཚོན་ན་མུན་པ་ལས་འོད་ཟེར་འགྱེད་པའི་སྣང་བ་ལ།

ཐོབ་དཀའ་བའི་རྩ་འཇུག་བཞི་གསུམ་གྱི་གྱ་ནོམ་འདི།

རིན་བྲལ་གྱི་ཚེ་ནོམ་དུ་སེམས་ཡོད།

 

ལོ་ཟླ་འདི་དག་ལ་རྔུལ་ཆུས་བཙོས་པའི་རིན་དོད་མེད་ནའང་།

གོམ་གང་མདུན་སྤོས་ཀྱིས་རྐང་ལག་བསྲིངས་སྟབས།

འགྱོད་གདུང་དང་ཆོ་ངེ་གང་ཡང་མེད།

འདོད་ཧམ་དང་སྒེར་སེམས་གུ་དོག

མདོར་ན་འདི་དག་དང་རིང་དུ་གྱེས་པ་ནི།

ཉེར་གཅིག་ལོའི་ཁ་གཡང་ཡིན།

ཁ་ལོ་མ་བཏུལ་བའི་རྟ་ཁྱུ།

ཁ་ལོ་མ་བཏུལ་བའི་རྟ་ཁྱུ་ཞིག

འཕག་འཚག་རྒྱག་གིན།

རྨིག་པ་རྡེག་བཞིན།

ཞོགས་འོང་།

གནའ་བོའི་དུད་ཚང་ལ་ལ་དམོད།

ཨ་མའི་ལག་འཁོར་ལ་ཀེར།

ཨ་ཕའི་སྲུང་འཁོར་ལ་གཤེ།

གློ་རྡེག་ཏུ་ང་རྒྱལ་ཞིག་གིས་བརྒྱལ་ནས།

ཁྲེལ་མེད་པར་སྒྲེན་པོར།

ཞོགས་སོང་།

རང་ཉིད་བྲིས་པ།

སྒེར་སེམས་འདོད་རྔམ་རྟ་རྒོད་བཞིན་དུ་རྒྱུག །

ཆགས་སྡང་ལེ་ལོ་ཆར་པ་བཞིན་དུ་འབབ། །

མི་དགེ་ཡོད་རྒུ་ཡར་ངོ་ལྟར་དུ་འཕེལ། །

རང་ཉིད་ཤར་བའི་མེ་ལོང་འདི་ལྟར་རེད། །

བརྩོན་པའི་རྟ་ཕོའི་བང་ཁ་སྒྲོག་གིས་བཅིངས། །

སྤོབས་པའི་གདེང་གི་འདབ་མ་སད་ཀྱིས་བཅོམ། །

རང་ཚུགས་བག་ཕེབ་དབྱིངས་ཀྱི་འཇའ་ལྟར་ཡལ། །

རང་ཉིད་ཤར་བའི་གཟུགས་བརྙན་འདི་ལྟར་རེད། །

ཚེ་འདིར་ཕན་པའི་རྩིས་ཀྱི་གྲངས་ཤིག་མེད། །

རབ་བྱུང་གྲྭ་པ་མིང་གི་ལྷག་མ་ཙམ། །

འདི་ཕྱི་གཉིས་ཀྱི་གཤོག་པ་རླུང་གིས་ཁུར། །

རང་ཉིད་བྲིས་པའི་རི་མོ་འདི་ལྟར་རེད། །

ཡོང་ཁུངས། རྩོམ་པ་པོའི་ངོ་དེབ་དྲྭ་བ་ལས་དྲངས།