«དོལ་པོ་གསེར་གྱི་ཕོར་པའི་»རོལ་རྩེད་ཐེངས་གཉིས་པ་དབུ་འཛུགས་འཆར།

བལ་ཡུལ་ཀཱཋ་མཱཎ་ཌུ།: «དོལ་པོ་རྩེད་འགྲན་ཚོགས་པས»གཉེར་བའི་«དོལ་པོ་གསེར་གྱི་ཕོར་པའི་»རྐང་རྩེད་པོ་ལོའི་རོལ་རྩེད་ཐེངས་གཉིས་པ་དེ། ས་གནས་བཽདྡྷ་མཆོད་རྟེན་ཉེ་འགྲམ་གྱི་«ལེ་ཧི་མཱ་ལ་ཡ་ཧྥུཊ་སལ་»དུ། ཡོང་ལ་ཉེ་བའི་བལ་ཟླ་ ༡༡ པའི་ཚེས་ ༢༢ སྤྱི་ཟླ་ ༣ པའི་ཚེས་ ༦ ཉིན་དབུ་འཛུགས་འཆར་རེད་འདུག

   སྔར་སྲོལ་ལྟར་དོལ་པོ་སྟོད་ཕྱོགས་ཀྱི་སྤྱི་ཁྱབ་གྲོང་སྡེ་ལྷན་ཁང་གསུམ་ཀ་ནས་ཕན་ཚུན་འགྲན་སྡུར་བྱེད་རྒྱུ་དང་། དེ་ལ་ནང་གསེས་སྡེ་ཚན་ ༡༧ ཐམ་པ་བགོ་རྒྱུ་ཡིན་འདུག་ལ། འགྲན་ཞུགས་པ་ཐམས་ཅད་སོ་སོའི་གྲོང་སྡེ་ལྷན་ཁང་ནས་ཡིན་དགོས་པ་མ་ཟད། འགྲན་ཞུགས་པ་ཕོ་གཞོན་དང་མོ་གཞོན་གཉིས་ཀ་འཛུལ་ཞུགས་བྱེད་ཆོག་པ་རེད་འདུག  འགྲན་ཞུགས་པའི་ནང་ནས་སུས་རྒྱལ་ཁ་ཐོབ་པ་དེར་དོལ་པོའི་ཐུན་མིན་རིག་གཞུང་གི་གསེར་གྱི་ཕོར་རུས་གཙོས་པའི་དངུལ་དམར་གྱི་གཟེངས་རྟགས་སོགས་འཐོབ་རྒྱུ་ཡིན་པ་དང་། དངུལ་དམར་གཟེངས་རྟགས་ཐད་རྗེས་སུ་གསལ་བཤད་ཞུ་ཆོག་པའི་སྐུལ་བརྡ་གནང་འདུག

   ད་ལན་གྱི་རྩེད་འགྲན་སྐབས་འདིའི་འགྲོ་གྲོན་ཐད་ལ་བསམ་ན། འགྲན་ཞུགས་པ་གཞོན་སྐྱེས་ནང་ཁུལ་ལ་འགོ་གྲོན་བསྡུ་དགོས་བྱུང་ཡོད། དེ་མིན་ཟུར་ནས་ཞལ་འདེབས་ཕྲན་བུ་འདྲ་འབྱོར་ཡོད་པ་ལས། དམིགས་བསལ་སྦྱིན་བདག་གནང་མཁན་མ་བྱུང་། ད་བར་དོལ་པོའི་ས་གནས་གསུམ་ཀའི་གཞུང་ཚོགས་རྣམས་ནས་རྩེད་འགྲན་ཚོགས་པ་འདིར་འགྲོ་གྲོན་ཐད་རོགས་སྐྱོར་གནང་སོན་མ་བྱུང་ཡང་། བཀུར་འོས་ས་གནས་ལས་གཞུང་རྣམ་པས་ཐུགས་བརྩེ་ཆེན་པོའི་སྒོ་ནས་རོགས་སྐྱོར་གནང་རྒྱུའི་ཞལ་བཞེས་ཟབ་མོ་ཐོབ་ཡོད་ལ། རྩེད་འགྲན་ཚོགས་པའི་ངོས་ནས་ཀྱང་མ་འོངས་པའི་ཆར་རོགས་སྐྱོར་གནང་སྐྱོང་ཡོང་བའི་ཡིད་ཆེས་གཏིང་ཟབ་ཡོད་ཅེས་ཞུ་གི་འདུག 

གསར་འགྱུར་མཁོ་སྤྲོད་པ།: 

རྩེད་འགྲན་ཚོགས་པའི་ཚོགས་གཙོ་བུ་ཆུང་འགྱུར་རིག་ལགས།

_______________

ཡོང་ཁུངས།: མཚོ་བྱུང་ཨུཏྤལ་ནེའུ་གསིང་།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང་།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-དོལ་པོ་གསེར་གྱི་ཕོར་པའི་རོལ་རྩེད་ཐེངས་གཉིས་པ་དབུ་འཛུགས་འཆར།