མི་ཕམ་རྣམ་རྒྱལ། སྔ་འགྱུར་མཐོ་སློབ་ཆེན་མོ།
སྒོ་འཕར་རབ་ཏུ་ཡངས་པའི་གཞིས་བྱེས་ཀྱི་དབུས་ན།།
རྒན་གཞོན་བར་མ་ཀུན་ལ་ཤེས་རབ་ཀྱི་སྒོ་འབྱེད།།
བསླབ་གསུམ་སྡེ་སྣོད་ཕྱུག་པས་ཁྱུ་མཆོག་གི་ཚོགས་ན།།
ཐོག་མར་གཞུང་ལུགས་བརྩོན་པའི་རྣམ་ཐར་རེ་མཇལ་དུས།།
ལེ་ལོ་བུ་ཆུང་ང་འདྲ་སེམས་བསྐུལ་རེ་འཐེབས་འགྲོ།།
བཙན་དབང་རང་དགོན་བྲལ་བའི་ལོ་རྒྱུས་རེ་ཐོས་དུས།།
དགོན་གཞུང་ཀླད་རྙིང་རྣམས་ལ་སེམས་ཁོང་ནས་ཁྲོས་འགྲོ།།
དབུ་འཇུག་ཟླ་གྲགས་གསུང་གི་ཟབ་གནད་དེ་དཀའ་ཞིང་།།
འཛིན་རིམ་གསུམ་པའི་སློབ་ཚན་མགོ་བོ་རེ་འཁོར་དུས།།
བསྐྱར་དུ་བཀླག་པའི་ཁོང་གི་དབུ་འཇུག་གི་གསུང་དེས།།
སྒོ་ཆེན་ཤེས་རབ་སྩོལ་མཁན་སྒོ་ཤེར་དེ་ཅི་མིན།།
གཏན་དུ་ཡིད་དབང་འཕྲོག་པའི་དགེ་ཆོས་ཀྱི་གསུང་ཟབ།།
གཏམ་ཡིག་གསེར་ཐང་ཚིག་དོན་རྟོགས་དཀའ་རེ་བྱུང་དུས།།
སྒོ་ཤེར་གསུང་ཁྲིད་གསེར་ཐང་འགྲེལ་བ་དེ་མཇལ་དུས།།
དགེ་ཆོས་མདུན་དུ་བགྲོ་གླེང་ཚོགས་པ་རང་འདྲ་བྱུང་།།
དངོས་སུ་མཇལ་བའི་སྐལ་བཟང་དུས་སྐབས་རེ་མ་བྱུང་།།
འོན་ཀྱང་ཁྱེད་གསུང་ཡིག་འབྲུ་རེ་རེ་དེ་བཀླག་དུས།།
ཡིད་ལ་དགའ་སྐྱོའི་ཚོར་བ་བདུད་རྩི་རུ་འབྱིན་མཁན།།
གཞིས་བྱེས་མཁས་པ་དབུས་ན་སྒོ་ཤེར་རང་ཅི་མིན།།
ཞྭ་སེར་བསྟན་པའི་དགུང་ན་མཁས་ཚོགས་རང་བཀྲ་ཡང་།།
རྒྱལ་བསྟན་རིས་མེད་མནའ་དེང་ཟུང་འབྲེལ་གྱི་ལམ་སྲོལ།།
རྨོངས་ཀུན་གདུང་བ་སེལ་བའི་ཉིན་གཞོན་གྱི་དབང་པོ།།
སྒོ་ཤེར་བཤེས་གཉེན་ཁྱེད་ལས་དོ་ཟླ་རང་ཅི་ཡོད།།
དུས་ངན་སྙིགས་མའི་སྐྱེ་འགྲོ་བསོད་ནམས་རེ་དམན་ཕྱིར།།
གྲོང་གི་དཔོན་པོ་མི་ངན་དབུ་འཁྲིད་དུ་ཤར་སོང་།།
སྤྱི་ཕན་བཤེས་གཉེན་བཟང་པོ་བཙོན་འོག་ཏུ་ཤོར་སོང་།།
རྣ་བར་ལྷུང་བའི་གཏམ་ངན་བཟོད་བླགས་རང་མིན་འདུག།
འོན་ཀྱང་རྒྱང་རིང་ཕོ་རྒོད་རྒྱང་རིང་གི་མཐའ་ནས།།
ཁྱེད་ཉིད་བཙན་འོག་ནང་ནས་རིང་མིན་དུ་གྲོལ་ཞིང་།།
དངོས་མཇལ་གསུང་གི་དགའ་སྟོན་བཞིན་རས་ཀྱི་པདྨོ།།
མཆོག་གསུམ་གསོལ་འདེབས་དད་པའི་རེ་སྨོན་རེ་བཅོལ་ལོ།།
ང་དང་སྒོ་ཤེར་གཉིས་དངོས་སུ་མཇལ་བའི་སྐལ་བ་མ་བྱུང་ཡང་། དེ་རིང་ནས་ལོ་མང་སྔོན་དུ་བསྐྱར་དུ་བཀླགས་པའི་དབུ་འཇུག་དང་གཏམ་ཡིག་གསེར་ཐང་མཇལ་ནས་བཟུང་། ཁོང་ཉིད་ཀྱི་གསུང་ཚིག་འབྲུ་རེ་འཇིག་རྟེན་འདིར་བྱུང་དུས་སུ་མཇལ་འདོད་ཀྱི་སྤྲོ་སྣང་འཕེལ་བ་དང་། མི་ཚེ་འདིའི་ནང་བོད་དུ་འགྲོ་ནས་ཁྱེད་ཀྱི་བཞིན་རས་དང་གསུང་གི་བདུད་རྩི་གཅིག་མ་མྱོང་ན་ང་ཕོ་རྒོད་མིན་ཞེས། ངོས་ནས་ཧམ་བཤད་ཀྱང་བྱས་མྱོང་མོད། ད་ཆ་ཧོབ་སྟེ་གང་ལ་དམ་པ་ཁོང་བཙན་ཟུང་བྱས་པའི་གཏམ་ངན་རེ་ཐོས་དུས། སེམས་ནས་མི་བཟོད་པའི་སྐྱོ་སེམས་དང་བཙན་འོག་ནས་མྱུར་དུ་གྲོལ་བའི་སྨོན་ཚིག་ཅིག་རྩེ་སྨྱུག་དལ་གྱིས་ཤོར། ༢༠༢༡/༠༤/༡༥
_______________
རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་ཟིན་བྲིས་དྲྭ་བ།
ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།
རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-«སྒོ་ཤེར་དང་ང་ཉིད་འབྲེལ་བའི་དྲན་གདུང་།»
࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།