སྤྲུལ་སྐུ་བསྟན་པ་རྒྱལ་མཚན། སྔ་འགྱུར་མཐོ་སློབ་ཆེན་མོ།
མདོ་ཁམས་ས་ཡི་ཐིག་ལེ་ཨ་ཛི་རོང་།།
པདྨ་བདུད་འདུལ་ལ་སོགས་གྲུབ་བརྒྱ་ཡི།།
ཚང་ཚང་རབ་རྡོལ་དགེ་ལེགས་སྤུང་པའི་སར།།
ཀློང་གསལ་དངོས་བྱོན་གྲུབ་རིག་རྣལ་འབྱོར་དེས།།
བསམ་གླིང་ཆོས་བདག་མཐུ་སྟོབས་གླིང་པ་ཡི།།
སྤྲུལ་པ་ལྔ་པར་བཀའ་རྟགས་དྲིལ་བསྒྲགས་ཀྱིས།།
མངའ་གསོལ་མཛད་པ་འཁྲུལ་མེད་ཁྱེད་ལ་བསྟོད།།
དགོངས་འདུས་གཉིས་པའི་ཟབ་གཏེར་རྒྱ་མཚོ་ཡི།།
སྨིན་གྲོལ་དབང་ལུང་ཡལ་བར་འཕངས་པ་ལས།།
སྤྲུལ་པའི་སྐུ་མཆོག་པདྨ་རྣམ་རྒྱལ་ལས།།
གདམས་པའི་འོ་ཞོ་ཚུལ་བཞིན་བཞེས་ལ་བསྟོད།།
ཁྱད་པར་གྲུབ་དབང་ལུང་རྟོགས་རྒྱ་མཚོ་ཡིས།།
སྤྲུལ་པའི་སྐུ་མཆོག་འཁྲུལ་མེད་འདིའོ་ཞེས།།
མང་པོའི་དབུས་ན་འཇིགས་མེད་བཀའ་ཡིས་བསྔགས།།
མཐུ་སྟོབས་གླིང་པ་དངོས་བྱོན་ཁྱེད་ལ་བསྟོད།།
སངས་རྒྱས་མི་ཡི་རྫུར་བཞུགས་ཨ་རིག་རྗེར།།
བསམ་གཏན་གླིང་པའི་ཟབ་གཏེར་སྙིང་པོའི་བཅུད།།
དགོངས་བཞེད་ཇི་བཞིན་ལེགས་པར་ཕུལ་བ་སོགས།།
དམ་པ་མང་པོས་ཁྱེད་ཞབས་བཏུད་ལ་བསྟོད།།
བལ་ཡུལ་གསང་བ་ཡང་ལེ་ཤོད་ཀྱི་ཆར།།
ཁྲོ་རྒྱལ་སངས་རྒྱས་རྡོ་རྗེས་གསོལ་བཏབ་བཞིན།།
བདུད་འཇོམས་སྤྲུལ་སྐུ་ལ་སོགས་འདུས་པའི་སྡེར།།
དགོངས་འདུས་གཉིས་པའི་སྨིན་དབང་བསྐུར་ལ་བསྟོད།།
འཕགས་ཡུལ་བྱང་ཕྱོགས་ཛ་ལན་དཱ་རའི་འགྲམ།།
ཕྱག་ན་པདྨོ་བསྟན་འཛིན་རྒྱ་མཚོའི་སྡེས།།
ཉིད་སྐུའི་སྣམ་སྦྱར་རྒྱལ་མཚན་ཁྱེད་ལ་གསོལ།།
དགེ་སློང་རྡོ་རྗེ་འཛིན་རྒྱལ་ཁྱེད་ལ་བསྟོད།།
ཉག་རོང་ལྕགས་མདུད་ས་ཡི་མདུད་པ་དེར།།
བསྟན་པའི་བསྟི་གནས་འོད་ཕུང་དགོན་པ་བཏབ།།
བསམ་གཏན་གླིང་པའི་ཟབ་གཏེར་བསྟན་པ་བསྐྱངས།།
རྒྱལ་བ་བྱང་ཆུབ་སྒྱུ་གར་ཁྱེད་ལ་བསྟོད།།
གདུལ་བྱའི་ཞིང་ཁམས་མདོ་ཁམས་རི་ཆེན་དང་།།
སྤོ་བོ་པད་བཀོད་རྣམས་སུ་ཞལ་ཕྱོགས་ཏེ།།
ལོང་བ་ཤེས་མེད་འགྲོ་ལ་ཐར་ལམ་གྱི།།
ཚེ་འབར་སྒྲོན་མཛད་སྐྱེས་ཆེན་ཁྱེད་ལ་བསྟོད།།
རིག་འཛིན་སྟག་ཤམ་རྡོ་རྗེའི་ཆོས་ཀྱི་བདག།
རྒྱ་མཚོ་ལྟ་བུའི་སྒྲུན་མེད་ཐུགས་བསྐྱེད་ཅན།།
བསྟན་ཞབས་གཏེར་གྱིས་སྐྱོང་བའི་དྲིན་པོ་ཆེ།།
འཁོར་ལོའི་དབང་ཕྱུག་ཁྱེད་ནི་བསྟོད་པའི་ཡུལ།།
ཞེས་བསམ་གླིང་ཆོས་བདག་གཏེར་ཆེན་མཐུ་སྟོབ་གླིང་པའི་སྤྲུལ་རབས་ལྔ་པ་སྤྲུལ་སྐུ་རིག་འཛིན་རྒྱ་ཚོར་དགའ་དད་སྤྲོ་བའི་ངང་། ཧ་ཅང་སྡེབ་ལེགས་དང་སྙན་ཚིག་སོགས་ཀྱིས་མ་བཅིངས་པར། མཛད་པ་དང་སྦྲེལ་ཏེ་བསྟོད་ཚིག་ཁ་ཐུག་སྤེལ་བ་འདི་ཡང་། བསམ་གཏན་གླིང་པའི་གསུང་སྤྲུལ་རི་སྤྲུལ་མིང་པས་ཕུལ།
_______________
རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།
ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།
རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-ཆོས་བདག་སྤྲུལ་པའི་སྐུ་ལ་བསྟོད་པ།
࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།