སྨན་ཞབས་བུ་མོ་རྣམས་ལ་བདེ་བར་སྨོན་པ་དྲང་སྲོང་རྒན་པོའི་ཐ་ཚིག

ཀརྨ་དབང་རྒྱལ། ཧྥ་རན་སི།

བཟང་ངན་སྣ་ཚོགས་སྣང་བའི་འཇིག་རྟེན་འདིར།།

བསླུ་བ་མེད་པའི་རྟེན་འབྲེལ་རྨད་དུ་བྱུང་།།

བདག་ལ་བཟང་ངན་ལས་ཀྱིས་འབྲེལ་ཐོགས་ཀུན།།

རྟག་ཏུ་ནད་མེད་གནོད་འཚེ་སྤོང་བར་ཤོག།

རེ་དོགས་འཛིན་པས་འཆར་འགོད་ཅི་བྱས་རུང་།།

རྒྱུ་རྐྱེན་རྟེན་འབྲེལ་དབང་བཙན་གང་འདོད་མེད།།

སྔར་མ་མཐོང་བའི་སྨན་ཞབས་བུ་མོ་ཚོས།།

བྱམས་བརྩེས་ནད་གཡོག་གནང་བར་བཀའ་དྲིན།།

ཚ་བོ་ཚ་མོ་གྲོགས་པོ་གྲོགས་མོ་རྣམས།།

རྟག་ཏུ་ངོ་དགའ་ཡག་ཡག་ཡིན་མོད་ཀྱང་།།

ན་དུས་སྔར་མ་མཐོང་ཡང་སྨན་ཞབས་མས།།

བྱམས་པས་བསྐྱངས་ཕྱིར་ཉེ་རིང་འདུ་ཤེས་བྲལ།།

འཇིག་རྟེན་ཁམས་ཀྱི་སྨན་ཞབས་བུ་མོ་རྣམས།།

རྟག་ཏུ་བདེན་པ་དམ་པས་སྐྱོབ་པར་ཤོག།

རེ་མེད་བྱམས་ལྡན་སྨན་ཞབས་བུ་མོ་རྣམས།།

ཆོས་ཉིད་བསླུ་བ་མེད་པས་སྲུང་བར་ཤོག།

ངས་ནི་དེ་སྔོན་སྨན་ཞབས་བུ་མོ་ཚོ།།

མཐོང་ཐོས་ཕར་ཞོག་ཡོད་སྣང་ཤར་མ་མྱོང་།།

ཆབ་གསང་དོར་སོགས་ཇི་ཙམ་དཀའ་ན་ཡང་།།

འཛུམ་བཅས་སྐྱོང་བའི་སྨན་ཞབས་བུ་མོ་བཟང་།།

ཉིན་ལྟར་ཁམས་འདྲི་འཛུམ་པའི་ཞལ་བཟང་ངོམ།།

བྱམས་པའི་ཕྱག་གིས་གཙང་ཙོག་ཡོད་ཚད་ཕྱིས།།

སྙན་པའི་ངག་གི་སེམས་གསོ་ཡང་ཡང་བྱེད།།

སྨན་ཞབས་བུ་མོའི་ཚེ་རབས་བདེ་བར་ཤོག།

ཆེ་འདོད་མེད་པར་རྒན་གཞོན་མ་ལུས་སྐྱོང་།།

ང་རྒྱལ་མེད་པར་སྤྲང་ཕྱུག་མཉམ་པར་སྐྱོང་།།

གང་ལའང་ཐུག་རུང་འཛུམ་མདངས་དམ་བཅའ་བརྟན།།

སྨན་ཞབས་བུ་མོའི་ཁྱད་ཆོས་འདི་ལ་འཚེངས།།

ཁ་ལུད་སྣ་ལུད་ཡོངས་རྫོགས་བརྩེ་བས་ཕྱིས།།

གསང་སྤྱོད་རྒྱས་བསྡུས་མ་ལུས་གཙང་བར་བྱེད།།

སྣག་ཁྲག་ལ་སོགས་འཛུམ་གྱིས་ཕྱིས་བྱས་ཤིང་།།

སྨན་ཞབས་བུ་མོས་ནད་པ་རབ་ཏུ་བསྐྱངས།།

དཀོན་མཆོག་ཞེས་པའི་ལྷ་ཞིག་ཡོད་སྲིད་ན།།

སྨན་ཞབས་བུ་མོ་རྣམས་ལ་བྱིན་གྱིས་རློབས།།

དམ་ཆོས་ཞེས་པ་བསླུ་བ་མེད་སྲིད་ན།།

སྨན་ཞབས་བུ་མོ་རྣམས་ལ་འབྲས་བཟང་སྩོལ།།

ཉིན་མཚན་བཅུ་ཙམ་སྨན་ཁང་གྲུ་བཞི་ནང་།།

ན་རུང་ཚ་རུང་སྨན་ཞབས་བུ་མོ་ཚོས།།

སྐྱིད་སྡུག་སྣང་བ་ཡལ་བའི་ངང་ཞིག་ལ།།

རབ་ཏུ་བསྐྱལ་བས་ཁྱེད་རྣམས་ངོ་མཚར་ཆེ།།

ཐོབ་དང་གོ་ས་གླ་ཕོགས་ཆུང་ན་ཡང་།།

སྨན་ཞབས་བུ་མོ་སྨན་པ་བརྒྱ་ལས་ལྷག།།

མིང་དང་གྲགས་པ་ལ་སོགས་མེད་ན་ཡང་།།

སྨན་ཞབས་བུ་མོ་བླ་དཔོན་སྟོང་ལས་ལྷག།།

གཙང་ཙོག་མེད་པར་བྱམས་བརྩེས་སྐྱོང་ལུགས་འདིས།།

སྨན་ཞབས་བུ་མོ་དྲིན་ཆེན་མ་དང་འདྲ།།

ཉིན་ལྟར་འཛུམ་པའི་ཞལ་བཟང་ངོམ་པ་འདིས།།

སྨན་ཞབས་བུ་མོ་དྲིན་ཆེན་ཕ་དང་འདྲ།།

སྨན་སྦྱོར་བྱེད་དང་ཁ་ཟས་བསྟེར་བ་དང་།།

གསང་ཆབ་དོར་རོགས་གཟུགས་པོ་འཁྲུད་རོགས་དང་།།

མལ་གདན་གཙང་སོགས་ཉིན་མཚན་དུས་དྲུག་ཏུ།།

སྐྱོང་མཁན་སྨན་ཞབས་བུ་མོ་བཅུ་ཕྲག་ལྷག།

བདག་ལ་བཀའ་དྲིན་ཅན་རྣམས་སྐྱིད་པར་ཤོག།

སྨན་ཞབས་བུ་མོ་ཁྱེད་རྣམས་བདེ་བར་ཤོག།

ཚེ་རབས་ཀུན་ཏུ་སེམས་མ་ཆེན་མོ་ཡི།།

ངོ་མཚར་ནམ་མཁའི་མཐའ་དང་མཉམ་པར་ཤོག། 

     ཞེས་ ༢༠༢༡/༠༦/༡༠ ཉིན་ལྷོ་རི་བ་ཀརྨ་དབང་རྒྱལ་སྒྱུ་ལུས་འབྱུང་འཁྲུགས་དུས་སུ། སྨན་ཞབས་བུ་མོ་རྣམས་ཀྱིས་བྱམས་བརྩེས་བསྐྱངས་པ་ལྷང་ལྷང་དྲན་པའི་མོད། ནུབ་ཧྥ་རན་སིའི་རྒྱལ་ས་ཕེ་རེ་སིའི་སྨན་ཁང་དུ་བྲིས་པའོ།།

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-སྨན་ཞབས་བུ་མོ་རྣམས་ལ་བདེ་བར་སྨོན་པ་དྲང་སྲོང་རྒན་པོའི་ཐ་ཚིག

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།