མཁན་པོ་དམ་ཆོས་རྒྱ་མཚོ།
ཨོཾ་སྭ་སྟི།
རབ་མཛེས་དཀར་ལ་དམར་བའི་འཇོ་སྒེག་ཅན།།
འཇམ་གཉེན་སོར་རྩེའི་རྒྱུད་མང་རབ་བཀྲོལ་ཏེ།།
སྙན་འཇེབས་རྣ་བའི་བུ་གར་སྟེར་བའི་དཔལ།།
དུས་མཐའི་རྒྱལ་བསྟན་གསལ་བའི་ཉི་གཞོན་ཟུང་།།
གྲུབ་དབང་མགོན་དང་ཆོས་རྗེ་ཡིད་བཞིན་ནོར།།
བསྟན་པའི་ཁུར་ཆེན་འདེགས་ལ་རྣམ་གྲོལ་མཚན།།
བསམ་བཞིན་སྲིད་པ་གཟུང་ལ་གུས་ཕྱག་འཚལ།།
མཁས་པའི་ཚད་ལ་མདོ་རྒྱུད་གཏིང་མཐའ་ལོན།།
བཙུན་པའི་ཚད་ལ་ཚུལ་ཁྲིམས་མིག་ལྟོས་གྱུར།།
བཟང་བའི་ཚད་ལ་ཆེ་རྒུའི་གཙུག་ཏུ་བཀུར།།
ཡོན་ཏན་གཏེར་མཛོད་མཆོག་ལ་གུས་ཕྱག་འཚལ།།
གང་གིས་ཟབ་ཆོས་བདུད་རྩི་སྩོལ་བའི་སྐབས།།
འཆད་རྩལ་སྡེབ་སྦྱོར་ཚིག་གི་སྤུ་རིས་ཀྱིས།།
བྱིང་རྨུགས་སྣང་བའི་མུན་པ་གཏན་བཅོམ་ཏེ།།
དད་སྤྲོ་སྣང་བའི་ཡིད་ཀུན་འོད་ཀྱིས་ཁྱབ།།
གྲུབ་མཐའི་ལྟ་གྲུབ་གཏན་ལ་འབེབས་པའི་སྐབས།།
གོང་འོག་ཐེག་པའི་ཐེམ་སྐས་མ་འཁྲུག་ཅིང་།།
མཐའ་བྲལ་སྟོང་ཉིད་གཏན་ལ་འབེབས་པའི་ཚེ།།
མཁན་ཆེན་ཁྱེད་ནི་དཔལ་མགོན་ཀླུ་སྒྲུབ་དངོས།།
མདོ་སྔགས་ཐེག་པའི་ཁྱད་ཆོས་འབྱེད་པའི་སྐབས།།
བསྐྱེད་རྫོགས་ཟུང་དང་ཕྱག་ཆེན་རྫོགས་ཆེན་སོགས།
ཐུན་མོང་ཐུན་མིན་དཀའ་གནད་དབྱེ་བའི་ཚེ།།
མཁན་ཆེན་ཁྱེད་ནི་ཟུར་ཕུད་ལྔ་པ་དངོས།།
རྫོགས་ཆེན་ནང་བརྒྱུད་སྡེ་གསུམ་འཆད་པའི་སྐབས།།
སེམས་རིག་ཕྲ་བའི་རིག་པ་ཤན་འབྱེད་ཀྱིས།།
མན་ངག་གྲོལ་ལམ་ཁྱད་འཕགས་འབྱེད་པའི་ཚེ།།
མཁན་ཆེན་ཁྱེད་ནི་ཨོ་རྒྱན་ཆེན་པོ་དངོས།།
ཁྱད་པར་ཡང་གསང་མཐར་ཐུག་འཆད་པའི་དུས།།
རིག་པ་ནང་གསལ་རོལ་པ་ཕྱིར་ཤར་ཚུལ།།
རྒྱུད་ཚིག་མན་ངག་སྦྱར་ནས་བཀྲལ་བའི་དུས།།
མགོན་པོ་ཁྱེད་ནི་ཀློང་ཆེན་རབ་འབྱམས་དངོས།།
རྒྱས་སྤྲོས་གཟིམས་ཁང་མིང་གྲགས་རླངས་འཁོར་སོགས།།
རྒྱུ་ཆེན་འབུལ་བ་སྤྱན་ལ་མི་འབབ་ཅིང་།།
གབ་པའི་མན་ངག་ཟུར་ཙམ་མི་སྟོན་པ།།
མཁན་ཆེན་ཁྱེད་ནི་ཤྲཱི་སིངྷ་དངོས།།
མདོར་ན་ཁྱེད་ནི་ཚུལ་འཆོས་རིང་དོར་ཏེ།།
ཉམ་ཆུང་ཆོས་པའི་བརྟུལ་ཞུགས་བསྐྱངས་ན་ཡང་།།
གཙུག་ཏུ་བཀུར་མཁན་མཁས་གྲུབ་ཁྱུ་ཚོགས་དག།།
དྲི་ལྡན་བུང་བར་འཁོར་བཞིན་ཇེ་མང་རེད།།
ཐོས་བསམ་མཐའ་རྒྱ་ཆོད་པའི་ཤེས་རབ་ཆེ།།
དགོངས་བརྒྱུད་རྟོགས་པ་འཕོས་པས་བྱིན་རླབས་འབར།།
ཉམས་རྟོགས་རྩལ་ཁ་རྒྱས་པའི་རྟོགས་པ་ལྡན།།
ས་སྟེང་འདི་ན་ཁྱེད་ལས་ལྷག་ཞིག་སུ།།
བདག་ཀྱང་ཁྱེད་དང་མཇལ་ནས་ལོ་ཤས་རིང་།།
གང་གི་ཐུགས་རྗེས་བསྐྱངས་པའི་བསིལ་གྲིབ་འོག།།
ཐེ་ཚོམ་དྲྭ་བའི་འདུད་པ་ཡོངས་བརྟོལ་ཏེ།།
སྒོ་གསུམ་ཁྱེད་ལ་གཏོད་རྒྱུའི་དམ་བཅའ་བཞག།།
དེང་འདིར་རང་བཞིན་བརྗོད་པ་བསྟོད་པའི་ཚིག།།
སྙན་པའི་གླུ་རུ་བླངས་ཏེ་ཕུལ་བ་འདི།།
གཅམ་བུའི་ཚིག་གི་དྲི་མས་མ་སྦགས་ཤིང་།།
དད་མདུན་སྙིང་ལས་འཕྱུར་བའི་རང་སྒྲ་ལགས།།
འདི་ལས་བྱུང་བའི་དགེ་བའི་ཆ་མཆིས་ན།།
འཁྲུལ་འཛིན་རྟོག་ཚོགས་དབྱིངས་རིག་ཀློང་དུ་ཞི།།
གཞི་མེད་རྩ་བྲལ་རྟོགས་པའི་ཡེ་ཤེས་ཆེ།།
རང་རིག་སྐུ་གསུམ་མངོན་དུ་འགྱུར་བར་ཤོག།
དཔལ་ལྡན་བླ་མ་དམ་པ་མཁན་ཆེན་བཀའ་དྲིན་ཅན་མཆོག་ནས། ཆོས་དབྱིངས་རིན་པོ་ཆེ་ལྗགས་ཁྲིད་མཐའ་གྲུབ་པའི་དགའ་སྟོན་གྱི་ཚོགས་འཁོར་གྱི་མཐར། མགོན་པོ་གང་གི་ཞལ་སློབ་དུ་གྱུར་པའི་སྐལ་པ་དང་ལྡན་པ་དམ་ཆོས་རྒྱ་མཚོས། སྤྱི་ལོ་ ༢༠༢༡/༡༡/༢༡ ལོར་གུས་པས་ཕུལ་བའོ།། །།
རྩོམ་པ་པོའི་ངོ་དེབ་དྲྭ་བ་ལས་བཤུས།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།