གྲུབ་ཆེན་དམར་སྒོམ་རིན་པོ་ཆེའི་རྗེས་དྲན་ཨཱ་ལི་ཀཱ་ལིའི་གདུང་དབྱངས།

སློབ་སྤྲུལ་འཆི་མེད་ཚེ་དབང་དོལ་པོ།

གངས་ལྗོངས་དོལ་པོའི་དད་རྟེན་༸སྐྱབས་རྗེ་ཞི་བར་གཤེགས་པ་གྲུབ་ཆེན་དམར་སྒོམ་ཚེ་རིང་བཀྲ་ཤིས་རིན་པོ་ཆེ།

ཀ་དག་རིག་སྟོང་གཡོ་མེད་ཀུན་ཏུ་བཟང་།།

ལྷུན་གྲུབ་རིག་རྩལ་འགག་མེད་རྡོ་རྗེ་འཆང་།།

གང་འདུལ་འགྲོ་དོན་རྩོལ་མེད་དམར་སྒོམ་པ།།

སྐུ་གསུམ་དབྱེར་མེད་ཚེ་རིང་བཀྲ་ཤིས་མཁྱེན།།

ཀ་མད་སུམ་ཅུ་སྲོག་ལྟར་གཙིགས་འཛིན་ཞིང་།།

ཁ་བ་གངས་ཀྱི་ར་བས་ཡོངས་བསྐོར་པའི།།

ག་བུར་མདངས་ལྡན་མངའ་རིས་དོལ་པོ་སྟེ།།

ང་དང་ཕ་ཡུལ་གཅིག་པའི་ཚུལ་དུ་འཁྲུངས།།

ཅ་ལག་མང་པོ་མི་ཉར་བྱ་བྲལ་དངོས།།

ཆ་ཡོད་ཆ་མེད་ཀུན་ལ་སྦྱིན་པ་གཏོང་།།

ཇ་མར་ཐུག་སྡོར་ཙམ་ཡང་ཡོད་མེད་ངང་།།

ཉ་མོ་ཆུ་ལ་འཇུག་ལྟར་སྒོམ་ལ་བརྩོན།།

ཏཱ་ཐ་ག་ཏའི་བསྟན་པ་ཉམས་པའི་རྟགས།།

ཐ་མལ་ང་འདྲས་སྤྲུལ་མིང་འཛིན་པའི་དུས།།

ད་དུང་བསྟན་འཛིན་ཁྱེད་རྣམས་བཞུགས་དགོས་ཀྱང་།།

ན་ནིང་ད་ལོ་ལོ་ནག་ཚེས་པ་འདྲ།།

པ་རེ་པི་རེ་མགོ་བདེ་དྲན་འཕྲུལ་གྱིས།།

ཕ་རོལ་གཞན་མགོ་སྐོར་བའི་བླ་དཔོན་དང་།།

བ་རྫི་བླུན་པོར་སྤྲུལ་མིང་བཏགས་འདྲ་བ།།

མ་ཡིན་ངེས་དོན་བྱང་ཆུབ་སེམས་དཔའ་ཡིན།།

ཙ་གེ་ཙི་གེ་གསོལ་ཆས་ཅུང་ཟད་ཀྱིས།།

ཚ་ཕོག་རྒྱག་གིན་རྒྱག་གིན་ཞབས་ཐང་ངང་།།

ཛ་མ་ལི་དཀར་པོ་[1]རྡོར་གདན་ལུམྦི་ཎི།།

ཝ་ཏི་བཟང་པོ་[2]ལ་སོགས་གནས་ཀུན་མཇལ།།

ཞ་ཀྱོག་སྤྲང་སློང་ལ་སོགས་ཉམ་ཐག་ལ།།

ཟ་མ་གོས་ཀྱིས་བསྐྱངས་པ་ག་ནས་ཚད།།

འ་ཅག་སྔ་འགྱུར་ཡོངས་ཀྱི་སྙིང་ལྟ་བུ།།

ཡ་གིའི་གཏེར་མཛོད་ཆེན་མོའི་དབང་ལུང་བཙུགས།།

ར་བ་བྲག་གིས་བསྐོར་བའི་དམར་སྒོམ་ཞེས།།

ལ་ལུང་ཀུན་ལ་གྲགས་པའི་སྒྲུབ་གནས་དེར།།

ཤ་ཁྲག་གདོས་བཅས་འོད་ལུས་མ་དེངས་བར།།

ས་གནས་གཅིག་ཏུ་སྒྲུབ་པའི་རང་ཚུགས་བཟུང་།།

ཧ་སག་ག་བ་གཏོར་སའི་རྫོང་ཐང་[3]སོགས།།

ཧ་ཅང་ཉན་ཁ་ཆེ་བའི་ལམ་ཕྲང་དང་།།

ཧ་རེར་བརྡོལ་བའི་མཆོད་རྟེན་མཎ་གདང་རྣམས།།

ཧ་ལམ་ཉམས་གསོ་མ་གནང་གཅིག་ཀྱང་མེད།།

ཨ་ཁ་བདག་སོགས་བསོད་ནམས་ཆུང་བ་ལ།། 

ཨ་སྔོན་དགུང་ནས་ཉི་མ་ནུབ་འདྲ་བ།།

ཨ་ཏི་རྫོགས་པ་ཆེན་པོའི་རྣལ་འབྱོར་ཉིད།།

ཨ་དོན་སྐྱེ་མེད་ཀློང་དུ་གཟུགས་སྐུ་བསྡུས།།

ཨི་ཁུང་ཚངས་པའི་བུ་གའི་ཡང་སྟེང་ན།།

ཨུ་རྒྱན་གུ་རུ་དབྱེར་མེད་དམར་སྒོམ་རྗེ།།

ཨེ་ཝཾ་ཟུང་འཇུག་ཡེ་ཤེས་སྒྱུ་མའི་སྐུས།།

ཨོ་ལོའི་བདག་རྒྱུད་བྱིན་གྱིས་བརླབ་ཏུ་གསོལ།།

༢༠༢༢/༡༠/༡༧

________________

ཞབས་མཆན།

[1] རང་རེ་བོད་རིགས་རྣམས་ལ་ཇོ་བོ་འཛམ་གླིང་དཀར་མོར་གྲགས་པ་སྟེ། རང་བྱུང་ཇོ་བོ་མཆེད་ལྔའི་ཡ་གྱལ་བལ་ཡུལ་དུ་བཞུགས་པ་ཞིག

[2] སྐྱིད་རོང་ཇོ་བོ་སྟེ། རང་བྱུང་ཇོ་བོ་མཆེད་ལྔའི་ཡ་གྱལ།

[3] ཧ་སག་སྟེ། སྔོན་ཏུརྐིསྠཱན་ནས་ཧ་སག་ཇག་ཚོགས་ཤིག་ཡོང་བ་དེ་། མངའ་རིས་སྒར་དཔོན་དང་འཐབས་ནས་ཐོར་ཅིང་། ཁྱུ་གཅིག་དོལ་པོའི་ཕྱོགས་སུ་སླེབས་ལ་ཉེ་སྐབས། དོལ་སྤྱི་ཁྱབ་ཉི་མ་ཚེ་རིང་གིས་བཅོ་བརྒྱད་དྲུག་ཅུའི་དམག་བསྐུལ་ཏེ། རྫོང་ཐང་ཞེས་པའི་ཕྲང་དེར་བཀག་པའི་ལོ་རྒྱུས་ཡོད།