ཤེས་རབ་རྒྱལ་མཚན། སྔ་འགྱུར་མཐོ་སློབ་ཆེན་མོ།
ཤར་གླིང་འཇིགས་མེད་གླིང་གི་ཡང་རྩེ་ན།།
ཤར་ནས་ཤར་བའི་ཉི་མའི་ཉི་མདོངས་གསལ།།
ཤར་ལྷོ་ནུབ་བྱང་ཕྱོགས་ཀུན་དྭངས་གསལ་ཤེལ།།
ཨ་ཧོ་འོག་མིན་ཤེལ་གྱི་ཁང་བཟང་ནང་།།
འོག་མིན་སྟོན་པ་ལོངས་སྤྱོད་རྫོགས་སྐུ་ཡིས།།
འོག་མིན་ཞིང་དུ་གསུངས་པའི་ཆོས་འཁོར་ཏེ།།
རྒྱུད་རྒྱལ་གསང་བ་སྙིང་པོའི་ཕ་ཆོས་མཇལ།།
དམ་ཞིང་དམ་པས་སུན་སྣང་མི་སྟེར་ཞིང་།།
ལྷོད་ཅིང་ལྷོད་པས་བག་མེད་མ་ཤོར་ལ།།
དམ་ལྷོད་རན་པོས་སློབ་ཚོགས་སྐྱོང་མཁས་པ།།
བཤེས་གཉེན་མཁན་པོ་ཟླ་བ་དཔལ་འབྱོར་མཇལ།།
ཆོས་ཐུན་རེ་རེའི་བར་ན་གཏམ་རྒྱུད་རེ།།
གཏམ་རྒྱུད་རེརེའི་བར་ན་དགོད་སྒྲ་རེ།།
དགོད་སྒྲ་རེ་རེའི་བར་ན་བློ་སྐྱེད་རེ།།
ཉེས་འགོག་ལེཌ་བཤད་འདོམས་མཁས་བཤེས་གཉེན་མཆོག
མཐོང་ཚད་དགག་སྒྲུབ་བྱེད་ལ་རིངས་པ་ཡི།།
“ལུང་མ་བསྟན་གྱི་རྟོག་གེ་འཆལ་པོ་”མིན།།
རིག་འཛིན་གོང་མའི་གཞུང་གི་གནད་གསང་ལ།།
དག་སྣང་དད་པས་མཇལ་བའི་བཤེས་གཉེན་ལགས།།
སྒོམ་རྟགས་ཉོན་མོངས་ཡོད་མེད་མི་ཤེས་མོད།།
ཐོས་རྟགས་ཞི་ཞིང་དུལ་བའི་ཚུགས་ཀ་ནི།།
སྐབས་འགར་སྐབས་འགར་ཙམ་ཞིག་མ་ཡིན་ལ།།
ཡུཡུན་རིང་འཆད་ཉན་བགྱིས་པའི་རིང་ལས་ཤེས།།
ཞི་དུལ་བག་ཕེབས་ཚུགས་ཀ་བཟང་བའི་སྟེང་།།
འདུལ་བའི་བསླབ་ཁྲིམས་མིག་ལྟར་སྲུང་བ་ལ།།
མཁན་ཆེན་དམ་པ་པདྨ་ཤེས་རབ་ཀྱང་།།
ཐུགས་དགོངས་དགྱེས་པའི་གསུང་བཟང་ཐོས་སོ་སྤྲོ།།
སླར་ཡང་འདི་ལྟར་ཡང་ནས་ཡང་དུ་ནི།།
ཁྱེད་དང་ཁྱེད་འདྲའི་བཤེས་གཉེན་དམ་པའི་དྲུང་།།
ང་དང་ང་འདྲའི་སྐལ་ལྡན་སློབ་མའི་ཚོགས།།
འདི་དང་འདི་ལྟའི་ཟབ་ཆོས་མཇལ་བར་སྨོན།།
༡༧/༡༠/༢༠༢༢
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།