སྦྲགས་སྐད།

རྩོམ་པ་པོ།: རྒྱལ་མོའི་འོད་དཀར།

ཡོང་ཁུངས།: རྒྱལ་མོའི་ཡུམ་ཚེ་རིང་གི་འཕྲིན་སྟེགས།

           

ཀྱེ་ཧུད་་་་་་་་

སྦྲགས་སྐད།

ཁྱེད་ནི་མི་གཙང་བའི་མཁའ་དབུགས་སྟུག་པོ་ཞིག་སྟེ།

ཁ་རོག་གེར་འཇབ་འོངས་ཏེ།

ལྷད་མེད་དག་གཙང་གི་མཐོ་སྒང་འདིར།

ལྷ་ཡུལ་ལྟ་བུའི་ཞིང་ཁམས་འདིར་འོངས་ཏེ།

ངའི་ཕ་སྐད་ཀྱི་གཙང་བོ་རྙོག་པར་བཏང་སོང་།

ཀྱེ་ཧུད་་་་་་

ཁྱེད་ནི་བལྟ་འདོད་དང་མྱོང་སྣང་གིས་བཏེགས་ཏེ་ཐོན་པའི།

ཧམ་སེམས་དང་གད་སྙིགས་འཁུར་བའི་ལྗོངས་རྒྱུ་བ་ཞིག་དང་འདྲ་བར།

ངའི་ཕ་སྐད་ཀྱི་མཁའ་དབྱིངས་སུ་ཁྱབ་ནས།

དྭངས་ཤིང་དྲི་མ་མེད་པའི་ཕ་སྐད་ཀྱི་མཁའ་དབུགས་ལ།

འབག་བཙོག་བཟོས་སོང་།

ཀྱེ་ཧུད་་་་་་་

ཁྱེད་ནི་བཅོས་དཀའ་བའི་ཨེ་ཙིའི་ནད་དང་འདྲ་བར།

བདག་ཅག་གི་ལུས་སྟེང་དུ་འགོས་ཏེ།

ངའི་ལྷད་མེད་ཕ་སྐད་ཀྱི་བདེ་ཐང་འཕྲོག་སོང་།

སྦྲགས་སྐད།

ཁྱེད་ནི་ད་ལྟའི་ངེད་ཅག་ལ་མི་མཁོ་བའི་དུག་རྫས་ཤིག་དང་འདྲ་བར།

ཕ་སྐད་ཀྱི་གཙང་བོའི་ནང་དུ་འདྲེས་ཏེ།

གངས་ཅན་པའི་ཕ་སྐད་ཀྱི་འཚོ་བཅུད་བཞིབས་སོང་།

སྦྲགས་སྐད།

ཁྱེད་ནི་གསེར་སྐུ་ཟངས་ལ་འགྱུར་བའི་ཆག་སྒོ་དང་།

སེང་གེ་ཁྱི་ལ་འགྱུར་བའི་བར་ཆད་དེ།

མི་རིགས་འདིའི་སྲོག་གི་རྒྱུ་བ་འགག་པར་བྱེད་པའི་ནད་ཡམས་ཤིག

སྦྲགས་སྐད།

ཁྱེད་ནི་བཅུ་དྲུག་ལང་ཚོས་སྙེམས་པའི་གཞོན་ནུ་རྩལ་དྲུག་དག་ལ་མི་མཁོ་བའི་སྙིགས་རོ་ཞིག

ཁྱེད་ནི་ལང་ཚོ་དར་ལ་བབ་པའི་རྫི་བོ་གཞོན་ནུ་དག་ལ་མི་མཁོ་བའི་གད་སྙིགས་ཤིག

ཁྱེད་ནི་མ་འོངས་བོད་གངས་ཅན་འཛུགས་སྐྲུན་བྱེད་པའི་ན་གཞོན་བློ་གསལ་དག་ལ་མི་མཁོ་བའི་སེམས་ཀྱི་ན་ཟུག་ཅིག

ཀྱེ་་་་་་་

ནོར་ནག་གི་རྨུག་རྗེས་དེད་དེ་མི་ཚེ་སྐྱེལ་བཞིན་པའི་རྫི་བོ་དང་།

རྩྭ་ཐང་ལ་མཛེས་སྡུག་སྩོལ་བའི་ཉི་གཞོན་དེ་འདྲེན་མཁན་གྱི་བློ་གསལ་རྣམས།

སྦྲགས་སྐད། རང་ལས་རྒྱང་དུ་བཀྱེད་དེ།

ལོ་རྒྱུས་ལ་ཕྱིར་རྟོག་བྱོས།

དངོས་ཡོད་ལ་གཟུ་བོར་ལྟོས།

འབྱུང་འགྱུར་ལ་མནོ་བསམ་ཐོངས།

ཕ་སྐད། རང་དང་ཉེ་བར་བསུ་རོགས།

གསན་བྱུང་ངམ།

མཐོང་བྱུང་ངམ།

ངའི་སྙིང་ཉེ་བའི་གངས་ལྗོངས་ཀྱི་གཞོན་ནུ་ལགས།