བོན་ཞེས་པའི་ཡིག་འབྲུའི་གོ་དོན་སྐོར་གླེང་བ།

རྩོམ་པ་པོ། ཁྲ་འཛུམ་དགའ། ལྷོ་རོང་། 

༡༽ གདོད་མའི་བོན་ངོས་འཛིན་ཚུལ།

གདོད་མའི་བོན་ནི་གང་ཟག་ཆེ་གེ་མོས་སྲོལ་གཏོད་ལས་བྱུང་བ་མ་ཡིན་པར་རང་བྱུང་ཆོས་ལུགས་ཀྱི་སྣང་ཚུལ་ལས་རིམ་བཞིན་གདོད་མའི་མི་རྣམས་ཀྱི་བསམ་བློའི་ཆོས་ལུགས་ཤིག་ཏུ་འགྱུར་བར་བཤད་ཡོད། དེ་ཡང་གདོད་མའི་རང་བྱུང་ཁམས་ཀྱི་སྣང་ཚུལ་སྣ་ཚོགས་ཏེ་ཉི་ཟླའི་འཁོར་སྐྱོད། དུས་བཞིའི་འགྱུར་ལྡོག ཆར་འབབ་སྤྲིན་ལྡང་། གཅན་གཟན་གྱི་གདུག་པ་ལ་སོགས་པས་རྐྱེན་གདོད་མའི་མི་རྣམས་བསམ་གཞིགས་ཀྱི་ནུས་པ་ཆེས་ཞན་པས་འཇིགས་སྣང་གི་སྣང་ཚུལ་དེ་དག་རང་བྱུང་ཁམས་ཀྱི་ཆོས་ཉིད་ཅིག་ཡིན་པར་རྟོགས་མ་ཐུབ་པར་དེ་ལས་བརྒལ་བའི་སྟོབས་ཤུགས་ཤིག་ཡིན་པར་འདོད་དེ་ལྐོག་འགྱུར་གྱི་ལྷ་དང་འདྲེ་རུ་བརྩིས་ནས་དད་མོས་མཆོད་གསོལ་བྱེད་དེ་རང་བྱུང་གི་རི་ཆུ་ལ་དད་པ། སྐྱེ་དངོས་ལ་དད་པའི་སྣང་ཚུལ་སོགས་བྱུང་བར་བཤད། 

༢༽ བོན་ཞེས་པའི་གོ་དོན་མི་འདྲ་བ།

བོན་ཞེས་པའི་ཡིག་འབྲུ་འདིའི་གོ་དོན་ཐད་སྔ་རབས་ཀྱི་དཔེ་ཆ་དང་ཕྱིས་བྱོན་མཁས་པ་རྣམས་ཀྱིས་བཞེད་ལུགས་མི་མཐུན་པ་ཧ་ཅང་མང་ངོ་།།

དང་པོ། གང་ཟག་ལ་འཇུག་པའི་སྐོར། “ཡར་གཡེན་གཉེན་པོ་བཅུ་གསུམ་འདུལ་བའི་བོན་པོ། དབལ་བོན་རོམ་པོ། ཡོག་བོན་གཏོ་རྒྱལ། ཁྲིན་བོན་ཕྱྭ་སངས། གཉེར་བོན་གཏོ་ཆེན། འོལ་བོན་འབྲང་ཟུང་། འཚམས་བོན་ཡོ་འཁྲུགས། དམུ་བོན་ཡེའུ་ཏན། བདུད་བོན་ཚབ་ལྕགས། བཙན་བོན་མཚལ་ལྕགས། སྲིད་བོན་མུ་ཅོ། བསྐོས་བོན་གཙུག་སྲས། ཕྱྭ་བོན་ཐེའུ་ལེགས། ལྷ་བོན་ཐོད་དཀར་དང་ཐབས་གཅིག་ཏུ་བཞུགས་སོ། །”ཞེས་དང་ཀླུ་བོན་དབྱར་སྙ། འདྲེ་བོན་གྱེར་མཁས། གཉན་བོན་ཐང་ཐང་ཁྲོལ་བ། བཙན་བོན་དུམ་པ་མཚལ་ལྕགས། བདུད་བོན་ཁ་ཏ་འགྲེང་ཡུག སྨན་བོན་འབྲང་ཐང་ལ་སོགས་པ་མང་དུ་འབྱུང་བའི་ཐ་སྙད་འདི་དག་ནང་གི་བོན་ཞེས་པར་ཅུང་ཙམ་དཔྱད་ན་ཕལ་ཆེར་བ་གང་ཟག་ལ་གོ་བ་ལྟ་བུ་སྣང་སྟེ་གདོད་མའི་མི་རྣམས་ཀྱི་འཚོ་བའི་གོམས་གཤིས་དང་འགྲོགས་པའི་ལྷ་ཀླུ་གཉན་གསོལ་བྱེད་མཁན་དང་དེའི་ཐུགས་དམ་སྐོང་བྱེད་ཀྱི་གཏོ་ཆོག་རིམ་གྲོ་སྒྲུབ་མཁན་གང་ཟག་སྟེ་བོན་པོ་ལ་མང་དུ་འཇུག་འདུག

གཉིས་པ། གསུང་རབ་ལ་འཇུག་པ། མཁན་ཉི་མས་མཛད་པའི་ཕར་ཕྱིན་སྐབས་དང་པོའི་ནང་དུ་“སྟོན་པའི་བོན་སྒོ་བཞི་མཛོད་ལྔ་གསུང་།” ཞེས་དང་། ད་དུང་མདོ་ལས།“སྤྱི་རུ་ཐེག་པ་རིམ་དགུ་དང་། ། སྒོས་སུ་གསས་མཁར་སུམ་བརྒྱ། ། ཡང་སྒོས་བརྒྱད་ཁྲི་བཞི་སྟོང་། །གསུང་ཡོད་པའི་བོན་ཞེས་པའི་ཡིག་འབྲུ་འདི་གསུང་རབ་དང་གསས་མཁར་སོགས་ཀྱི་དོན་ལའང་འཇུག་པར་བཤད་དོ།། 

གསུམ་པ། ཀུན་མཁྱེན་ཤར་རྫ་པས་མཛད་པའི་ལེགས་བཤད་མཛོད་ནང་གནའ་དུས་གངས་ཅན་པའི་ཡུལ་གྲུ་འདིར་བོན་གྱི་ཆོས་ལུགས་ཁོ་ནར་དར་བའི་རྒྱུ་མཚན་གྱིས་ཡུལ་ཁམས་དེལང་བོན་ཁམས་ཞེས་འབོད་པ་དང་བོན་དང་བོད་གཉིས་གོ་དོན་གཅིག་པ་ལྟ་ཚུལ་བཏོན་གནང་ཞིང་གནའ་དུས་རྗེས་འཇུག་ད་ན་གཉིས་ཕན་ཚུལ་རེས་མོལ་བཀོལ་དེ་བྲིས་ཡོད་པ་ནི་ཧ་ཅང་མང་སྟེ་དཔེར་ན། བོན་ཁམས། བོད་ཁམས། བཙན་པོ། བཙད་པོ། ཆུན་པོ། ཆུད་པོ་སོགས་རྗེས་འཇུག་ད་ན་གཉིས་བརྗེས་ཏེ་འབྲི་སྲོལ་ཡོད་འདུག ཁོང་གི་ལྟ་ཚུལ་དེར་མཁས་མཁས་དབང་དགེ་ཆོས་ཀྱིས་དེབ་དཀར་ན་དུ་དགག་སྒྲུབ་ཕུང་གསུམ་པའི་ལྟ་ཚུལ་ཙམ་མ་གཏོགས་བཏོན་མེད། 

བཞི་པ། མཁས་དབང་ནམ་མཁའི་ནོར་བུས་མཛད་པའི་ཏི་སེ་འོད་དང་དོན་འགྲུབ་ལྷ་རྒྱལ་གྱིས་སྒྲིག་པའི་བོན་གྱི་གྲུབ་མཐའ་སྤྱི་བཤད་སོགས་ཡིག་ཆ་ཁག་ཏུ་བོན་འདི་གནའ་བོའི་གདོད་མའི་བོན་པོ་ཚོས་འདོན་པ་ཟླས་པ་དང་གདངས་དབྱངས་གྱེར་བ་ལ་སོགས་ངག་གི་བྱེད་ལས་ཤིག་ཡིན་པ་དང་ཞང་སྐད་དུ་གྱེར་དང་སྨྲང་གྱེར་ཞེས་ཆོ་ག་རྣམས་དབྱངས་རིང་པོས་འདོན་པའི་དོན་ལ་འཇུག་པར་བཤད།

ལྔ་པ། བོན་ཞེས་པ་ཤེས་བྱ་སྤྱི་ལ་འཇུག་པའི་བཤད་ཚུལ་ནི་གདོད་མའི་བོན་དེ་གཡུང་དྲུང་བོན་གྱི་ངོ་བོར་འཕེལ་རྒྱས་སོང་ཚར་བའི་དུས་རིམ་ནང་དུ་བྱུང་བ་ཞིག་ཡིན་པ་སེམས། གཞུང་ལུགས་དེ་དག་ནང་གི་བོན་ཞེས་པ་སྣང་སྲིད་སྣོད་བཅུད་སྤྱི་དང་བསོད་ནམས། གསུང་རབ། གང་ཟག འཁོར་འདས། ཡིད་ཀྱི་ཡུལ་སོགས་ལ་འཇུག་ཚུལ་བཤད་པ་ནི་ཕྱིས་སུ་བྱུང་བའི་གཡུང་དྲུང་བོན་གྱི་གཞུང་ལུགས་ནང་གི་སྐད་ཆ་ཞིག་ཡིན་པར་སེམས། 

དྲུག་པ། རྡོལ་འཁྱལ་བསྒྱུར་བོན་སྐོར། བོན་གྱི་ལོ་རྒྱུས་ནང་རྡོལ་བོན་དང་འཁྱལ་བོན། བསྒྱུར་བོན་བཅས་དུས་རིམ་ཁག་གསུམ་དུ་དབྱེ་མཁན་དང་དཔྱད་གཏམ་ཐོག་མ་སྤེལ་མཁན་ནི་འབྲི་གུང་སྐྱོབ་པ་འཇིག་རྟེན་མགོན་པོ་ཡིན་པ་མཁས་པ་མང་ཆེ་བས་ངོས་འཛིན་གནང་མོད། བླ་མ་འཇིག་རྟེན་མགོན་པོ་ཁོང་གི་བུ་སློབ་སྤྱན་སྔ་པ་རྡོ་རྗེ་ཤེས་རབ་ཀྱི་གསུང་རྩོམ་གཉིས་དངོས་སུ་ཞིབ་བསྡུར་བྱས་ཏེ་ལོ་རྒྱུས་སྨྲ་བ་སྐུ་ཞབས་ལྷག་པ་བཀྲ་ཤིས་ལགས་ཀྱིས་དཔྱད་གཏམ་དེ་ཐོག་མར་སྤེལ་མཁན་བླ་མ་འཇིག་རྟེན་མགོན་པོ་མ་ཡིན་པར་ཁོང་གི་བུ་སློབ་སྤྱན་སྔ་པ་རྡོ་རྗེ་ཤེས་རབ་ཡིན་པར་བཤད་ཡོད། འདིའི་སྐོར་ཤེས་འདོད་ཀྱི་གང་ཟག་མཆིས་ན་«དགོངས་གཅིག་འགྲེལ་ཆེན་སྣང་མཛད་ཡེ་ཤེས་སྒྲོན་མེ།»ཞེས་པའི་དེབ་དེར་བལྟ་བར་མཁྱེན།

དཔྱད་ཡིག་ནང་དོན། 

❶《མདོ་གཟེར་མིག》ལས་དྲངས། 

❷《ཕར་ཕྱིན་ཚིག་དོན་བཀའ་གནད་རབ་གསལ》ལས་དྲངས། 

❸《མདོ》ལས་དྲངས། 

❹《ལེགས་བཤད་རིན་པོ་ཆེའི་གཏེར་མཛོད》

❺《དེབ་ཐེར་དཀར་པོ》

❻《ཞང་བོད་ལོ་རྒྱུས་ཏི་སེ་འོད》

❼《གཡུང་དྲུང་བོན་གྱི་གྲུབ་མཐའ་སྤྱི་བཤད》

❽《འཇིག་རྟེན་མགོན་པོའི་གསུང་བཅུ་བཞི》

❾《སྣང་མཛད་ཡེ་ཤེས་སྒྲོན་མ》

①⓪《བོན་དང་གཡུང་དྲུང་བོན་གྱི་བྱུང་བ་བརྗོད་པ》

རྩོམ་ཁུངས།  ལུག་ཚང་དཔལ་ཡོན་འཕྲིན་སྟེགས།