རྩོམ་པ་པོ།
སྤྲུལ་སྐུ་ཚེ་རིང་དབང་འདུས།
སྒྱུ་ལུས་གོག་པོ་མལ་ཁྲི་སྟེང་ནས་ལྷག།
སེམས་ཀྱི་རྟ་ཕོ་རྒྱལ་ཁམས་ཀུན་དུ་བསྐོར།།
ལུས་སེམས་གཉིས་ཀྱིས་འདུར་བརྒྱུགས་བྱེད་སྟངས་འདི།།
དོན་དངོས་རྨི་ལམ་ནང་གི་འཆར་ཡན་ཞིག།
བཟང་པོར་འཛིན་པའི་བསྟོད་ལུགས་ཏོག་ཏུ་བསྒྲེངས།།
ངན་ན་འཕྱ་སྨོད་འདམ་རྫབ་ཁྲོད་དུ་འཕེན།།
བསྟོད་སྨད་བར་ཀྱི་གསང་གཏམ་རིང་མོ་འདི།།
དོན་དངོས་གང་ཞིག་ཡིན་མིན་འཕྱང་མོ་ཉུག།
ལེགས་ན་འཛུམ་གྱིས་ཚེམས་ཕྲེང་མ་ལུས་སྟོན།།
ཉེས་ན་གདོང་གི་ཁྲོ་གཉེར་འཛུམ་མདངས་ཡལ།།
ལེགས་ཉེས་བསྟོད་སྨད་མཛའ་བ་འཁོར་བའི་གཤིས།།
ཨ་འཐས་སྒྱུ་མའི་འཕྲུལ་གྱིས་བསླུ་བྲིད་བྱས།།
ཡོད་མེད་རྗེས་སུ་གཅོད་པའི་རིག་སྨྲ་པས།།
གཞུང་ལུགས་བམ་མཐུག་མང་པོ་ལྕེ་རྩེར་འཇགས།།
འཁྲུལ་བའི་ལིང་ཏོག་ལ་ཞེན་ཁ་ལྕེའི་དབར།།
མཛུབ་མོ་གནམ་ལ་ཀེར་བའི་ཚུལ་སོམས་ཤིག།
དག་སྣང་དད་པའི་མྱུ་གུ་རང་རྒྱུད་ལ།།
སེམས་ཀྱི་ཞིང་སར་མ་སྐྱེས་སྒྲ་སྟོང་གི།
དྲག་ཆར་ཐོག་ལྟར་དབབ་པའི་བདག་འདྲ་ཚོས།།
སེམས་ལ་མ་འཇགས་ཁ་བདེའི་གློག་ཞགས་མྱུར།།
ཞོགས་པའི་སྐྱ་རེངས་ཕོ་ཉའི་མདུན་བསུས་ཤིང་།
ཉིན་བྱེད་ནུབ་རི་ཕག་ཏུ་མ་ཡིབ་དབར།།
རྐང་ལག་ས་གཞིར་བཙུགས་པའི་དོན་སྙིང་གང་།
རྗེས་སུ་བདས་ན་བྲང་ཁོག་ནན་གྱིས་བརྡུངས།།
གླིང་ཁར་འབུས་པའི་མེ་ཏོག་རྐང་གཅིག་མ།།
ཧོབ་ཀྱིས་བལྟས་ཚེ་འདྲེན་བྱེད་ཁུང་དུ་མཛེས།།
ཞིབ་ཀྱིས་གཞལ་དུས་ལག་པས་སྣ་ཁུང་བཀབ།།
ངང་ཚུལ་བསམས་ཚེ་སྲིད་པའི་སྣང་ལུགས་རྫོབ།།
བྱ་རྒྱལ་ཡིན་ན་མཁའ་དབྱིངས་འཕུར་ན་སྙམ།།
གསེར་ཉ་ཡིན་ན་ཆུ་ནང་འཛུལ་འགྲོ་བསམ།།
གང་དུ་བགྲོད་ཀྱང་ས་གཞི་ཚེར་མས་ཁེངས།།
རྐང་ལག་གང་དུ་སྤོ་མིན་མ་ཤེས་སོ།།
༢༠༢༠/༤/༢༦/
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།