སློབ་ཆུང་སློབ་མར་བོད་ཡིག་གི་རྨང་གཞི་བརྟན་པོ་འཇོག་དགོས་པའི་སྐོར།

རྩོམ་པ་པོ། གསེར་བཟང་སྒྲོལ་མ།

ནང་དོན་གནད་བསྡུས།

འདིར་གཙོ་བོ་སློབ་ཆུང་སློབ་མར་བོད་ཡིག་གི་རྨང་གཞི་བརྟན་པོ་འཇོག་དགོས་པ་གཞིར་བཟུང་ནས། དེའི་ཐབས་ལམ་དང་གནད་དོན་སོགས་ཀྱི་ཐད་བྲིས་ཡོད་དེ། ཚན་པ་དྲུག་གི་སྒོ་ནས་སློབ་མའི་བོད་ཡིག་གི་རྨང་གཞི་བརྟན་པོར་ཆགས་ཐབས་ཀྱི་ཐད་ལ། དགེ་རྒན་གྱི་འབད་པ་ཇི་ལྟར་བྱེད་དགོས་ཚུལ་གྱི་སྐོར་ཅུང་ཟད་དཔྱད་པའོ།།

བརྡ་ཆད་གཙོ་བོ། 

སློབ་ཆུང་སློབ་མ། བོད་ཡིག་གི་རྨང་གཞི། ཐབས་ལམ། 

སྔོན་འགྲོའི་གཏམ།

རང་མི་རིགས་ཀྱི་སྐད་དང་ཡི་གེ་ལ་དགའ་ཞེན་ཟབ་མོ་ཡོད་པའི་དྲིན་ཆེན་གྱི་ཡུབ་ཡུམ་མམ་ལྷག་བསམ་ཟོལ་མེད་ཀྱི་དགེ་རྒན་དང་། བོད་ཡོངས་ལ་ཁྱབ་པའི་རིག་པའི་དཔའ་བོ་གང་ཞིག་ཡིན་རུང་། མི་རིགས་ཀྱི་མ་འོངས་པའི་རྟེན་སའམ་སྐད་དང་ཡི་གེའི་རྒྱུད་འཛིན་མཁན་ནི་སློབ་བུ་དག་ཡིན་པ་ཤེས་སྲིད། དེ་བས་ཤེས་རིག་གི་སྐྱེད་ཚལ་འགྲིམས་པའི་སློབ་བུ་འདི་དག་ལ་ཆུང་དུས་ནས་བོད་ཡིག་གི་རྨང་གཞི་བརྟན་པོ་ཞིག་འཇོག་རྒྱུ་ནི། ཚང་མའི་རེ་བ་དང་འགན་འཁྲི་ཉག་གཅིག་ཡིན། རང་ཉིད་ནི་ཆེས་སྤྱིར་བཏང་གི་དགེ་རྒན་ཞིག་ཡིན་ནའང་རང་རིགས་ཀྱི་སློབ་བུ་ཚོར་ཆུང་དུས་ནས་བོད་ཡིག་གི་རྨང་གཞི་བརྟན་པོ་ཞིག་འཇོག་ཐུབ་རྒྱུ་ནི་ཧ་ཅང་གལ་ཆེན་ཞིག་དང་མ་སྐུལ་དང་བླངས་ཀྱི་འོས་འགན་ཞིག་ཏུ་བརྩི་བཞིན་ཡོད།

དང་པོ། སློབ་མའི་རྨང་གཞིའི་གནས་ཚུལ་སྐོར།

ཡིག་ངོ་གཅིག་ཀྱང་མི་ཟིན་པའི་སློབ་མ་ཞིག་ཆུང་དུས་ནས་བོད་སྐད་བོད་ཡིག་སྦྱོང་ཞིང་། བོད་ཡིག་གི་རྨང་གཞི་བཟང་བོ་ཞིག་བསྐྲུན་ཐུབ་མིན་ནི། སློབ་ཁྲིད་ཀྱི་འགན་འཁུར་བཞིན་པའི་སློབ་ཆུང་གི་བོད་ཡིག་དགེ་རྒན་དག་ལ་རག་ལས་ཡོད། དེ་ལས་དགེ་རྒན་གྱི་ཕྲག་ཏུ་བབས་པའི་འོས་འགན་ལྕི་མོ་འདི་ལག་ལེན་བྱ་རྒྱུ་ཤིན་ཏུ་གལ་ཆེ་བར་སྣང་། སློབ་མ་ཚོར་བོད་ཡིག་གི་རྨང་གཞི་བཟང་པོ་ཞིག་ལྡན་ན་སློབ་མའི་མ་འོངས་བའི་མདུན་ལམ་ཡང་བདེ་སྐྱིད་དང་འོད་སྣང་ལྡན་ངེས། སློབ་མའི་མ་འོངས་པའི་མདུན་ལམ་ལ་བདེ་སྐྱིད་ཀྱི་འོད་སྣང་ལྡན་ཚེ་ང་ཚོའི་ཡོད་ཚད་ལ་གསོན་ཤུགས་རྒྱས་པ་ཡིན། དེའི་ཕྱིར་སློབ་མའི་མ་འོངས་པའི་མདུན་ལམ་ཡོད་ཚད་ལ་གཞི་རྐང་ཡག་པོ་འཇོག་ཐུབ་མིན་དེ་སློབ་ཆུང་དགེ་རྒན་ལ་རག་ལས་ཡོད། ད་ལྟ་ང་ཚོ་དགེ་རྒན་རྣམས་ཀྱིས་ན་ཆུང་བྱིས་པ་ཚོར་ཆུང་དུས་ནས་འབྲི་ཀློག་གི་འགོ་བརྩམས་ཏེ་སློབ་མས་ཡིག་ངོ་ཆོད་པ་དང་རིམ་བཞིན་ཚིག་གྲོགས་བཙལ་ཚུལ་བསླབས། དེ་ནས་ཁ་སྐོང་འབྲི་ཚུལ་དང་ཚིག་སྒྲིག་སྟངས་སོགས་སློབ་ཀྱིན་ཡོད་ལ། དེ་དང་འབྲེལ་ཡོད་ཀྱི་སྦྱོང་གཞིའི་ལྷན་ཐབས་ཀྱང་མང་པོ་བཟོས་ཡོད་པ་རེད། ཁྱོད་ཚོས་བསམ་བློ་རེ་ཐོངས་དང་། དེ་དག་ལ་ཕན་ནུས་ཅི་འདྲ་ཞིག་ཡོད་དམ། དེས་སློབ་མ་ཚོར་བོད་ཡིག་གི་རྨང་གཞི་ལེགས་པོ་འཇོག་ཐུབ་ཀྱིན་ཡོད་དམ། སློབ་ཆུང་ལོ་རིམ་དང་པོ་ནས་གཉིས་པའི་སློབ་མ་ཞིག་ལ་འདི་འདྲའི་སློབ་ཁྲིད་བྱེད་ཐབས་འགྲིག་ཡོད་དམ། ང་ཚོ་བོད་ཡིག་དགེ་རྒན་རྣམ་པས་སྐད་རིགས་གཞན་གྱི་སློབ་ཁྲིད་བྱེད་ཐབས་ཁོ་ན་ལ་དོ་སྣང་བྱས་ནས། རང་མི་རིགས་ཀྱི་སྲོལ་རྒྱུན་སློབ་ཁྲིད་བྱེད་ཐབས་ལ་ཞིབ་འཇུག་དང་བེད་སྤྱོད་མ་བྱས་ན་འགྲིག་གམ། ད་ལྟ་ང་ཚོས་སྤྱོད་བཞིན་པའི་ཁྲིད་ཐབས་འདི་ནི་ལོ་རིམ་དང་པོ་ནས་གཉིས་པའི་སློབ་བུ་ཚོ་དང་འཚམ་པོ་ཞིག་རེད་དམ། དགེ་རྒན་གྱིས་སློབ་མའི་དངོས་ཡོད་འཚོ་བ་དང་བསྟུན་ནས་སློབ་ཁྲིད་ཐད་ཀྱི་སྨྱན་མང་སྒྲིག་པ། དགེ་སློབ་མཉམ་འབྲེལ་བྱས་ནས་ཁྲིད་ཆས་བཟོ་རྒྱུ་དང་ཁྲིད་ཆས་དེ་དག་གི་བེད་སྤྱོད་གནས་ལུགས་ཤེས་པ།  དགེ་རྒན་གྱིས་སློབ་མའི་སློབ་སྦྱོང་གི་ཁོར་ཡུག་དང་རིག་གནས་ཆུ་ཚད་ལ་བརྟེན་ནས་སློབ་དེབ་དང་རྒྱུགས་ཤོག་སོགས་སྒྲིག་ཐུབ་པ་བྱེད་རྒྱུ་ནི་གལ་ཆེ་སྟེ། འདི་ནི་རང་གིས་ལོ་གཉིས་རིང་སློབ་ཁྲིད་བྱས་པའི་ཉམས་མྱོང་ཉུང་ཙམ་ལས་བརྗོད་པ་ཐུང་ངུ་ཞིག་ཡིན་ནོ།།

གཉིས་པ། བོད་ཡིག་གི་རྨང་གཞི་བརྟན་པོ་འཇོག་པར་ཚང་དགོས་པའི་ཆ་རྐྱེན་དང་ཐབས་ལམ།

སྐད་རིགས་གཞན་གྱི་སློབ་ཁྲིད་བྱེད་ཐབས་སློབ་མ་ཆུང་ཆུང་འདི་དག་ལ་མཚོན་ན། སྦྱང་གཞིའི་ལྷན་ཐབས་འདི་ནི་འོས་འགན་ལྷན་ཐབས་ཤིག་ཏུ་གྱུར་ཡོད་ལ། འདིས་སློབ་མའི་སྦྱང་གཞི་ཡིད་ལ་འཇོག་ཐུབ་པ་ཕར་ཞོག མཐར་བསམ་བློ་དང་སེམས་ཁམས་ལ་སུན་པོ་བཟོས་ནས་སློབ་སྦྱོང་གི་དགའ་ཕྱོགས་དང་མོས་པ་སོགས་རྨེག་མེད་དུ་བཅོམ་པས། ང་ཚོས་ཅིས་ཀྱང་སློབ་མས་བོད་ཡིག་སྦྱོང་ཐབས་དང་རྨང་གཞི་བཟང་པོ་འཇོག་ཐབས་ཡང་དག་ཅིག་འཚོལ་དགོས། དེས་ན་རང་གི་སློབ་ཁྲིད་ཁྲོད་ཀྱི་སྲོལ་རྒྱུན་དང་མཐུན་པའི་མྱོང་ཚོར་གཤམ་གསལ་ལྟར།

གཅིག རྨང་གཞི་བཟང་པོ་ཀློག་ནས་མགོ་འཛུགས་བྱ།

སློབ་མས་ཐ་སྙད་ཅིག་ཀྱང་ཀློག་མ་ཤེས་ན་གཞན་དག་དེ་ལས་ཀྱང་ཤེས་མི་སྲིད། མིང་ཚིག་གམ་ཐ་སྙད་ཀློག་ཅེས་པ་ནི་གསལ་དག་མྱུར་གསུམ་འཛོམ་དགོས་ལ། གསལ་ཞེས་པ་ནི་སྒྲ་གསལ་བོས་ཀློག་ཐུབ་པ། དག་ཞེས་པ་ནི་ཚིག་གི་འདོན་སྟངས་དག་མོ་ཡིན་པ། མྱུར་ཞེས་པ་མིང་ཚིག་དག་ཁ་ལ་བྱང་བར་བྱས་ནས་ཀློག་ཐུབ་པར་བྱ་བའོ། །སློབ་བུ་དག་གིས་གསལ་དག་མྱུར་གསུམ་གྱི་སྒོ་ནས་སློབ་ཚན་ཞིག་ཀློག་ཤེས་ན་དེ་ནི་རྣ་བར་སྙན་ཞིང་ཡིད་དབང་འཕྲོག་པའི་གྱེར་འདོན་བདུད་རྩི་དང་ཁྱད་མེད། སློབ་ཆུང་སློབ་མའི་ཀློག་གི་ནུས་པ་ཇི་ལྟར་འཕེལ་ཞེ་ན།

༡ སློབ་ཆུང་ལོ་རིམ་དང་པོ་ནས་གསུམ་པའི་བར་ལ་གཙོ་བོ་མིང་ཚིག་གི་ཕྲལ་ཀློག་ཡིན་ལ། ཐོག་མར་དགེ་རྒན་གྱིས་མིང་ཚིག་དེ་དག་གི་ཡི་གེའི་གྲུབ་ཚུལ་ཏེ་མིང་གཞི་སྔོན་འཇུག་དང་དབྱངས་དང་མགོ་འདོགས་ཅན་ལ་སོགས་རེ་རེ་བཞིན་དུ་ཕྲལ་ཀློག་ཁྲིད་པ། དེར་སློབ་མའི་ཕྲལ་ཀློག་སྒྲ་དག་མོ་དང་ཡི་གེའི་གྲུབ་ཚུལ་ཀློག་ཤེས་མཁན་དག་ལ་དགེ་རྒན་ཆུང་ཆུང་བྱེད་དུ་བཅུག་ནས་སློབ་སྦྱོང་གི་སྤྲོ་བ་སློང་བ་ཡང་གལ་ཆེའོ། །ཉིན་རེའི་སློབ་ཁྲིད་སྐབས་ཀྱི་ཤེས་རིག་རྙིང་བ་བསྐྱར་སྦྱོང་ནི་སློབ་ཚན་སྔོན་མའི་ཐ་སྙད་གསར་བ་དག་ཡི་གེའི་གྲུབ་ཚུལ་གྱི་སྒོ་ནས་ཕྲལ་ཀློག་བྱ་རྒྱུ་དེ་ཡིན། འདི་ལྟར་བྱས་ན་སློབ་མ་མང་ཤས་ཤིག་གི་ཀློག་འདོན་གྱི་ཆུ་ཚད་དེ་ཉིན་རེ་བཞིན་ཡར་རྒྱས་ཡོང་སྲིད།

༢ ལོ་རིམ་མཐོན་པོ་ལ་མཚོན་ན། ཕྲལ་ཀློག་གི་རྨང་གཞི་བཟང་པོ་མངའ་བའི་སྟེང་གཙོ་བོ་སྦྱོར་ཀློག་གི་ཐད་ལ་འབད་དགོས། སློབ་ཚན་གྱི་ཚིག་གི་གཅོད་མཚམས་འགྲིག་ལ་སྒྲ་དག་པོའི་སྒོ་ནས་སྦྱོར་ཀློག་ཐུབ་པ། དགེ་རྒན་གྱིས་ནག་པང་ངོས་སུ་སློབ་ཚན་གྱི་ཁ་བྱང་འབྲི་དུས་སློབ་མ་ཚོས་རང་འགུལ་གྱིས་ཡི་གེའི་གྲུབ་ཚུལ་སྒོ་ནས་ཁ་བྱང་དེ་ཀློག་པ། དེ་ནས་སློབ་ཚན་དེའི་ནང་གི་ཐ་སྙད་གསར་པ་ཡང་ཡི་གེའི་གྲུབ་ཚུལ་ལྟར་ཡང་དག་པར་ཀློག་ནུས་པ། དགེ་རྒན་གྱིས་སློབ་ཚན་གྱི་སྦྱོར་ཀློག་སྔར་བཞིན་རྒྱུན་བསྐྱངས་ནས་ཁྲིད་དགོས་པ་མ་ཟད། སློབ་སྔོན་གྱི་གྲ་སྒྲིག་ལ་བྱིས་པའི་ཀློག་ཡིག་དང་སློབ་མའི་བསླབ་བྱ་སོགས་སློབ་མའི་མི་གཞི་དང་འབྲེལ་ཡོད་ཀྱི་དཔེ་ཆ་ཀློག་ཏུ་བཅུག་ནས་ཀློག་གི་ནུས་པ་སྐྱེད་སྲིང་བྱ་དགོས།

གཉིས། བྲིས་ལ་གཙོ་བོར་འཛིན་དགོས།

སྤྱིར་ལྷ་ས་སོགས་སུ་ལོ་རིམ་དང་པོ་ནས་བཟུང་དབུ་མེད་འབྲི་ཤེས་པ་དང་ཡིག་གཟུགས་སྦྱོང་བར་དོ་སྣང་བྱེད་ཀྱང་། ས་ཆ་འདི་ཕྱོགས་ན་དེ་འདྲ་ཞིག་མིན། དགེ་རྒན་གང་མང་ཞིག་གིས་དབུ་ཅན་གྱི་ཁམ་རིས་དང་དེའི་མིང་ལ་དོ་སྣང་བྱེད་བཞིན་མེད་པ་མ་ཟད། ཐ་ན་དེའི་ཐད་ཀྱི་གོམས་གཤིས་སོགས་ཉམས་སོང་བ་འདྲ། སློབ་མ་ཆུང་ཆུང་འདི་དག་གིས་ཡི་གེ་ཇི་ལྟར་འབྲི་དགོས་པ་གཏན་ནས་ཤེས་མེད་པའི་སྔོན་དུ། དགེ་རྒན་གྱིས་མིག་དཔེ་ཡག་པོ་བསྟན་ནས་དབུ་ཅན་གྱི་ཁམ་རིས་དང་དེའི་མིང་དག་ལེགས་པོར་ཁྲིད་པ་གལ་འགངས་ཆེ། བྲིས་ལ་ཡང་དག་སྙོམས་མྱུར་གསུམ་འཛོམ་དགོས། བྲིས་དག་མོ་སྟེ་ཡིག་ནོར་ཉུང་བ། སྙོམས་པ་སྟེ་ཡིག་འབྲུ་ལ་ཆེ་ཆུང་མེད་པ། མྱུར་བ་སྟེ་ཟིན་བྲིས་སོགས་མྱུར་བར་འགོད་ནུས་པ། དེ་ལྟ་བུའི་བྲིས་རྩལ་ཡོངས་སུ་འཛོམས་པར་ཆུང་དུས་ནས་འབད་པ་བྱེད་རྒྱུ་གལ། ལོ་རིམ་དང་པོའི་སློབ་མ་ནི་བྲིས་ཀྱི་རྨང་གཞི་བཟང་པོ་འཇོག་པའི་དུས་སྐབས་ཡག་ཤོས་དེ་རེད་སྙམ། དེ་བས་དགེ་རྒན་གྱིས་ཐོག་མར་ཀ་ཁ་ནས་མགོ་བརྩམས་ཏེ་གསལ་བྱེད་རེ་རེའི་སྨྱུག་རིམ་དང་དེའི་མིང་ལ་སོགས། གཟབ་ནན་གྱིས་ཁྲིད་ནས་སློབ་མའི་རྒྱུད་དུ་ངེས་རྒྱུ་ཧ་ཅང་གལ་ཆེའོ། །ལོ་རིམ་དང་པོ་ནས་དབུ་ཅན་གྱི་ཁམ་རིས་དང་དེའི་མིང་སོགས་ལ་རྨང་གཞི་བརྟན་པོ་འཇོག་ཚར་རྗེས། ལོ་རིམ་རེ་རེར་ཡིག་གཟུགས་གི་འགྱུར་བ་དེ་སྔོན་གྱི་རྨང་གཞི་དང་ཆུ་ཚད་ལ་བསྡུར་ནས་ཡང་བསྐྱར་ནོར་བཅོས་དང་མཛུབ་སྟོན་གནང་བ་སོགས་བྱེད་དགོས་སོ།།

གསུམ།  འཛིན་སྐྱོར་གྱི་གལ་ཆེའི་རང་བཞིན།

ཤེས་བྱ་མང་པོ་གསོག་ཐུབ་མིན་དེ་ནི་བློ་ལ་བྱང་བར་བྱེད་ཐུབ་མིན་ལ་རག་ལས་ཏེ། དཔེ་ཀློག་དང་བློར་འཛིན་ནི་སློབ་མའི་ཤེས་བྱ་གསོག་པ་དང་ཡོན་ཚད་མཐོར་འདེགས་སུ་གཏོང་བའི་ཐབས་ལམ་གལ་ཆེན་ཞིག་ཡིན། དཔེར་ན་སྔོན་གྱི་རྣམ་ཐར་དང་གསུང་རབ། ལོ་རྒྱུས་དང་སྙན་རྩོམ་སོགས་ངེས་པར་དུ་ཡང་ཡང་བཀླགས་ནས་བློ་ལ་ངེས་ཅི་ཐུབ་བྱེད་དགོས། འདི་ལྟར་ན་ད་གཟོད་ཤེས་བྱའི་སྒྲིག་གཞི་ཆགས་ཐུབ་པ་དང་བསམ་བློའི་ཆུ་ཚད་ཇེ་མཐོ་དང་། བོད་ཡིག་གི་རྨང་གཞི་བརྟན་པོར་འཇོག་ཐུབ། ཉེ་བའི་དུས་ལ་བུ་མོ་ཞིག་གིས་གསོ་རིག་རྒྱུད་བཞི་ཆ་ཚང་བློ་སྐྱོར་བྱས་པ་ལྟ་བུ་རེད། རྒྱ་ཡིག་སོགས་ལ་མཚོན་ན་ཡང་སུང་གི་སྙན་ཚིག་ལྟ་བུ་སློབ་མས་ངེས་པར་བློར་སྐྱོར་བྱེད་དགོས་པས་འཆར་གཞིའི་ནང་བཞག་འདུག དེ་བས་ནམ་རྒྱུན་སློབ་མ་ཚོར་བློར་སྐྱོར་གྱི་ལས་བྱ་བཀོད་སྒྲིག་བྱེད་དགོས་པ་མ་ཟད། ནང་དོན་ཡང་གསལ་པོར་རྟོགས་ནས་བློར་བྱང་ཐུབ་ན་དེ་བས་ཀྱང་མཁོ་གལ་ཆེ། ངེད་སློབ་གྲྭའི་བོད་ཡིག་དགེ་རྒན་རྣམ་པས་སློབ་གཙོའི་རྒྱབ་སྐྱོར་འོག་ཏུ་བོད་ཡིག་བསླབ་དེབ་ལས་གཞན་བརྡ་སྤྲོད་རིག་པའི་སྒོ་འབྱེད་དང་།སློབ་མའི་བསླབ་བྱ། བྱིས་པའི་ཀློག་ཡིག་བཅས་ཀྱི་དཔེ་དེབ་ཉོས་ནས་སློབ་བུ་ཚོར་བློར་འཛིན་དུ་འཇུག་པའི་འགོ་བརྩམས། ལོ་རིམ་སོ་སོའི་སློབ་མའི་བོད་ཡིག་གི་ཆུ་ཚད་དང་བསྟུན་ནས་བློར་འཛིན་ཤེས་བྱ་བཀོད་སྒྲིག་བྱས་པ་དང་། ནམ་རྒྱུན་བོད་ཡིག་ཚོགས་ཐུན་གྱི་སྐབས་སུ་དགེ་རྒན་གྱིས་སློབ་མར་སྦྱོར་ཀློག་ཁྲིད་ནས་ཀློག་ཤེས་པར་བྱེད་ལ། གུང་གསེང་སྐབས་སུ་བློར་འཛིན་དགོས་པའི་རེ་འདུན་བཏོན་ཏེ་སློབ་འགོ་ཚུགས་ཐེངས་རེ་རེར་སློབ་བུ་ཚོས་བློ་རྒྱུགས་སྤྲད་པར་བོད་ཡིག་དགེ་རྒན་རྣམས་ཀྱིས་ནན་ཏན་སྒོས་ལྟ་ཞིབ་བྱེད་པ་ཡིན། བཟང་པོར་བཟང་བསྟོད་དང་ངན་པར་ཆད་པ་ཞེས་པ་ལྟར་བློར་བཟུང་ཐུབ་མཁན་དང་ཡར་ཐོན་ཡོད་མཁན་དག་ལ་སློབ་སྦྱོང་གི་ཡོ་བྱད་སོགས་བྱ་དགའ་སྟེར་བཞིན་ཡོད།

བཞི་བ།  དཔེ་ཀློག་གང་མང་བྱེད་པ་གལ་ཆེ།

ཉི་ཧོང་སོགས་སུ་ལོ་བཞི་ལྔའི་སྟེང་ནས་བཟུང་དཔེ་ཀློག་གི་མགོ་རྩོམ་པ་རེད། ཡ་ཧུ་ད་པའི་དཔེ་ཀློག་ནི་འཛམ་གླིང་གི་རྩེ་གྲས་རེད། འོ་ན་ང་ཚོའི་སློབ་མ་རྣམས་ནི་རང་གི་ལག་ལ་བབ་པའི་སྐད་ཡིག་སློབ་དེབ་དེའང་ཡག་པོ་ཞིག་ཀློག་ཐུབ་གྱིན་མེད་ལ། གཞན་རྩོམ་རིག་དང་སྒྲུང་གཏམ་སོགས་ཀྱི་དཔེ་ཆ་ཀློག་རྒྱུ་ནི་ཡིད་ལ་དྲན་ཡང་མ་མྱོང་བ་འདྲ། འོ་ན་ན་ཆུང་སློབ་མ་འདི་དག་ལ་དཔེ་ཀློག་ལ་ཇི་ལྟར་གཞོལ་བ་དང་། དཔེ་ཀློག་བྱེད་རྒྱུའི་མོས་པ་ཇི་ལྟར་སྐྱེད་སྲིངས་བྱ་དགོས་ཞེ་ན།

༡ ཐོག་མར། སློབ་བུ་དག་གི་ཕ་མ་དང་དགེ་རྒན་ནི་ངེས་པར་དུ་སློབ་སྦྱོང་ལ་དགའ་བ་དང་། རྒྱུན་པར་འཚོ་བའི་ཁྲོད་དཔེ་ཀློག་ལ་དགའ་ཞིང་སློབ་ཕྲུག་གི་མདུན་དུ་མིག་དཔེ་བཟང་པོ་སྟོན་ཐུབ་པ། ཡང་ན་སློབ་མར་རྒྱབ་སྐྱོར་དང་སྐུལ་སློང་བྱེད་དགོས། འདི་ལྟར་བྱས་ན་སློབ་བུ་དག་ཀྱང་དཔེ་ཀློག་ལ་དགའ་ཞེན་དང་མོས་པ་ཡོད་སྲིད་དོ།།

༢ ན་ཆུང་བྱིས་པ་དག་ནི་དཔེ་ཀློག་གི་ལམ་བུར་གསར་དུ་ཞུགས་དགོས་པས་དེའི་ཡོན་ཏན་དང་ཕན་ནུས་སོགས་ཤེས་ཀྱིན་མེད། དགེ་རྒན་གྱིས་ངེས་པར་དུ་དཔེ་ཀློག་གི་དགོས་པ་དང་དོན་སྙིང་སོགས་གསལ་བོར་བཤད་ནས་སློབ་མའི་ཡིད་ལ་བག་ཆགས་ཟབ་མོ་ཞིག་འཇོག་དགོས།

༣ དགེ་རྒན་གྱིས་སློབ་མའི་ཆུ་ཚད་དང་ལོ་རིམ་ལ་གཞིགས་ནས་དཔེ་ཆ་ཉོས་སྤྲོད་བྱེད་པ། སློབ་མས་དཔེ་ཀློག་ལ་འཇུག་རྗེས། དགེ་རྒན་གྱིས་དཔེ་ཀློག་བྱ་འགུལ་སོགས་སྤེལ་བ། སྲོལ་རྒྱུན་རིག་གནས་ཀྱི་གནའ་གཏམ་དང་གླུ་ཤགས། བྱིས་སྒྲུང་། གཏམ་དཔེ་སོགས་ངག་ཐོག་ནས་བློར་སྐྱོར་བ། རྒྱུན་ཤེས་གསར་བ་དང་ཤེས་བྱ་གསར་བའི་སྐོར་གྱི་འགྲན་སྡུར་བྱ་འགུལ་སྤེལ་བ། འགྲན་བསྡུར་བྱས་རྗེས་སྐུལ་སློང་གི་ཚུལ་དུ་བྱ་དགའ་འབུལ་བ་སོགས་བྱས་ན་ཕན་ནུས་ཆེན་པོ་ལྡན་ནོ།།

    དེ་ནས་དགེ་རྒན་གྱིས་རྒྱུན་དུ་འཚོ་བའི་ཁྲོད་དང་། སློབ་ཁྲིད་ཀྱི་བར་གསེང་སོགས་ཞར་ཞོར་དུ་སློབ་མ་ཚོ་རང་གི་གྲོགས་པོར་བརྩིས་ནས་དཔེ་ཀློག་གིས་རང་ཉིད་ལ་སྦྱིན་པའི་ཤེས་བྱ་དང་དགེ་མཚན་སོགས་བཤད་དགོས་ཤིང་། སློབ་མར་སློབ་ཕྱིའི་དཔེ་དེབ་ཀློག་པའི་སྐུལ་འདེད་གཏོང་དགོས། དགེ་རྒན་གྱིས་རང་གིས་བྲིས་པའི་དཔེ་ཀློག་ཟིན་བྲིས་དང་མྱོང་ཚོར་སོགས་སློབ་མར་ལྟ་རུ་བཅུག་ནས། རྒྱུན་པར་དཔེ་ཀློག་ཟིན་བྲིས་འགོད་པའི་གོམས་གཤིས་བཟང་པོ་ཆགས་སུ་འཇུག་དགོས། དཔེ་ཀློག་ཟིན་བྲིས་ནི་ཆུ་ཐིགས་བསགས་ནས་རྒྱ་མཚོ་གྲུབ་པ་ལྟ་བུ་ཤེས་རིག་གི་བང་མཛོད་གང་བ་ཡིན་པ་བཤད་དགོས།

ལྔ་བ། ཕ་སྐད་ཀྱི་འཕེལ་ཕྱོགས་དང་དོ་སྣང་།

མི་རིགས་གང་ཞིག་གི་མི་ཡིན་རུང་ཚང་མར་མི་རིགས་རང་གི་རིག་གནས་ཀྱི་ཁོངས་ནས་རིན་ཐང་གི་འདུ་ཤེས་དང་ལྡན་པའི་བྱེད་པོར་གྱུར་ཅིང་། མིའི་རིག་གནས་ཀྱི་ཆ་ནི་མིའི་ངོ་བོ་ལས་མངོན་དགོས། མི་ཞིག་རིག་གནས་དང་བྲལ་ཚེ། དེ་ནི་གདོད་མའི་རང་བྱུང་གི་དངོས་པོ་ཞིག་ཏུ་གྱུར་ཏེ་མིའི་ངོ་བོ་དང་ཡང་བྲལ། མི་ལ་རིན་ཐང་ལྡན་པ་དང་རིན་ཐང་མངོན་འགྱུར་ཡོང་བ་ནི་རིག་གནས་ཀྱི་འདུ་ཤེས་སྐྱེས་པ་དང་། འདུ་ཤེས་གསར་འཛུགས་དང་འདུ་ཤེས་ཇེ་བཟང་དུ་བཏང་ནས། ལག་ལེན་དངོས་ཀྱི་ཁྲོད་རིན་ཐང་གི་རིག་ལམ་ལ་བརྟེན་ནས་ལེགས་ཉེས་ཤན་འབྱེད་དང་བླང་དོར་གྱི་ནུས་པ་ཐོན་པ་དེ་ཡིན་ཞེས་པ་ལྟར། མི་རིགས་ཤིག་ལ་མཚོན་ན། རང་གི་ཕ་སྐད་གཙང་མ་ཞིག་བཤད་རྒྱུ་དང་རིག་གནས་ཤེས་རྒྱུ་ནི་དུས་རབས་ཀྱི་དགོས་མཁོ་དང་འཚམ་ཞིང་དུས་མཐུན་གྱི་ཤེས་ལྡན་མི་སྣ་སྐྱེད་སྲིང་བྱེད་པའི་མ་མ་ལྟ་བུ་ཡིན་ཏེ། ཕ་སྐད་ནི་མི་རིགས་འདིའི་ཚེ་སྲོག་ཡིན་ལ། སློབ་བུ་ཚོར་རང་གི་བླ་སྲོག་ལ་དོ་སྣང་དང་དགའ་ཞེན་མེད་ན།མ་འོངས་པར་མུན་པའི་ལམ་དེ་ཇི་ལྟར་སེལ། དེ་བས་ཕ་སྐད་མ་ཡིག་སྦྱོང་བར་འབད་པ་བྱས་ནས་ཕ་སྐད་མ་ཡིག་གི་བདག་པོར་གྱུར་ན་རང་གི་མ་འོངས་མདུན་ལམ་འོད་སྟོང་ལྡན་ལ་རང་མི་རིགས་ཀྱི་བཅུ་ཕྲག་རིག་གནས་དེ་ཉིད་མ་ཉམས་གོང་འཕེལ་གཏོང་ཐུབ་ངེས་ཡིན། སློབ་བུ་ཚོ་ཕ་སྐད་གཙང་མ་བཤད་རྒྱུ་ལ་དགའ་ཞེན་ཡོད་མེད་དེ་ཐོག་མར་དགེ་རྒན་ལ་རག་ལས་ཡོད། དགེ་རྒན་གྱི་ཀུན་སྤྱོད་དང་བྱ་བ་སྒྲུབ་སྟངས་ཡོད་ཚད་ཀྱིས་སློབ་མར་ཤུགས་རྐྱེན་ཆེན་པོ་ཐེབས་བཞིན་ཡོད། དེ་ནས་དགེ་རྒན་གྱིས་སློབ་ཁྲིད་བྱེད་སྐབས་སམ་རྒྱུན་པར་སློབ་མ་རྣམས་དང་ཁ་བརྡ་གླེང་སྐབས་ངེས་པར་དུ་ཕ་སྐད་གཙང་མ་བཤད་དགོས་པ་མ་ཚད། ཕ་སྐད་ལ་དགའ་ཞེན་དང་དོ་སྣང་བྱེད་པའི་གོམས་གཤིས་ཆགས་སུ་འཇུག་དགོས་པ་རེད། པཎ་ཆེན་རིན་པོ་ཆེས་གསུངས་པ་ལྟར་“སྐད་རིགས་སྣ་ཚོགས་ཤེས་ན་བཟང་མོད་ཀྱང་། རང་གི་ཕ་སྐད་བརྗེད་ན་ངོ་ཚ་ཡིན་"ཞེས་པའི་རིན་ཐང་དེ་སློབ་མར་ཤེས་རུ་བཅུག་ནས། རྒྱུན་པར་ཕ་སྐད་གཙང་མའི་སྒོ་ནས་སློབ་གྲོགས་བར་ལ་གླེང་མོ་མཛད་དགོས། དེ་ནས་བོད་ཡིག་དགེ་རྒན་རྣམས་ཀྱིས་རྩ་འཛུགས་བྱས་ཏེ་ཕ་སྐད་ཕྱོགས་ཀྱི་བྱ་འགུལ་སྤེལ་བ་དང་། འཛིན་གྲྭ་སོ་སོའི་ནང་གི་རྒྱུན་པར་ཕ་སྐད་བཤད་མཁན་དག་ལ་གཟེངས་རྟགས་འབུལ་རྒྱུ། ཕ་སྐད་ལ་དོ་ཁུར་མི་བྱེད་པའི་སློབ་བུ་དག་ལ་ཆད་པ་གཅོད་པ་དང་སློབ་གསོ་གཏོང་རྒྱུ་དེ་གལ་ལོ།།

དྲུག་པ། དགེ་རྒན་རང་ཉིད་ཀྱི་འབད་ཕྱོགས་སྐོར།

སྤྱིར་དགེ་རྒན་གྱི་ཆུ་ཚད་ཞན་པ་དེ་སློབ་གསོ་འཕེལ་བའི་གེགས་ཆེན་པོ་ཡིན་ལ། བོད་ཡིག་དགེ་རྒན་གྱི་ཆུ་ཚད་དང་སློབ་མའི་སྐད་ཡིག་ཆུ་ཚད་དོ་མི་མཉམ་པ་གཉིས་ལ་འབྲེལ་བ་དམ་པོ་ཡོད། སློབ་མའི་ཡིད་ལ་དགེ་རྒན་ནི་མིག་དཔེ་བཟང་པོ་སྟོན་མཁན་དང་སྣེ་ཁྲིད་འཚམ་པོ་བྱེད་མཁན་ཡིན་པས། དགེ་རྒན་གྱིས་གནད་དོན་དག་འཚོལ་བསྡུ་བྱས་ནས་དེ་དག་ཇི་ལྟར་འཇོམས་ཤིང་ལེགས་སྒྱུར་ཇི་འདྲ་བྱ་དགོས་པ། སློབ་མའི་བློ་དང་མཐུན་པའི་སློབ་ཁྲིད་བྱེད་རྒྱུ་གལ་ཆེན་ནང་གི་དོན་ཆེན་རེད། དེས་ན་དགེ་རྒན་གྱིས་རང་ཉིད་ཐད་ལ་མཐོར་འདེགས་ཇི་ལྟར་བྱ་ཞེ་ན། གཅིག་ནས་རང་ཉིད་ཀྱི་ཤེས་བྱའི་ཐད་ལ་འབད་འབུངས་བསྐྱེད་དེ་ཡོན་ཚད་ཇེ་མཐོར་གཏོང་རྒྱུ་གལ། དགེ་རྒན་ཞིག་ལ་ངེས་པར་དུ་རིག་གནས་ཆུ་ཚད་མཐོན་པོ་ཞིག་ལྡན་དགོས་ལ། ནམ་རྒྱུན་རང་ཉིད་ཀྱི་རྒྱུད་ཀྱི་ཤེས་བྱ་ཕུན་སུམ་ཇེ་ཚོགས་སུ་གཏོང་དགོས། དེ་ལྟར་ན་ཤེས་ཡོན་གཉིས་ལྡན་གྱི་སློབ་མ་ཞིག་གསོ་སྐྱོང་བྱེད་ཐུབ། དཔེ་ཀློག་མང་པོ་བྱས་ནས་མྱོང་ཚོར་དང་ཟིན་བྲིས་བཀོད་པ། དགེ་རྒན་གང་མང་གི་སློབ་ཁྲིད་ལ་ཉན་ནས་སློབ་ཁྲིད་ཐད་ཀྱི་ཉམས་མྱོང་དང་ཁྲིད་ཐབས་སོགས་ཕྱོགས་བསྡོམས་བྱེད་པ། མི་གཞི་སློབ་གསོའི་སྐོར་ཀྱི་དཔེ་ཆ་ཀློག་རྒྱུ་དང་བགྲོ་གླེང་ལ་ཞུགས་ནས་དགེ་རྒན་ཚད་ལྡན་ཞིག་གི་ཏུ་འགྱུར་བར་འབད་དགོས། ལྷག་བསམ་ཟོལ་མེད་ཀྱི་སྒོ་ནས་སློབ་ཁྲིད་བྱེད་ཐབས་དང་སྐད་ཡིག་གི་འཕེལ་ཕྱོགས་ལ་སློབ་སྦྱོང་བྱེད་པ། དགེ་རྒན་ཞེས་པ་འདི་ནི་རིག་གནས་ཁྲིད་མཁན་ཙམ་ཞིག་གཏན་ནས་མིན་ཏེ། དགེ་རྒན་ནི་འཁྲབ་སྟོན་པ་ཆེན་མོ་ཞིག་ཡིན་ལ། དགེ་རྒན་ནི་སློབ་མའི་ཤེས་རིག་ཁྲོད་ཀྱི་མུན་པ་སེལ་མཁན་དེ་ཡིན། དགེ་རྒན་ནི་སློབ་མ་སྲོག་ལྟར་གཅེས་པའི་ཕ་མ་ཡང་ཡིན། དགེ་རྒན་ནི་སློབ་མའི་སྙིང་གཏམ་བརྗོད་སའི་གྲོགས་པོ་ཡང་ཡིན། དགེ་རྒན་ནི་སློབ་མའི་ཀུན་སྤྱོད་བཟང་པོ་སྐྱེད་སྲིང་བྱེད་མཁན་ཡང་ཡིན་ལ། དགེ་རྒན་ནི་སློབ་ཚན་ཁྲོད་ཀྱི་མི་སྣདང་སྲོག་ཆགས་ལ་སོགས་ཀྱི་འཁྲབ་སྟོན་བྱེད་མཁན་དེ་ཡང་ཡིན་ལ། དགེ་རྒན་ནི་སློབ་མའི་སེམས་ཆུང་མ་བྱས་ནས་ས་ལ་འགྱེལ་དུས་ཡར་ལངས་བྱེད་ཀྱི་ལག་རྟེན་ཡང་ཡིན། དགེ་རྒན་ནི་སློབ་མའི་སེམས་ཀྱི་མཁས་ཅན་ཡིན་པས། ཕྱོགས་ཡོངས་ནས་འབད་པ་བྱས་ནས་རང་གི་ནུས་པ་ཇེ་མཐོར་གཏོང་དགོས་ཤིང་མིང་དོན་ཀུན་མཚུངས་ཀྱི་མི་ཞིག་ཀྱང་བྱ་དགོས་སོ།།

མཇུག་གི་གཏམ།

བོད་ཡིག་སློབ་སྐབས་ཡི་གེ་ལ་བསྙེན་བཀུར་བྱེད་ཐབས་གསུམ་ཡོད་དེ། སྒྲ་དག་པར་ཀློག་པ། གཟུགས་ཡག་པར་འབྲི་བ། དོན་ཐིག་པོར་བླངས་ནས་བསྙེན་བཀུར་དང་བསྟི་སྟངས་བྱ་བ་བཅས་ཡིན། སྔོན་བྱོན་གྱི་མཁས་དབང་དག་ལས་ཉེ་རབས་ཀྱི་མཁས་པ་ཨ་ལགས་ཚེ་ཏན་ཞབས་དྲུང་ཚང་། དམུ་དགེ་བསམ་གཏན་ཚང་། དུང་དཀར་ཚང་སོགས་ཀྱང་རྨང་གཞི་འདི་འདྲ་ལ་བརྟེན་ནས་བསླབ་པའི་གནས་ལ་ཞུགས་པ་མ་གཏོགས། ཚིག་གྲོགས་བཙལ། ཁ་སྐོང་བྲིས་པ་དང་ཚིག་བསྒྲིགས་པ་ཙམ་གྱིས་མཁས་པར་འགྱུར་པ་ག་ལ་ཡིན། འདི་དག་ནི་གཞན་གྱི་སྐད་ཡིག་སློབ་སྟངས་ལ་ལད་མོ་བྱེད་དྲགས་པས་རང་གི་ཁྱད་ཆོས་བོར་བ་རེད་སྙམ། དེའི་ཕྱིར་ང་ཚོས་ཅི་ནས་ཀྱང་རང་ལ་འཚམ་ཤིང་འོས་པའི་སློབ་ཁྲིད་བྱེད་སྟངས་ཤིག་ཆགས་པར་འབད་རིགས་སོ།།

 

ཟུར་ལྟའི་ཡིག་ཆ།

1.  པཎ་ཆེན་རིན་པོ་ཆེའི་ཞལ་གདམས།

2.  དཔལ་ལྡན་ཉི་མ། «རིག་པའི་དཔལ་ཡོན་གྱི་དོགས་སེལ།» མི་རིགས་དཔེ་སྐྲུན་ཁང་། ༢༠༡༤ ལོར་དཔར།

3.  巴登尼玛，刘冲．《尊严论》．北京：人民出版社，

4.  刘克兰：《教学论》，西南师范大学出版社，1988年。

5.  李秉德主编：《教育科学研究方法》，人民教育出版社，1991年。

6.  李定仁主编：《教学思想发展史略一历史、现状与发展趋势》，青海人民出版社，1993年。

7.  邵瑞珍、皮连生：《教育心理学》，上海教育出版社，1988 年。

8.  鱼洁主编：《教育社会学》，人民教育出版社，1990年。

9.  多杰才旦：《西藏的教育》，中国藏学出版社，1991年。

10.  རང་གི་སློབ་ཁྲིད་ཉམས་མྱོང་། 

ཡོངས་ཁུངས། གངས་རྒྱན་རྩོམ་སྟེགས།