ཆེ་མཆོག་ཆེ་ཚང་ཆེ་བརྗོད།

(འབྲི་གུང་ཆེ་ཚང་༸སྐུ་འཕྲེང་བདུན་པའི་འཁྲུངས་སྐར་ལྷ་གསོལ།)

རྩོམ་པ་པོ། འབུམ་རམས་པ་དགེ་བཤེས་ཆོས་འཁོར་ཚང་རིན་པོ་ཆེ།

འབྲི་གུང་སྐྱེས་ཆེན། །

གུང་གྲལ་བསྒྲིགས་ཚད། །

སྐྱབས་ཀྱི་འོག་ཏུ། །

མགོན་དེས་ཟུངས་ཤིག ། 

ཆེ་ཆེའི་ཡོན་ཏན། །

ཚང་ལ་མ་ནོར། །

ཆེ་ལོང་ཙམ་ཞིག །

ཚང་ཚད་བསྟར་རོ། །

ཆེ་བའི་སྔོན་བསགས། །

ཚང་པོར་སྨིན་འབྲས། །

ཆེ་རྒྱུད་བཟང་པོའི། །

ཚང་དུ་སྐུ་བལྟམས། །

ཆེ་དགུའི་རྟགས་མཚན། །

ཚང་བར་འཛོམས་པས། །

ཆེ་འདོན་མངའ་གསོལ། །

ཚང་མ་དཔལ་འབར། །

དེ་ལྟར་ཤིས་ཀྱང་། །

དུས་འགྱུར་བཙན་པོས། །

མཆོག་སྐུའི་འཚོ་གཞེས། །

མགོ་བསྒྱུར་རྟིང་བསློགས། །

ཚེ་རབས་གོང་མའི། །

སྦྱང་འཕྲོ་ལུས་སམ། །

བཟོད་སྒོམ་སྟོབས་ལ། །

ཉམས་ཚོད་བགམས་སམ། །

གཞོན་ན་ཕྲ་དང་། །

དར་བབ་ལང་ཚོ། །

ངལ་རྩོལ་ལས་ཀྱིས། །

འཕྲོག་ཅིང་བཅོམས་ཐལ། །

ཐུགས་ཞེའི་གཏིང་དུ། །

བརྣགས་པའི་དོན་ཆེན། །

སྒྲུབ་པའི་ཉི་གཞོན། །

ཤར་བར་མ་འཕྱིས། །

སོ་གཅིག་བཞེས་འཕྲལ། །

ལྷོ་ལམ་བསྙེགས་ཏེ། །

ཧི་མ་ལ་ཡ། །

རྒྱབ་ཀྱིས་བསྐྱུར་སོང་། །

གསན་བསམ་ངོ་ཐོག །

དེ་ནས་བརྩམས་ཤིང་། །

མཛད་པའི་འཕྲིན་ལས། །

དོན་ཐོག་རྒྱས་ཤག །

བཤད་དང་སྒྲུབ་པའི། །

སྡེ་ཚོགས་སྐྱོང་ཚུལ། །

སྤྱི་དང་མཚུངས་པའི། །

བསྟན་པའི་མཆོད་སྡོང་། །

འདྲ་འདྲའི་ནང་ནས། །

མ་འདྲར་འཕགས་པ། །

ཕྲ་རུ་བཏབ་པའི། །

གཡུ་དང་བྱུ་རུ། །

བདོག་དགུས་བཞེངས་པའི། །

“སྲོང་བཙན་དཔེ་མཛོད།” །

བྱུ་རུ་དམར་པོའི། །

ཕྲ་རྒྱན་ཚོམ་བུ། །

སྔར་མེད་དེབ་ཐེར། །

«བཙན་པོའི་རྒྱལ་རབས།» །

ཁུག་རིན་བྲལ་བའི། །

གཡུ་མོ་དྲུག་དཀར། །

ཕྲན་ཆུང་བདག་ལའང་། །

ཐུགས་བརྩེ་ཆེན་པོས། །

གམ་བཅར་ཡོང་བར། །

ཞལ་འཕྲིན་བསྩལ་མྱོང་། །

ལོ་གསར་གནང་ཆེན། །

འགན་ཁུར་ལྗིད་རྐྱེན། །

སྐབས་དེའི་བཀའ་མངགས། །

མ་གྲུབ་འགྱོད་ཀྱིས། །

འོན་ཀྱང་བཞུགས་བྲང། །

ཐེངས་གཉིས་མཇལ་ཡོད། །

གདན་བཞུགས་མེད་པའི། །

སྟབས་དང་ཁེལ་སོང་། །

དེ་རིང་འདི་ནས། །

ཞུ་ལན་བོན་ཡོད། །

གསེར་ཞལ་མཇལ་བའི། །

སྨོན་ཚིག་བསྲིངས་ཡོད། །

དགུང་ཀེག་མེད་པར། །

ལོ་བརྒྱར་བཞུགས་ཞེས། །

དོན་གྱིས་སྨོན་པ། །

ལྔ་པའི་དབྱངས་ཡིན། །

འཁྲུངས་ལྷ་གསོལ་བའི། །

སྐར་ལྟས་བཟང་པོར། །

ལྷ་དར་ཟོལ་གྱིས། །

གསོལ་ལམ་འབུལ་ལོ། །

       ཞེས་འབྲི་གུང་སྐྱབས་མགོན་ཆེ་ཚང་༸སྐུ་འཕྲེང་བདུན་པ་དཀོན་མཆོག་བསྟན་འཛིན་ཀུན་བཟང་འཕྲིན་ལས་ལྷུན་གྲུབ་མཆོག་དགུང་གྲངས་དོན་ལྔར་ཕེབས་པའི་འཁྲུངས་སྐར་ལྷ་གསོལ་ཉིན་ཆེ་བསྟོད་ཆེ་ལོང་ཙམ་ཞིག་གསོལ་བ་འདི་ནི། འབྲི་གུང་བཀའ་བརྒྱུད་དབུས་སྤྱི་ཁྱབ་ལས་ཁང་གི་«གོ་ལའི་གཟི་འོད་»ཅེས་པའི་བསྟོད་རྩོམ་ཕྱོགས་བསྒྲིགས་རྩོམ་སྒྲིག་ཚོགས་ཆུང་གིས་ཡིག་ཐོག་ནས་བསྐུལ་ཞིང་། འོམ་གློ་ཐོར་ཅོག་ཡུལ་གྱི་བླ་མ་དཀོན་མཆོག་དོན་འགྲུབ་མཆོག་དང་། སྒ་པ་ཨ་ཅཱ་རྱ་དཀོན་མཆོག་པད་མ་ལགས་རྣམ་གཉིས་ནས་ཀྱང་ཡིག་ངག་ཉིས་སྦྲགས་ཀྱིས་མངགས་པས། བཅོལ་ངོ་མ་ལྡོག་ཙམ་དུ་དོལ་པོ་འབུམ་རམས་པ་དགེ་བཤེས་ཆོས་འཁོར་ཚང་ཉི་མ་འོད་ཟེར་དུ་འབོད་པས་བགྱིས་ཤིང་། དེ་ཡང་འབྲི་གུང་སྐྱབས་མགོན་གང་ཉིད་«བོད་བཙན་པོའི་རྒྱལ་རབས་»མཛད་པའི་སྐབས་དེར་ཡིག་རྙིང་རྣམས་སུ་བོན་གྱི་བརྡ་ཆད་རྙིང་པ་གང་འཚམ་གཟིགས་སྟབས་བགྲོ་མོལ་སླད་དུ་མཁས་དབང་ཨ་མྱེས་རྨ་ཆེན་བཀྲ་ཤིས་ཚེ་རིང་ལགས་ཀྱི་བརྒྱུད་ནས་གུས་ཆུང་བདག་ལ་ལོ་གསར་གྱི་གུང་གསེང་དང་བསྟུན་ནས་ཟླ་བ་གཅིག་གི་རིང་སྐུ་བཅར་དུ་ལྷོད་དལ་བྱ་རྒྱུ་ཡོད་པར་བྱས་ནས་ཤོག་ཅེས་བཀའ་འཕྲིན་ཞལ་ཆ་བསྩལ་མོད། འོན་ཀྱང་སྐབས་དེར་ཕྲན་ཆུང་སྨན་རིའི་གླིང་དུ་ལོ་གསུམ་རིང་གི་གྲྭ་ཚང་གཉེར་ཆེན་ནམ་ཕྱག་མཛོད་ཀྱི་འགན་འཁུར་བའི་སྟབས་དང་ཁེལ་བས་དུས་ཚོད་ཀྱིས་བཅར་ཐབས་མ་བྱུང་བ་ལགས་ན། ད་ལམ་འདི་ནས་འདི་ཉིད་བཟོད་གསོལ་ཞུ་རྟེན་གྱི་དོད་དུའང་གདེག་པར་བྱའོ།། །། ༢༠༢༠།༠༧།༢༥། ཉིན་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་ནས།

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང་།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-ཆེ་མཆོག་ཆེ་ཚང་ཆེ་བརྗོད།