༸སྐྱབས་རྗེ་གྲུབ་དབང་པད་མ་ནོར་བུའི་ཡང་སྲིད་རིན་པོ་ཆེ་མཆོག་སྐུ་འཁྲུངས་ནས་དགུང་གྲངས་དགུ་རུ་ལོན་པའི་བསྟོད་རྩོམ་སྙན་ངག་ཆེད་བཀོད། སྡེ་ཚན་བཞི་པ།

[༡]

«ཉི་གཞོན་དབང་པོའི་འཁྲུངས་སྐར་བསུ།»

-------› ནུབ་རི་མི་ཕམ་རྣམ་རྒྱལ།

ཡང་སྤྲུལ་ཡིད་བཞིན་ནོར་བུ།།

སཱ་ལའི་ལྗོངས་སུ་ཕེབས་ཏེ།།

འཁྲུངས་པའི་གཏམ་བཟང་ཉིན་མོ།།

གང་དུ་སོང་ཡང་མི་བརྗེད།།

བཅོ་ལྔའི་དུང་ཟླ་དཀར་པོ།།

ཤར་རིའི་རྩེ་ནས་བཞད་པས།།

འགྲོ་ཁམས་མུན་པའི་སྣང་བ།།

བསལ་མཛད་པདྨ་ནོར་བུ།།

བྱ་བྲལ་སངས་རྒྱས་རྡོ་རྗེའི།།

བཀའ་ལུང་ལུང་བསྟན་ཇི་བཞིན།།

འཁྲུལ་མེད་སྙིང་གི་ནོར་བུ།།

ཉི་གཞོན་པདྨ་ནོར་བུ།།

མ་ཧཱ་གུ་རུའི་རང་གཟུགས།།

སངས་རྒྱས་ཀུན་གྱི་སྤྲུལ་པ།།

༸གྲུབ་དབང་པདྨ་ནོར་བུ།།

མི་འགྱུར་གར་དབང་ཟིལ་གནོན།།

ལྟ་དགོངས་བཻ་རོ་ཙཱ་ན།།

སྤྱོད་པ་ཞི་འཚོ་ཡབ་སྲས།།

སྒོམ་པ་ཟུང་འཇུག་རྣམ་ཐར།།

རྗེས་འཛིན་ཚེ་འབར་གཞོན་ནུ།།

ཀུན་ལས་མཛེས་པའི་བཞིན་རས།།

གསུང་དབྱངས་སྙན་འཇེབས་པིང་ཀ།

འགྲོ་དྲུག་ཡིད་ཀྱི་མུན་སེལ།།

འཁྲུངས་སྐར་ཉིན་མོར་སྤྲོ་འོ།།

གོང་མའི་སློབ་ཚོགས་འབུམ་ཕྲག།

ལྷན་ཅིག་དེ་རིང་དགའ་སྤྲོས།།

རྩེ་གཅིག་གསོལ་འདེབས་སྨོན་པས།།

ཁྱེད་སྐུ་མི་ཤིགས་སྨོན་ནོ།།

[༢]

«ཡང་སྲིད་རིན་པོ་ཆེ་སྐུའི་འཁྲུངས་སྐར་བསུ།»

------› ཆོས་དབྱིངས་རྡོ་རྗེ་བླ་མ།

སྔོན་བྱུང་ལོ་རྒྱུས་ཁྲོད་ནས།།

མཐུན་པ་སྤུན་བཞི་རྟེན་འབྲེལ།།

མི་ཡུལ་ཞི་བདེ་སྦྱིན་མཁན།།

ཡང་སྲིད་བྱོན་པ་དགའ་སོང་།།

སྟོང་གསལ་ཨ་སྔོན་དཀྱིལ་ནས།།

བཅོ་ལྔའི་བསིལ་ཟེར་ཤར་འདྲ།།

ལུས་ངག་ཡིད་གསུམ་གུས་པས།།

ཡང་སྲིད་འཁྲུངས་སྐར་བསུ་འོ།།

འདས་པའི་ལོ་རྒྱུ་ཁྲོད་དུ།།

ཚེ་རིང་རྣམ་དྲུག་ནང་བཞིན།།

ང་ཡི་སྙིང་གི་ནོར་བུ།།

སྐུ་ཚེ་བརྟན་པའི་སྨོན་འདུན།།

ལྷོང་ལྷོང་ལྷོ་ཕྱོགས་སྤྲིན་པ།།

བོད་ཀྱི་ཕྱོགས་ལ་ཆས་པའི།།

ཡིད་འཕྲོག་ཆུ་འཛིན་ལྷ་མོ།།

ང་ཡི་འཕྲིན་ཞིག་ཁྱེར་རོག།

བུ་སློབ་འདུ་པའི་ཚོགས་ལ།།

མྱུར་དུ་ཞལ་མཇལ་གནང་བའི།།

ཡང་སྲིད་བླ་མའི་དྲུང་དུ།།

མ་བརྗེད་འཕྲིན་དེ་བསྐྱལ་རོགས།།

[༣]

«སྐུ་གོང་མའི་མཛད་པ།»

------› སྤྲུལ་སྐུ་པདྨ་ཚེ་མཆོག་རྡོ་རྗེ།

སྤྱི་ལོ་གཅིག་སྟོང་དགུ་བརྒྱ།།

སུམ་ཅུ་སོ་གཉིས་ལོ་ལ།།

གནས་མཆོག་སྤོ་བོའི་ཡུལ་དུ།།

མཚན་དཔེའི་གཟུགས་སྐུ་འབར་སོང་།།

དུས་རབས་བཅུ་དགུའི་ནང་དུ།།

རྒྱ་ཡིས་ནང་ཆོས་བསྣུབས་དུས།།

རྒྱལ་བསྟན་ཕྲག་ཏུ་ཁུར་ནས།།

རྒྱ་གར་ཡུལ་དུ་བྱོན་སོང་།།

གྲོགས་དང་དཔལ་འབྱོར་མེད་ཀྱང་།།

ཐུགས་བསྐྱེད་གནམ་ལས་ཡངས་པ།།

སྙིང་སྟོབས་རི་ལས་ཆེ་བ།།

རྣམ་གླིང་དགོན་འདི་བཞེངས་སོང་།།

ཐུགས་བརྩེ་གཅིག་གི་འོག་ཏུ།།

རིས་མེད་འགྲོ་བ་བསྐྱངས་སོང་།།

སློབ་མའི་འཁོར་ཚོགས་མང་པོ།།

རྒྱ་བལ་འབྲུག་གསུམ་ཁེངས་སོང་།།

འཆད་རྩོད་རྩོམ་པའི་དབྱར་རྔ་།།

གནམ་ས་ཀུན་ལ་གྲགས་སོང་།།

ཐོས་བསམ་སྒོམ་པའི་བྱ་བ།།

ཡར་ངོའི་ཟླ་ལྟར་སྤེལ་སོང་།།

[༤]

«ང་ཡི་བླ་མ།»

------› དུག་ལྕེ་དམར་པོ།

རྗེ་ཉིད་ཞིང་གཞན་གཤེགས་པ།།

ཐུགས་རྗེ་ཆུང་སོང་སེམས་ཀྱང་།།

ཡང་སྤྲུལ་དུང་ཟླ་འཛུམ་དུས།།

ཐུགས་རྗེ་ལྡན་པར་ཤེས་སོང་།།

གདུང་བས་བོད་པ་ཉུང་ཡང་།།

ཐུགས་རྗེ་ཟབ་པ་ཡིན་སོང་།།

གདུལ་བྱ་ལྷག་མ་འདྲེན་པར།།

ཕེབས་པས་ལུས་སེམས་བདེ་སོང་།།

ཁྱེད་སྐུའི་འོད་ཀྱི་ཟེར་ཕྲེང་།།

སེམས་དང་བྲལ་བ་མེད་ཀྱང་།།

འཇམ་པའི་ཕྱག་ཟུང་ཞབས་ཟུང་།།

གཙུག་ཏུ་བཞག་སྐལ་ནམ་རིགས།།

བརྡ་འཕྲིན་དྲྭ་ལམ་གསེང་ནས།།

ཞལ་སྐྱིན་གསལ་ལེར་མཇལ་ཡང་།།

གསེར་ཞལ་འཇལ་བའི་སྐལ་བཟང་།།

སྒུག་གིན་འཁྲུངས་སྐར་བསུས་ཡོད།།

སྙན་འཇེབས་གསུང་གི་བདུད་རྩི།།

རྣ་བའི་དཔྱིད་དུ་སྩོལད་ཅིག།

འགག་མེད་དྲུག་ཅུའི་བདག་ཉིད།།

བྱིན་རླབས་ངག་ལ་འཇུག་མཛོད།།

ཕྱོགས་མེད་མཉམ་ཉིད་ཐུགས་རྗེ།།

མཐའ་དབུས་ངོས་བཟུང་མེད་ཀྱང་།།

མཆོག་འཛིན་ཨ་འཐས་བདག་ལ།།

གདོད་མའི་གཤིས་ངོ་སྤྲོད་རོགས།།

འཕོ་མེད་རྡོ་རྗེའི་སྐུ་ལ།།

གཤེགས་བཞུགས་སྤྲོས་དང་བྲལ་ཡང་།།

རྟེན་འབྲེལ་བརྡ་ཡི་ཆོས་ལ།།

འཁྲུངས་སྐར་བསུས་དང་ལོས་བསུ།།

     

       ཕ་གཅིག་བླ་མའི་སྐུ་ཡི་འཁྲུངས་སྐར་ལ་དགའ་སྐྱོ་ཟུང་དུ་འབྲེལ་གྱིས་ཚོར་བ་དང་ལྷན་དུ་བྲིས།

[༥]

«དྲིན་ཆེན་རྩ་བའི་བླ་མའི་འཁྲུངས་སྐར་བསུ།»

-----› དོལ་པོ་པདྨ་རྒྱལ་མཚན།

མི་ཡུལ་འཛམ་བུ་གླིང་དུ།།

སངས་རྒྱས་མི་རུ་རྫུས་པ།།

བི་མ་མི་ཏྲའི་རྣམ་འཕྲུལ།།

རྩ་བའི་བླ་མ་འཁྲུངས་སོང་།།

གངས་ཅན་རི་བོའི་ཕག་ནས།།

གུ་རུ་པདྨའི་རྒྱལ་ཚབ།།

ལྷ་སྲས་ཟླ་བའི་གཞོན་ནུ།།

པདྨ་ནོར་བུ་འཁྲུངས་སོང་།།

སྐར་ཚོགས་འབུམ་གྱི་གསེང་ནས།།

ཤར་བའི་ཟླ་བ་ཁྱེད་ཉིད།།

སངས་རྒྱས་བྱེ་བའི་གཏོད་ས།།

གདུལ་བྱ་བྱེ་བའི་སྐྱབས་ཡུལ།།

དེ་རིང་དུས་བཟང་འདི་ལ།།

འཛམ་གླིང་ག་ས་ག་ནས།།

གོང་མའི་སློབ་ཚོགས་འབུམ་ཕྲག།

ཁྱེད་ཀྱི་འཁྲུངས་སྐར་བསུ་བཞིན།།

དྲིན་ཆེན་རྩ་བའི་བླ་མ།།

སླར་ཡང་སྲིད་པ་བཟུང་ནས།།

མི་ཡུལ་འདི་རུ་ཕེབས་པའི།།

དེ་རིང་འཁྲུངས་སྐར་བསུ་འོ།།

གསེར་གྱི་ཉི་མའི་འོད་ཟེར།།

འཛམ་གླིང་ཡོངས་ལ་ཁྱབ་ནས།།

ནག་ཕྱོགས་མུན་པའི་གླིང་དེ།།

དཀར་ཕྱོགས་སྐྱོང་བར་མཛོད་ཅིག།

ཡང་སྲིད་རིན་པོ་ཆེ་ཡི།།

སྐུ་སྲོག་བྲག་ལས་སྲ་ཞིང་།།

མཛད་འཕྲིན་ཕ་མཐར་ཁྱབ་པའི།།

སྨོན་ལམ་ཚིག་གསུམ་བཏབ་ཡོད།།

སྔ་དྲོ། ༡༢ཿ༡༥། ༣༡།༡༢།༢༠༢༠།

[༦]

«འཁྲུངས་སྐར་བཀྲ་ཤིས་བདེ་ལེགས།»

------› སངས་རྒྱས་བསྟན་འཛིན་འབྲུག་པ།

ལྷོ་ལྗོངས་མུན་པས་འཐུམ་ཚེ།།

བསིལ་ཟེར་སྒྱུ་སྐར་རྒྱལ་པོ།།

གངས་ཅན་རི་བོའི་རྩེ་ནས།།

རེ་སྨོན་སྟོང་གིས་བསུས་སོང་།།

མི་འགྱུར་དད་པའི་ལམ་ནས།།

བདེ་བ་ཆེན་པོའི་ཞིང་དུ།།

མ་ངེས་གར་སྟབས་འབུམ་གྱིས།།

འདྲེན་བྱེད་དབང་པོ་འཁྲུངས་སོང་།།

མ་རུངས་དགྲ་བོའི་དཔུང་ཚོགས།།

གཞན་ཕན་སྙིང་རྗེ་ཁོ་ནས།།

ཟིལ་གྱིས་གནོན་པར་བྱེད་པའི།།

ཐབས་ཁམས་རྒྱལ་སྲས་འཁྲུངས་སོང་།།

དཔལ་ལྡན་བླ་མའི་ཡང་སྤྲུལ།།

གང་སྐུ་རྡོ་རྗེ་ཇི་བཞིན།།

བསྐལ་བརྒྱར་བཞུགས་པའི་སྨོན་འདུན།།

བེ་ཏའི་ཡུལ་ནས་འབུལ་ལོ།།

སྔ་དྲོ། ༩ཿ༡༦། ༣༡།༡༢།༢༠༢༠།

[༧]

«འཁྲུངས་སྐར་བཀྲ་ཤིས་བདེ་ལེགས།»

------› དོལ་པོ་བསྟན་འཛིན་དབང་འདུས།

༸ཡབ་རྗེ་གྲུབ་དབང་བླ་མའི།།

ཡང་སྲིད་འཁྲུངས་སྐར་ཉིན་མོར།།

མཛའ་གྲོགས་ཕོ་མོ་རྣམས་ལ།།

འཚམས་འདྲི་བཀྲ་ཤིས་བདེ་ལེགས།།

ཞལ་རས་དཀར་གསལ་ཟླ་བ།།

གསེར་ཁྲི་སྟེང་ནས་མཇལ་བྱུང་།།

བདག་ཅག་སློབ་འབངས་ཡོངས་ཀྱི།།

མ་རིག་མུན་པ་བསངས་སོང་།།

འདི་ཕྱི་གཉིས་ཀྱི་སྐྱབས་གནས།།

༸གྲུབ་དབང་པདྨ་ནོར་བུ།།

སླར་ཡང་ཁྱེད་ཀྱི་སྐུ་དངོས།།

མྱུར་དུ་མཇལ་བར་སྨོན་ནོ།།

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།
ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང་།
རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-༸སྐྱབས་རྗེ་གྲུབ་དབང་པད་མ་ནོར་བུའི་ཡང་སྲིད་རིན་པོ་ཆེ་མཆོག་སྐུ་འཁྲུངས་ནས་དགུང་གྲངས་དགུ་རུ་ལོན་པའི་བསྟོད་རྩོམ་སྙན་ངག་ཆེད་བཀོད། སྡེ་ཚན་བཞི་པ།