ཆོས་དབྱིངས་བསྟན་པ། འབོ་དཀར་བཤད་གྲྭ།
ཀ་བ་མེད་པའི་རྡོ་ཁང་གོག་པོ་ན།།
ཁ་ཐབས་སྐྱོ་བའི་མལ་ཆས་ཧྲལ་ཧྲུལ་གསེབ།།
ག་སར་གོ་ཆོད་མེད་པའི་གྱི་ན་བ།།
ཅ་དངོས་ཁྲ་ཁྲ་ཟང་ཟིང་དབེན་པའི་ཁར།།
ཆ་ལག་རྫོགས་པའི་ཤེས་འཇོན་མེད་པས་ན།།
ཇ་རོའི་སྙིགས་མ་བཞིན་དུ་འབགས་གཙོག་ཁྲོད།།
ཉ་མ་ཁེར་རྐྱང་ལྟ་བུར་ལོ་ཟླ་སྲུང་།།
ཏ་ཐཱའི་བསྟན་ལ་བརྩོན་པ་ལྷོད་པ་དང་།།
ཐ་མལ་འཚོ་བར་མག་མོག་ཆེ་བས་ན།།
ད་སྐབས་གཞན་ལ་རྟེན་པའི་ངང་ཚུལ་དེས།།
ན་གཞོན་བྱེ་བའི་འོག་ཏུ་ལོ་ཟླ་སྲུང་།།
པཱ་ལགས་འཆི་མའི་ལྔ་ལམ་བཞུད་པས་ན།།
ཕ་ཤུལ་སྡུག་གི་ཡོ་ལང་ལྷག་པར་འཚུབས།།
བ་དན་བཞིན་དུ་གཞན་གྱི་དབང་སྒྱུར་ཐོག།
མ་སྲིང་ཁེར་བུ་སྡུག་གི་ལོ་ཟླ་སྲུང་།།
ཙ་རི་གངས་རིའི་ཁ་དོག་མེད་ས་ནས།།
ཚ་ཟེར་དྲོད་ཟེར་མེ་རླབས་ཕྱུར་ས་ནས།།
ཛ་རེ་ཛོ་རེའི་ནད་ངན་མཆེད་ས་ནས།།
ཝ་སྤྱང་འཁྱམས་པོ་ལྟར་དུ་ལོ་ཟླ་སྲུང་།།
ཞ་བོ་ལོང་བའི་ཆ་ཤས་མ་རྫོགས་ཀྱང་།།
ཟ་བཅའ་འབྲས་འདལ་སྐྱ་བོས་ལུས་ཟུངས་སྦྲིད།།
འ་ཆད་འུ་ཐུག་དེ་འདྲའི་ཁ་ཐབས་དེས།།
ཡ་ཁོག་རྐང་ཚིལ་ཟད་ཀྱིན་ལོ་ཟླ་སྲུང་།།
ར་རོ་ལྟ་བུར་ཡན་ལག་སྐམ་ཞིང་ཕྲ།།
ལ་ཕུག་ལྟ་བུར་ངོ་མདངས་ཞན་ཅིང་རྫོབ།།
ཤ་ཁྲག་ལྟ་བུར་གཞན་གྱིས་སྨོད་ཅིང་སྡང་།།
ས་གནས་གང་དུའང་སྐྱ་བོའི་ལོ་ཟླ་སྲུང་།།
ཧ་ཅང་གདུང་བའི་སྐྱོ་གླུ་གྱེར་ཐེངས་རེར།།
ཨ་གྲོགས་ཐུགས་སེམས་གཡོ་འགུལ་མ་ཐེབས་ཀྱང་།།
ཁེར་བུ་ཞིག་གིས་ཚེར་ལམ་བསྐྱོད་ལུགས་དང་།།
མེ་ཕུང་བརྒལ་བའི་སྡུག་བསྔལ་གསོང་པོ་ཡིན།།
💊ནད་ཡམས་ཀྱིས་གཟིར་བའི་དུས་ཞིག་ལ།😩😖😥
ཡོང་ཁུངས།: རྩོམ་པ་པོའི་ངོ་དེབ་དྲྭ་བ།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།