གངས་སེང་དཀར་མོ། རྣམ་གྲོལ་གླིང་།
ལྷ་མི་གཉིས་ཀྱི་འདུ་ལོང་འཁྲིགས་པའི་དབུས།།
ང་ཡི་མེས་པོ་གངས་རིའི་བཞུགས་གནས་ཅན།།
དབེན་པའི་གནས་ཀྱིས་ཉམས་རྟོགས་འུར་བ་ཡི།།
རིས་ཆོད་མེད་པའི་ཐོས་པ་རྒྱ་ཆེན་བཙལ།།
རྒྱལ་བའི་མཚན་གྱི་མུ་ཁྱུད་གཙུག་ན་བསྙེན།།
མཛད་ཆེན་སྟོང་གིས་རུ་བཞི་ཤིག་ཤིག་བསྒུལ།།
མཚོ་འཁྲུངས་བསྟན་པའི་རུ་དར་ཁྱེར་བའི་མི།།
ཁ་ཡིག་འཐོར་པོའི་སྙིང་དོན་བཅུད་དུ་དྲིལ།།
ཟུངས་ཟད་རྒས་པོའི་འཁར་བ་ཁྱེད་ཀྱིས་བྱས།།
གསལ་ལ་མི་གསལ་ཁྲུན་ཐག་མ་ཆོད་པའི།།
མན་ངག་ཆིག་ཆོག་གསེར་གྱི་འོད་ལ་སྦྲན།།
མ་བོས་བཞིན་དུ་བཀའ་ཡི་སྲུང་མ་འཁོར།།
ཡང་གསང་བླ་མེད་སྙིང་གི་ཐིག་ལེར་གྱུར།།
གདན་ཐོག་གཅིག་ཏུ་དགོངས་པ་ལ་ཟླ་བའི།།
སྦས་པའི་དོན་མང་རྡོ་རྗེའི་ལྗགས་ལ་དྲངས།།
ཀུན་བཟང་ཡབ་ཡུམ་གཅེར་བུ་ཉིད་ལ་གཟིགས།།
གཟིགས་པ་ཇི་བཞིན་རྗེས་ཆགས་རྣམ་པར་འཕྲུལ།།
དམ་ཅན་སྲུང་མའི་བཀའ་དང་མ་གཡེལ་བར།།
གཉེར་ཁ་དང་བཅས་ཕྱི་རབས་བུ་ལ་བསྩལ།།
རྩོམ་པ་ཉིད་ན་མཁས་པའི་ལུགས་དང་བསྟུན།།
ལུང་རིགས་རྡོ་རྗེའི་སྤྲོས་པ་གཞལ་མཐའ་བྲལ།།
རྣལ་འབྱོར་པ་ཡི་ཚུགས་ཀྱང་མ་བརླགས་པའི།།
འཛིན་མེད་རིག་སྟོང་ཐུགས་ཀྱི་ཟེའུ་འབྲུར་སྨིན།།
བླ་མ་བརྒྱུད་པའི་བྱིན་རླབས་རྒྱ་མཚོའི་གཏེར།།
བཀའ་གཏེར་དག་སྣང་དབྱེར་མེད་རོ་གཅིག་ཤར།།
འཁྱོར་ལ་ཁད་པར་སྲོག་མཁར་བཙུགས་པ་ཡིས།།
གངས་རིའི་སྤོ་ལ་བདུད་རྩིའི་མཚོ་ཆེན་བསྐྱིལ།།
༢༠༢༡/༡/༣༡
ཡོང་ཁུངས། རྩོམ་པ་པོའི་ངོ་དེབ་ལས་བླངས།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།