མཛེས་མ་ཨ་ལན་ཟླ་གྲོལ།

བློ་བཟང་དོན་གྲུབ། སེ་ར་བྱེས།

མཛེས་མ་ཨ་ལན་ཏེ།

ཁྱེད་ནི་མཐོ་སྒང་གི་ཕོ་བརྒྱ་སེམས་པ་འཆོར་ས་དང་།

མོ་བརྒྱ་སྙིང་རླུང་ལྡང་ས་ཤིག་ཡིན།

ཁྱེད་ཀྱི་མཛེས་སྡུག་ལ་སུ་ཞིག་གིས་ཀྱང་འགྲན་པར་དཀའ་བའི་འོད་སྣང་ཞིག་འཆར་ལ།

ཁྱེད་ཀྱི་གསུང་སྐད་ལའང་སུས་ཀྱང་སྒྲོག་པར་དཀའ་བའི་གསང་གདངས་ཞིག་གདའ།

འོན་ཀྱང་གནས་སྐབས་འདིར་རྟག་བརྟན་མེད་པར་ཀུན་ཀྱིས་ཤེས་ལ།

དེ་ནི་སྒྱུ་མའི་རྨི་ལམ་ཙམ་ཞིག་ཡིན་པའང་ཤེས་པ་མང་ངོ་།།

དེས་ན།

འཁོར་བའི་ཨར་ཁང་ཆེན་པོ་འདི་ནང་དུ། །

ལན་གཅིག་ཆང་འཐུང་བྱ་བ་ལ་སྤྱད་དེ། །

སྐྱིད་སྣང་བདེ་བའི་ར་བཟི་འདི་སྐྱིད་མོད། །

དྭངས་པའི་འབྲས་བུ་སང་ཞོགས་འདི་སྡུག་ཨང་། །

མཚར་ལ་སྡུག་པའི་ཁྱེད་ཀྱི་བྱད་བཞིན་དེར།

སུ་ཤིག་གིས་ཀྱང་མཐོང་བའི་མོད་ལ་དགའ་བ་བསྐྱེད་ཅིང་།

ཁྱེད་ཀྱི་དྭངས་གཙང་གི་ཞལ་ཁྱིམ་དེ།

ལེགས་བྲིས་མ་ཡི་བཞིན་བཟང་རྗེན་པ་དེ་རེད།

ཁྱེད་ཀྱི་སྙན་འཇེབས་ཀྱི་གཞས་ཐུང་རེ་རེ་རྣ་བའི་དབང་པོར་ལྷུང་ཚེ།

རེ་ཞིག་ཧད་ཀྱིས་སྨྲ་བསམ་བརྗོད་མེད་དུ་འདས་ཀྱང་།

དེ་ནི་སྒྱུ་མའི་ཆོ་འཕྲུལ་གསོན་པོ་ཞིག་ཡིན་ལ།

དེའང་མྱུར་མོར་འཇིག་པའི་རྒྱུ་ཚོགས་དུ་མ་ཞིག་གིས་འདུས་ཡོད།

དེའི་ཕྱིར།

ལང་ཚོའི་མེ་ཏོག་དབྱར་སྐྱེས་ཀྱི་པད་མ། །

སྙན་འཇེབས་དྭངས་མ་མི་མཐུན་པའི་རྒྱུད་མངས། །

བཞིན་བཟང་མཛེས་པོ་བརྟན་མེད་ཀྱི་འཇའ་མཚོན། །

གང་ལའང་བལྟས་ཚེ་སྙིང་པོ་འདི་མེད་དོ། །

འོན་ཀྱང་ཁྱེད་ནི་ངས་ཆེས་དགའ་བའི་གཞས་མ་ཞིག་ཡིན་ལ།

ཁྱེད་ཀྱི་གཞས་རེ་རེར་ངས་མཉན་པ་གྲངས་ཀྱིས་མི་ལོང་།

ཁྱེད་ནི་དེང་དུས་ཀྱི་གཞས་མ་མཛེས་ཤིང་སྡུག་ལ།

ལང་ཚོའི་དར་བབས་ངོ་མ་ཞིག་རེད་འདུག 

ཁྱེད་ནི་མ་འོངས་པར་ཆེས་སྙན་གྲགས་ཅན་ཞིག་ཏུ་གྱུར་བའི་ངའི་རེ་བ་དང་སྨོན་པ་ཡོད་དོ།།

དེ་བས་ན།

གྲགས་པ་རྔ་སྒྲ་བཞིན་ས་གསུམ་ཁྱབ་བཞིན། །

སྐད་སྙན་འཕང་འགྲོ་བཞིན་ཀུན་གྱིས་མོས་ལ། །

མཛེས་སྡུག་ལྷ་མོ་བཞིན་ཁམས་གསུམ་ལྷགས་པའི། །

འབྲས་བུ་གཡུར་ཟ་ཞིག་འཐོབ་པར་སྨོན་ནོ། །

______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང་།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-མཛེས་མ་ཨ་ལན་ཟླ་གྲོལ།