ཉག་སྦྲང་ཆར་གྱི་རང་མོས་སྙན་ངག་ཆེད་བསྒྲིགས།

༡༽

ད་ལྟའི་ནམ་ཟླ་ནི།

བག་ལྷོད་པའི་ཞོགས་པ་ཞིག་ལ་ཁེལ་འདུག

ཡོད་ཚད་མཛེས་ཤིང་ཟླུམ་པའི་ཟིང་དཀར་གྱི་མུ་ཏིག་རྡོག་ཅིག་རེད།

ཡང་སྙིང་ཅི་ཡང་མི་འདུག

ཐ་སྙད་ཅི་ཡང་མེད་པའི་གསེབ་ཏུ།

ངས་རང་ཉིད་ལ་ཐ་སྙད་གཞན་ཞིག་འཚོལ་གྱིན་ཡོད།

ཐ་སྙད་དེའི་ནང་དུ་གྲོགས་པོ་ཞིག་ཀྱང་དྲན་གྱིན་ཡོད།

སྐབས་དེར་ཡོད་ཚད་གོ་མེད་ཚོར་མེད་ངང་ཉུལ་འདུག

དབྱངས་སྐུད་ཞན་པའི་རོལ་དབྱངས་ཤིག་དང་མཚུངས།

དབྱངས་སྐུད་དེའི་གསེབ་ཏུ།

ངས་མཛེས་སྡུག་གི་རྩྭ་ཡི་རྩེ་མོ་ན་ལྗོངས་ཀྱི་ལོ་མ་ཞིག་འདེབས་ཀྱིན་ཡོད།

ལོ་མ་དེ་གྲོགས་ཀྱི་མཛའ་བརྩེ་དང་འབྲེལ་བའི་ཕྱི་ཐག་དེ་ཡིན།

ངས་དྲན་པ་ཟབ་མོའི་ཕྱི་རོལ་དུ་བལྟ་མི་ཕོད།

སྤོབས་པ་བསྐྱེད་ཀྱང་ཕྱིར་དྲན་ཡང་བྱེད་མི་ཕོད།

དྲན་པ་ཟབ་མོའི་ཕྱི་རོལ་ཏུ་མིག་ཆུ་དང་སྐྱོ་གདུང་འཁྱིལ་འདུག

དེ་དག་གི་ང་རང་དྲན་གདུང་ནང་དུ་བསྐྱལ་ནས།

ཐེ་ཚོམ་མེད་པར་ངུ་ཤོར་དུ་འཇུག

དེ་ནི་ཅི་འདྲའི་མཛེས་སྡུག་གི་བསླུ་བྲིད་ཅིག་རེད་ཨང་།

༢༠༢༡/༠༥/༢༩

༢༽

ངས་མཐོང་ཚུལ་ཞིག་ལ།

སྤྲིན་གསེབ་ཀྱི་འཇའ་ཚོན་དེ།

ཇི་འདྲའི་ཡིད་འཕྲོག་ཅིག

གཙང་པོ་དང་ཉེ་སར་མཐོང་།

ལས་དབང་དང་རིང་སར་འདུག

འཇའ་ཚོན་དེ་ཉིད་རྟོགས་ཐེངས་རེ་རེར།

བློ་བུར་ཐིམ་འགྲོ་བའི་སེམས་སྡུག་ཡང་ཤོར།

བརྩེ་དུང་གིས་དྲན་མེད་བཟོས་པ།

ང་རང་ཉིད་གཅིག་པོ་ག་ལ་ཡིན།

༢༠༢༡/༠༤/༢༧

༣༽

མགོ་ནག་བོད་པ་ཚོས་བརྗེད་མི་ཐུབ་པའི་ཟླ་བ་ནག་པོ།

དྲན་ཡང་གླེང་མི་ཕོད་པའི་ཉི་མ་ནག་པོ།

མཐོང་ནའང་བཟོད་མི་ཐུབ་པའི་སྐར་མ་ནག་པོ།

༤/༡༤ ཡི་ཉིན་མོ་དེ་རེད།

བྱམས་སྙིང་རྗེ་སྤུ་ཙམ་མེད་པའི་ས་ཆེན་པོ་འདིའི་རལ་པ་བསིག་ཐེངས་གཅིག་ལ།

ངའི་སྙིང་ཉེ་བའི་གངས་ཅན་གྱི་སྤུན་ཟླ་ཚོའི་གཅེས་པའི་ཚེ་སྲོག་མང་པོ་རྩ་རལ་བཟོས་སོང་བའི་ཉིན་མོ་ཞིག་ཡིན།

ཀྱེ་མ་ཀྱེ་མ། སྐབས་དེ་དང་དེའི་དུས་སུ་མཛེས་ཤིང་ལྟ་ན་སྡུག་པའི་ཡུལ་ལུང་དེ་ངུ་སྐད་དང་ཐལ་རྡུལ་སོགས་ཀྱིས་བལྟམས་ཏེ་བདེ་སྐྱིད་ཀྱི་ཉི་མ་སེར་པོའི་འོད་མདངས་ཡལ་སོང་བའི་ཉིན་མོ་དེ་ཡིན་ན།

ས་ཆེན་པོའི་ཁམས་དེར་ཁྲག་གི་ཆར་སྤྲིན་འཐོར་ཞིང་བམ་རོས་རི་བོ་ལྟར་ཁེངས་པར་བྱས་པའི་ཉིན་མོ་དེ་རིང་ཡིན་པས། ང་ཚོ་ཤུལ་ལུས་གངས་ཅན་གྱི་སྤུན་ཟླ་ཚོའི་མིག་ཆུ་སྐམ་མེད་པའི་ལྷ་བླ་མར་སྐྱབས་འཇུག་ཞུས་ཤིང་ཕྱོགས་གཅིག་ནས་གཅིག་ཏུ་སྡུག་ཆེན་པོའི་ཁུར་བོ་མཉམ་ཁུར་བྱས་པའི་ཉིན་མོ་དེ་ནམ་ཡང་བརྗེད་སྲིད་དམ་ཨང་།

༢༠༢༡/༠༤/༡༤

༤༽

མཚན་མོའི་གློག་སྒྲོན་འོག་ནས།

འཆར་ཡན་སྣ་ཚོགས་ཀྱི་རྟོག་བརྗོད་འབྲི་དུས།

ཆུ་འཛིན་བུ་མོའི་སྤྱན་ཆབ།

ཉི་ནུབ་ཀྱི་མཚམས་སུ་གཏོར།

སྨག་རུམ་གྱི་ཁྲོད་དུ་དགོད་པའི་སྒྲོན་མེ་འདི།

ཆུ་ཕྲན་གྱི་ཁ་ནས་ད་དུང་འཛུམ་དམུལ་དམུལ་འཕྱོ་བཞིན་འདུག་ནའང་།

ལྷིང་འཇགས་ཀྱི་འཇིག་རྟེན་ཞིག་ན།

བདག་ནི་རྒྱུན་དུ་ཞི་འཇམ་ངང་ཉལ་ཡོད།

ལྷོད་ཆགས་པའི་མཚན་མོའི་རྨི་ལམ་ཁྲོད།

ཁྱེད་ནི་དུང་ཟླ་ལྟར་འཛུམ་པའི་བཞིན་རས་ཤིག

སྐར་ཆེན་བཞིན་འཚེར་བའི་མིག་ཟུང་ཞིག་ལྟར་འདུག་ན།

ཡོད་ཚད་ནས་ཡོད་ཚད་ཅིག་ཡིན་པའི་ཁྱེད་རང་རེད།

བདག་གི་རྨི་ལམ་ནས།

ཁྱེད་རང་ངའི་ཉེ་སར་སླེབ་དུས།

ཕྱིར་འོང་མེད་པའི་རྣམ་ཤེས་འཁྱམ་པོ་ཞིག་གིས།

མཁར་རྫོང་རྙིང་ཧྲུལ་ཞིག་གི་ནང་དུ་ཅི་ཞིག་འཚོལ་བཞིན་གདའ།

༢༠༢༡/༠༣/༢༡

༥༽

ཆར་སིམ་སིམ་ཀྱིས་དཀྲོལ་བའི་རོལ་དབྱངས་ཤིག་གི་ཁྲོད་ནས།

ངའི་རྨི་ལམ་དུའང་བོར་མ་མྱོང་བའི་ཡུམ་ཆེན་ལགས།

རྒྱང་རིང་ཞིག་ནས་དྲན་ཐལ།

འབྱུང་བཞི་ཆ་གཉོམ་མེད་པའི་གཡུལ་ས་ན།

ང་རང་ཉིད་ཕ་ཡུལ་གྱི་གཡུ་སྦྲང་ཞིག་ཡིན་ན་འདོད་ལ།

མ་དྲིན་ཅན་གྱི་ལག་ཏུ་ཐོགས་པའི་མེ་ཏོག་དེ་ཡིན་ན་ཆོག་ཨང་།

ཁོ་བོའི་ཁུར་ཚོས་ངོས་ནས་་བཞུར་བའི་མིག་ཆུ་དེ།

དྲན་གདུང་གིས་ཟིན་པའི་རྨ་ཁ་ཞིག་ཡིན་ན།

གློ་དང་མཆིན་་པའི་སྲུབ་ཀ་ནས་འཕགས་ཤིང་།

ཤ་རུས་ལ་ཐིམ་བཞིན་པའི་གཏམ་རྒྱུད་རིང་པོ་རིང་པོ་ཞིག་་ལྷང་ལ་བུད་ངེས།

བུད་ངེས།

༢༠༢༡/༠༣/༠༩

༦༽

གཉིད་ལས་སད་མ་ཐུབ་པའི་ང་།

གདོང་མཆི་མས་བརླན་པའི་ང་།

ལེ་ལོ་ཡིས་ར་བཟི་བའི་ང་།

ད་དུང་མལ་ལས་འཐམས་ནས་གཉིད་ལ་ཡུར།

གུ་དོགས་པའི་ཁང་མིག་གི་བར་གསེང་ནས།

དྲི་ངན་གྱིས་ཁེངས་པའི་ཉལ་ཁྲིའི་སྟེང་དུ།

རྨི་ལམ་ཞིག་རྨིས།

འཇོལ་མོའི་སྙན་པར་སྒྲོག་པའི་གསུང་སྐད་དང་།

འབྲི་མོའི་ངུར་རྒྱང་དང་།

གཡང་དཀར་ལུག་གིའི་འབའ་སྒྲ།

བེའུའི་ངུར་སྐད།

ད་དུང་ཡང་འཚེར་སྐད་ལྷང་ལྷང་གྲགས་པའི།

རྟ་ཕོའི་ཁྱུ་ཚོགས་དང་།

ཁྱིའི་ཟུག་སྐད་སོགས་གང་མང་མང་ཞིག་རྨིས།

མཚམས་མཚམས་སུ།

ཐ་ཐོར་དུ་ཆགས་པའི།

གྲོང་ཁྱེར་གྱི་སྒོ་དང་སྒེའུ་ཁུང་ལས།

བསིལ་རླུང་འཇམ་པོ་ཡི་སྐད་ཀྱང་གོ་ཐུབ།

དེས་དེ་བཟུང་ང་གཉིད་ལས་སད་ན་འདོད་བྱུང་།

༢༠༢༡/༠༢/༡༧

༧༽

དཔེ་ཆ་ཀློག་ཐེངས་རེ་རེར།

ངས་ང་རང་ཉིད་མིང་ཚིག་ཅིག་ཏུ་འགྱུར་ཨེ་འགྲོ་སྙམ།

མིག་ཆུ་ཤོར་ཐེངས་རེ་རེར།

ངས་ང་རང་ཉིད་འཇའ་ཚོན་ཞིག་ཏུ་འགྱུར་ཨེ་འགྲོ་སྙམ།

འགྱོད་པ་སྐྱེ་ཐེངས་རེ་རེར།

ངས་ང་རང་ཉིད་ལྐུགས་པ་ཞིག་ཏུ་ཨེ་འགྲོ་སྙམ།

ཁོང་ཁྲོ་ལོང་ཐེངས་རེ་རེར།

ངས་ང་རང་ཉིད་མེ་རི་ཞིག་ཏུ་འགྱུར་ཨེ་འགྲོ་སྙམ།

དུས་ཚོད་ཤོར་ཐེངས་རེ་རེར།

ངས་ང་རང་ཉིད་དབུལ་པོ་ཞིག་ཏུ་འགྱུར་ཨེ་འགྲོ་སྙམ།

༢༠༢༡/༠༡/༢༦

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-ཉག་སྦྲང་ཆར་གྱི་རང་མོས་སྙན་ངག་ཆེད་བསྒྲིགས།

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།