གཏན་པ་མེད་པའི་ཕྲིན་ལས་ཅན།

གངས་སེང་དཀར་མོ།

སྤོབས་པའི་གཏེར་བརྒྱད་གྲོལ་མཛད་ངག་ལ་དབང་མཁན།།

ལྟ་སྤྱོད་གདེང་ལྡན་ཉམས་རྟོགས་ཁོང་ནས་འབར་མཁན།།

བསྟན་པའི་རྒྱལ་མཚན་ཆེན་པོ་སྲིད་འདིར་འདེགས་མཁན།།

གཏན་པ་མེད་པའི་འཕྲིན་ལས་ཟླ་བཞིན་གསལ་མཁན།།

འཇམ་དབྱངས་སྨྲ་བའི་ཉི་མར་ལན་བརྒྱར་མཇལ་མཁན།།

དཀར་ཕྱོགས་སྐྱོང་བའི་ལྷ་ཡང་གཉེན་དུ་འགུགས་མཁན།།

གེ་སར་རྒྱལ་པོའི་བསྟོད་གླུ་ཆར་བཞིན་འབེབས་མཁན།།

འགགས་མེད་གསུང་ལ་དབྱངས་ཀྱི་འོད་ཟེེར་སྤྲོ་མཁན།།

ཐུན་མིན་གྲུབ་མཐའི་གནས་ལ་གཏིང་ཐག་ཆོད་མཁན།།

མཐར་ཐུག་ལྟ་བའི་གལ་མདོ་གཅིག་ཏུ་འཁྱེར་མཁན།།

གཞུང་བརྒྱ་གནད་དུ་དྲིལ་ནས་མན་ངག་འཇོག་མཁན།།

ས་གསུམ་བླ་མར་འཕགས་པའི་གོ་འཕང་སྙེག་མཁན།།

བླ་མ་དགྱེས་པའི་ཞལ་དུ་བདུད་རྩིས་མཆོད་མཁན།།

དབྱངས་ཅན་ལྷ་མོའི་བརྩེ་བ་རྒྱ་མཚོར་བསྐྱིལ་མཁན།།

བརྒལ་བརྟག་རིགས་པའི་མེ་དཔུང་འོད་ལ་སྲེ་མཁན།།

མུན་པ་དོང་ནས་སྤྲུགས་ཏེ་འཁོར་བ་གཤག་མཁན།།

སྒྲུབ་པའི་རྒྱལ་མཚན་བཟུང་ནས་རི་ལ་བཞུགས་མཁན།།

རྫས་སྔགས་ཏིང་འཛིན་བྱེ་བའི་སྲོག་མཁར་རྙེད་མཁན།།

གནོད་སྦྱིན་གཡུལ་ལས་རྒྱལ་བའི་རུ་མཚོན་འཕྱར་མཁན།།

སྙན་པའི་བ་དན་དཀར་པོས་ས་གསུམ་འགེབས་མཁན།།

སམ་བོད་སྐད་གཉིས་སྨྲ་བའི་ལེགས་བཤད་སྡེབས་མཁན།།

དབུ་ཚད་སེང་གེའི་མཇིང་བསྣོར་རིགས་པས་འགྲོལ་མཁན།།

བཀའ་གཏེར་དག་སྣང་བརྒྱུད་པའི་ཕ་ཕོག་བརྙེས་མཁན།།

མི་འཇིགས་སེང་གེའི་སྒྲ་ཆེན་ཕྱོགས་བརྒྱར་སྒྲོག་མཁན།།

ཕྱོགས་མེད་མཁས་པ་སྟོང་གི་ཞབས་པད་བསྙེན་མཁན།།

བརྒྱུད་གསུམ་རྒྱལ་བ་རྒྱ་མཚོའི་བྱིན་བཅུད་ལོན་མཁན།།

རང་སེམས་ལྷ་སྐུར་སྨིན་པའི་དངོས་གྲུབ་སྩོལ་མཁན།།

རྗེས་ཆགས་སྒྱུ་མའི་ཐུགས་རྗེར་འཛད་པ་མེད་མཁན།།

༢༠༢༡/༠༦/༠༩

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-«གཏན་པ་མེད་པའི་ཕྲིན་ལས་ཅན།»

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།