འབྲོང་གི་སྙིང་རྩིད་ཡིན་པའི་རྒྱ་ལ་ལྟོས།

ཁྱུང་ནོར། བོད་ཡུལ་ཁམས་ཕྱོགས་ཁྱུང་ནག་སྡེ་བ།

ཆོས་འཁོར་ཞེས་པ་དོན་དུ་འཕྲུལ་འཁོར་རོ།།

འདི་ཡང་ལུང་རིགས་ཉི་ཟླའི་བོན་འཁོར་ཏེ།།

ཉི་མའི་ཁོང་ནས་འོད་ཟེར་འབར་བ་འདིར།།

སྐར་ཚོགས་བྱེ་བ་འཇོམས་པའི་མཐུ་སྟོབས་རྫོགས།།

འདི་ནི་གནམ་ལ་དགའ་བའི་གྱད་ཆེན་ཏེ།།

འདི་ནི་དཔའ་བོ་འབྲུ་ལྔའི་རྣམ་སྤྲུལ་ཏེ།།

འདི་ལ་གཡུ་འོད་འབར་ཞིང་གསེར་འོད་འཕྲོ།།

ལོ་རྒྱུས་གབ་སྦས་ཡོད་ཚད་འདི་ཡིས་གསལ།།

འདི་ཡང་སྨན་རི་ཚང་གི་ཁྱུང་ཆེན་ཏེ།།

འདི་ཡང་ལྟ་བ་སྤྱི་རྒྱ་རླབས་གཅོད་དེ།།

བྱ་མ་བྱི་ཚོས་འདི་ཚོར་མ་གཤིབ་ཨང་།།

དྲན་འཕྲུལ་རྒོད་པོའི་རང་མཚང་སྟོན་བྱེད་ཙམ།།

ཁ་སྔ་ལག་མགྱོགས་ཁོ་ནར་གོམས་པ་ཚོས།།

ལེ་ཧྲན་ཇག་པ་འདི་ཡི་མཚོན་བྱེད་བཀོད།།

འདི་ལ་སྙིང་རྗེ་འཁྱིལ་ཞིང་ཤེས་རབ་རྒྱས།།

རག་བཟི་འཁྱོར་ཉོག་ཅན་དང་ཡེ་མི་མཚུངས།།

ཕོ་རྒོད་ཀྲི་ཧྲེང་འདི་ཡིས་ཅུང་དམན་ཏེ།།

འབུམ་རམས་པ་ཡི་ཕྱག་རྟགས་ཐོས་མྱོང་མེད།།

ལྷག་ཏུ་ཤར་ནུབ་རིག་གཞུང་ག་ལ་སྟེ།།

འདི་ནི་མི་ཆོས་བྱང་ཞིང་ལྷ་ཆོས་ཆུབ།།

ངོ་སྟོད་ཁྲོ་འཛུམ་ཤིག་ཤིག་རྔམ་ཟིལ་རྒྱས།།

ངོ་སྨད་ཞི་འཛུམ་ཁྱུག་ཁྱུག་གཟི་བརྗིད་ལྡན།།

ཨག་ཚོམ་སྨིན་མ་མེ་ལྟར་འབར་བ་ཡི།།

འདི་ནི་ཁྲོ་བོ་རྣམ་པར་འཇོམས་པ་ཡིན།།

ཧི་མ་ལ་ཡའི་ཞོལ་གྱི་འབྲོང་རྒོད་འདིས།།

ནུབ་གླིང་གྲོང་དུ་བོན་སྒྲ་སྒྲོག་ཐེངས་རེར།།

མགོ་སེར་དད་པའི་སེམས་གཡོས་སྐྱི་ཤ་འདར།།

འདི་ཡི་མཁྱེན་དཔྱོད་འབྱུང་བ་རྣམ་ལྔའི་སྤུན།།

གཟུགས་བྱད་ཀུན་ལས་བརྗིད་པའི་སྐུ་ལ་བསྟོད།།

གཏམ་གླེང་སྒྲ་དག་སྒྲོས་གཙང་གསུང་ལ་བསྟོད།།

ཤེས་ཡོན་བླ་ན་མཐོ་བའི་ཐུགས་ལ་བསྟོད།།

ལྷག་ཏུ་བཤེས་གཉེན་ཁྱེད་ཀྱི་རྒྱ་ལ་བསྟོད།།

གསང་འདུས་གཤེན་གྱི་དགོངས་བཅུད་ཐིམ་པ་ཡི།།

སྨན་རབས་སོ་གསུམ་བྱིན་ཆེན་ཞུགས་པ་ཡི།།

འདི་ནི་དབྱིངས་ཉིད་སྟོང་པའི་ཁྲི་གདུགས་ཏེ།།

བཅས་བཅོས་འབར་བའི་རྣལ་འབྱོར་བདག་འདུད་དོ།།

༢༠༢༡/༦/༡༠/ ཉིན་བྲིས།

འབུམ་རམས་པ་དོལ་པོ་དགེ་བཤེས་ཆོས་འཁོར་ཚང་ཉི་མ་འོད་ཟེར།

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-འབྲོང་གི་སྙིང་རྩིད་ཡིན་པའི་རྒྱ་ལ་ལྟོས།

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།