༡. ང་སྙན་ངག་ལྷ་མོ་ལ་དགའ།
འཇིག་རྟེན་དགའ་བའི་གང་ཟག་ལ། །
འདོད་པའི་བདེ་བ་བླ་མེད་སྟེར། །
ཁྱོད་ཀྱིས་གནང་བའི་བདེ་སྐྱིད་དེ། །
སྙན་ངག་ལྷ་མོ་དྲན་པའི་ཚེ། །
མིག་ཆུ་རང་དབང་མེད་པ་ཤོར། །
ཁྱོད་ལ་དགའ་བའི་བརྩེ་བ་ནི། །
ནམ་ཡང་འགྱུར་བ་མེད་པ་ཡིན། །
མི་ཡི་སྤྱི་ཚོགས་ནང་རོལ་དུ། །
བརྩེ་དུང་བར་ཆད་གཏོང་མཁན་མང་། །
ང་དང་སྙན་ངག་ལྷ་མོའི་བར། །
སོ་སོར་མི་འབྲལ་དམ་བཅའ་བཞག །
མི་ལུས་རིན་ཆེན་རྙེད་པའི་ཚེ། །
རང་ཉིད་དགའ་སའི་བུ་མོ་ལ། །
བརྩེ་བ་ལྷད་མེད་མེད་གྱུར་ན། །
མི་ལུས་ཐོབ་ཀྱང་སྙིང་པོ་མེད། །
སྙན་ངག་ལྷ་མོ་ཁྱོད་ལ་དགའ། །
སྙན་ངག་ལྷ་མོ་ཁྱོད་རང་དྲན། །
ཁྲོཾ་ཉག་སེམས་ཀྱི་ནང་རོལ་དུ། །
ཁྱོད་རང་གཅིག་པུ་ཁོ་ན་འོ། །
༢༠༢༡/༠༤/༡༢ ཉིན་བྲིས།
༢. ང་ཁྱོད་ལ་ཧ་ཅང་དགའ།
ཞལ་རས་དཀར་རུང་ཞལ་རས་ནག་ཀྱང་ཆོག །
ཕ་ཡུལ་ས་ཆ་གང་དུ་ཡིན་ཡང་ཆོག །
དབུལ་ཕྱུག་གང་དུ་ཡིན་ཡང་དེ་བས་ཆོག །
ཁྱེད་ལ་དགའ་བའི་བརྩེ་དུང་རྫུན་མ་མིན། །
ཕ་མ་སྤུན་མཆེད་དགྲ་རུ་ལངས་ཡང་སྲིད། །
གྲོགས་པོ་བློ་མཐུན་ཐུགས་སེམས་སྐྱོ་ཡང་སྲིད། །
ང་རང་མི་ཚེ་དཀའ་ཁག་འཕྲད་ཡང་སྲིད། །
ཁྱོད་དང་ནམ་ཡང་མི་འབྲལ་དམ་བཅའ་ཡིན། །
རང་སྲོག་བློས་གཏོང་དགོས་ཀྱང་ང་མི་འགྱོད། །
མི་ཚེ་ཁྱོད་དང་འགྲོགས་ན་ང་མི་འགྱོད། །
རྒྱུ་ནོར་སྙན་གྲགས་མེད་ན་ང་མི་འགྱོད། །
ཁྱོད་རང་མ་གཏོགས་ང་ལ་གཞན་མི་དགོས། །
༢༠༢༡/༠༥/༢༡ ཉིན་ངའི་ཚེ་སྲོག་སྙན་ངག་ལྷ་མོ་དྲན་པའི་མིག་ཆུ་ས་རུ་ལྷུང་ཞོར་དུ་བྲིས།
༣. བརྩེ་དུང་གི་རོལ་དབྱངས།
སྤྲིན་དམར་སེར་མཛེས་སྡུག་ལང་ཚོ་ཅན། །
སའི་གོ་ལ་སྟེང་དུ་ཞོ་བཞིན་ཆགས། །
ངས་བརྩེ་དུང་རོལ་དབྱངས་མངར་མོ་བཀྲོལ། །
རྨད་བུ་མོའི་འདོད་པའི་བདེ་སྐྱིད་སྟེར། །
གནམ་ས་སྟེང་འོད་མདངས་རང་འབར་ཅན། །
ཐུགས་འོད་སྣང་བག་ཡོད་ཚུལ་དུ་གནས། །
ངའི་འདོད་སྟེར་བུ་མོ་ལུས་ཕྲ་མས། །
སེམས་ལྷོད་དུ་བབས་བཞིན་རོལ་དབྱངས་ཉན། །
ས་སྐྱིད་པོ་གུ་ཡངས་རང་དབང་ཅན། །
གནས་འདི་ནི་བརྩེ་དུང་རྒྱ་མཚོའི་ཡུལ། །
ངའི་ཚེ་སྲོག་སྙན་ངག་ལྷ་མོ་དང་། །
དུས་ནམ་ཡང་མི་བྲལ་དམ་བཅའ་ཡིན། །
༢༠༢༡/༠༥/༡༥ ཉིན་བྲིས།
_______________
རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།
ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།
རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-ཁྲོཾ་ཉག་ཚེ་རིང་གི་སྙན་ངག་ཆེད་བསྒྲིགས།
࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།