བདག་གིས་དངོས་སུ་མཇལ་བའི་རྗེ་བཙུན་ཆེན་པོ།

སློབ་དཔོན་ཀརྨ་དབང་རྒྱལ། ཧྥ་རན་སི།

࿑ ན་མོ་གུ་རུ་བཛྲ་ས་ཏྭ་ཡེ།

མ་བཅོས་རིག་པ་ཆོས་སྐུའི་མཁའ་དབྱིངས་སུ།།

ཚད་མེད་སྙིང་རྗེའི་ཆུ་འཛིན་རབ་ཏུ་འཁྲིགས།།

གང་འདུལ་སྦྲང་ཆར་སིལ་མ་ཕྱོགས་ཀུན་འབབ།།

ངེས་དོན་དགེ་སློང་རྡོ་རྗེ་འཛིན་པ་ཁྱེད།།

རྗེ་བཙུན་བླ་མའི་ཐུགས་དགོངས་རྫོགས་པར་མཛད།།

སྤང་རྟོགས་ཡོན་ཏན་རྒྱ་མཚོར་མངའ་དབང་འབྱོར།།

དམ་པའི་ངང་ཚུལ་མདོ་སྔགས་ཟབ་རྒྱའི་དོན།།

ཉམས་ལེན་ཐུགས་སུ་འདྲེས་པ་ཁྱེད་ཉིད་ཙམ།།

ཀུན་བཟང་དགོངས་པ་མཉམ་པའི་རྣལ་འབྱོར་ཁྱེད།།

འདིར་སྣང་སྒྱུ་འཕྲུལ་རྣམས་ལ་རེ་དོགས་ཟད།།

གཞི་སྣང་གཞི་རུ་བསྡུས་ནས་ཆོས་སྐུའི་ངང་།།

མཉམ་པར་བཞག་པའི་སྐུ་ལ་ཕྱག་འཚལ་ལོ།།

ཕྱི་ལྟར་ཞི་འདུལ་ཉམ་ཆུང་ཀུན་གྱི་གྲོགས།།

ནང་དུ་བྱང་ཆུབ་སེམས་དཔའ་ཆེན་པོའི་ཚུལ།།

གསང་བར་རིག་འཛིན་པདྨའི་དགོངས་བཅུད་བརྙེས།།

ཁྱེད་ནི་ཆོས་ཟད་རྣལ་འབྱོར་རྣམ་པར་རྒྱལ།།

ཐོས་པ་རྒྱ་མཚོའི་ཕ་མཐར་ཁྱེད་ཀྱིས་བརྒལ།།

བསམ་གཏན་རྩེ་གཅིག་ངང་དུ་སྐུ་ཚེ་བསྐྱལ།།

སྒོམ་པ་མི་རྟོག་རྣལ་འབྱོར་རྒྱུན་ཆད་མེད།།

བསྟན་པ་ནང་དུ་འཛིན་པ་ཁྱེད་ལ་འདུད།།

 

བསྟན་འགྲོའི་དོན་དུ་དཀའ་བ་བརྒྱ་ཕྲག་སྤྱད།།

འཇིག་རྟེན་ཆོས་བརྒྱད་མི་གཙང་འདམ་ལྟར་དོར།།

བླ་མའི་བཀའ་དང་རང་གི་ཚེ་སྲོག་བརྗེས།།

རྒན་ལགས་ངག་དབང་ངག་གི་དབང་པོ་འདྲ།།

སྡོམ་གཙང་པདྨར་འདམ་གྱི་དྲི་མ་འགོས།།

དགེ་སྡིག་དཀར་ནག་ཕྲ་ཞིང་ཞིབ་པར་བསྲུངས།།

ཀ་དག་ཆེན་པོའི་གནས་ལུགས་རབ་རྟོགས་ནས།།

ལྷུན་གྲུབ་སྣང་བཞི་མཐའ་རུ་ཕྱིན་པའོ།།

མདོར་ན་ཁྱེད་ནི་མཁས་བཙུན་བཟང་པོ་ཡི།།

བདག་གིས་དངོས་སུ་མཇལ་བའི་རྗེ་བཙུན་ཆེ།།

སྙིགས་དུས་བསྟན་པའི་སྒྲོན་མེ་ཆེན་པོ་ཁྱེད།།

སླར་ཡང་ཆོས་སྐུའི་ཀློང་དུ་མཇལ་བར་སྨོན།།

     ཞེས་པ་འདི་ནི་ངེས་པ་དོན་གྱི་ཉམས་ལེན་པ་ཆེན་པོ། སྦས་པའི་རྣལ་འབྱོར་རྒན་ངག་དབང་མཆོག་གཟུགས་སྐུའི་བཀོད་པ་ཆོས་སྐུའི་ངང་དུ་བསྡུས་པ་ངོ་མཚར་སྒྱུ་འཕྲུལ་གྱི་རོལ་བ་སྟོན་པའི་ཉིན། རྗེ་བཙུན་བླ་མ་ཁོང་ལ་དད་མོས་མི་དམན་ཙམ་ཡོད་མཁན། མི་གནས་རང་བྱུང་ངམ་ལྷོ་རི་བ་ཀརྨ་དབང་རྒྱལ་གྱིས་ནུབ་ཧྥ་རན་སིའི་རྒྱལ་སར་༢༠༢༡/༠༦/༡༦ ཉིན་སུག་བྲིས་བྱས་པའོ།།

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-བདག་གིས་དངོས་སུ་མཇལ་བའི་རྗེ་བཙུན་ཆེན་པོ།

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།