འཇིགས་མེད་འཕྲིན་ལས་ལགས་ཀྱི་སྙན་ངག་ཚན་པ་གཉིས།

༡. ཡིག་དྲུག་སྒྲོངས།

ཀུན་རྫོབ་བརྟགས་ནས་དོན་དམ་གཏན་ལ་ཕོབ།།

དོན་དམ་ངང་ནས་ཀུན་རྫོབ་འཆར་ཚུལ་ལྟོས།།

བདེན་གཉིས་དབྱེར་མེད་བློ་བྲལ་གཉུག་མའི་གཤིས།།

སྤྲོས་བྲལ་ལྟ་བའི་ངང་ནས་ཡིག་དྲུག་སྒྲོངས།།

སྣང་བའི་སྟེང་དུ་སེམས་ཀྱི་ཞེན་པ་ཆོད།།

སེམས་ཀྱི་སྟེང་དུ་སྣང་བའི་རྫུན་ཕུག་རྡིབ།།

སྣང་སེམས་གཉིས་མེད་རྒྱ་གྲོལ་ཕྱལ་བ་ཆེ།།

རོ་གཅིག་རྟོགས་པའི་ངང་ནས་ཡིག་དྲུག་སྒྲོངས།།

སེམས་ཀྱི་རང་བཞིན་རིག་སྟོང་གཉུག་མར་གྲོལ།།

རིག་པའི་རང་རྩལ་སེམས་རྟོག་རང་སར་དག།

སེམས་རིག་གཉིས་མེད་ཐིག་ལེ་གཅིག་གི་ངང་།།

བསྒོམ་མེད་ཆོས་སྐུའི་ངང་ནས་ཡིག་དྲུག་སྒྲོངས།།

༢༠༢༡/༠༦/༠༧

༢. ཁྱེད་ལ་བལྟས་ནས་རོལ་མོ་དཀྲོལ་ཡོད།  

བསྐལ་པ་བརྒྱ་ཕྲག་བརྒལ་ཡང་བགྲེས་རྒུད་མེད།།

སྐྱེ་གཟུགས་མངོན་སྟངས་ཞིག་གི་འགྱུར་ལྡོག་མེད།།

སྙན་མོ་པི་ཝང་དཀྲོལ་ལ་ངར་མ་མོ།།

གཏམ་གྱི་བསུ་མ་བསུ་བའི་གྲོགས་སུ་ཤོག།

སྐྲ་ལོ་སིལ་སིལ་འོག་གི་འོད་གོར་གོར།།

མིག་བཟུང་སྨུག་པོ་གཡོ་ཞིང་ལྡེམ་ལྡེམ་འཁྱུག།

མཆུ་སྒྲོས་དམར་པོ་འདར་འདར་སིག་སིག་གིས།།

སྙིང་ཤ་རློན་པ་བཙག་ལ་བགྲང་དུ་ཅི།།

སྟོད་གོས་ཟིང་སྐྱ་འོག་གི་གོང་གཟུགས་དང་།།

གྱེད་གུག་དབར་གྱི་འབུར་འབུར་ཉག་ས་དག།

ལུས་པོ་གཡོ་སྟངས་ཞིག་གིས་སེམས་པ་དག།

མེ་ཞིག་ཡིན་ན་བྱང་ཁོག་ཚིག་ལ་ཁད།།

སེང་རས་སྨུག་པོའི་འོག་གི་འཕོང་ཚོས་ཟུང་།།

གོམ་པའི་འདེགས་འཇོག་དབར་གྱི་གཡོ་སྟངས་ཤིག།

ས་ལ་ཟག་ཡོང་སྙམ་པའི་སེམས་ཚེགས་ཤིག།

གོས་ཐུང་ཆུང་ཆུང་བཙིར་བ་ཚད་ཅིག་ཅི།།

སྟོད་གཡོགས་ཟིང་སྐྱ་རལ་ལ་ཁད་འགྲོ་རེད།།

སྨད་གཡོགས་སྨུག་པོ་གས་ཏེ་ཐོར་གྲབས་འདུག།

བྱང་ཆ་དོད་པའི་གོམ་པའི་འདེགས་འཇོག་དེ།།

སུ་ཡིས་རིག་ན་སྣང་བ་དབྱིངས་ལ་ཐིམ།།

ཡ་གི་བླ་མ་ཌཱ་དྲིལ་དཀྲོལ་མཚམས་བོར།།

སྡོམ་གསུམ་མཁན་པོ་སོར་མདོ་ཀློག་མཚམས་གཏོར།།

འཁོས་མེད་སྤྲུལ་སྐུ་མིག་གོང་དོན་གྲབས་འདུག།

གྲྭ་ལྡུམ་དར་མ་མཛུབ་མོའི་དབར་ན་བསྒོམ།།

དཔོན་པོ་དག་གི་གཡོ་སྒྱུའི་རྨུ་ཐག་ཆད།།

ཕྱུག་ཆེན་དག་གིས་བསླུ་བའི་བསྐལ་པ་དབེན།།

སྒྱུ་རྩལ་མཁས་པའི་པིར་གྱིས་མཚོན་ནུས་མིན།།

སྙན་དངགས་མཁན་པོ་ངག་གི་བརྗོད་པ་རྨོངས།།

འོན་ཀྱང་དབྱིངས་ལ་ཤར་བའི་གྲིབ་གཟུགས་དེ།།

ཡི་གེའི་གཟུགས་སུ་བཞེངས་པ་བསྐལ་པར་ལྕི།།

ཀུན་རྟོག་དབྱིངས་ལ་རུམ་པའི་འཇའ་ཚོན་དེ།།

སྣང་བ་གླུ་རུ་རུམ་ན་སྙན་ཤོས་རེད།།

ཧི་ཧི་ཞེས་པའི་གད་མོ་ཙིག་ཙིག་དང་།།

གུས་ཉམས་ཚུལ་གྱིས་འདོད་རྒུར་འཁྱིལ་པའི་གླུ།།

དུང་པ་ཞེ་ལ་རུམ་པའི་དབྱངས་སུ་བཀུག།

རྨི་ལམ་ཁྲོད་ཀྱི་རོལ་མོ་སྙན་ཤོས་རེད།།

ཇ་ཁང་ནང་གི་ཚིག་ཇ་ཞིམ་ཤོས་རེད།།

ཁ་པར་ནང་གི་བྲོ་བ་ཆེ་ཤོས་རེད།།

གང་ནས་བསམ་ན་ཡིད་ལ་མཛེས་ཤོས་རེད།།

མང་པོའི་སེང་ན་ཁྱེད་རང་ཡག་ཤོས་རེད།།

༢༠༢༡/༠༦/༠༦

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-འཇིགས་མེད་འཕྲིན་ལས་ལགས་ཀྱི་སྙན་ངག་ཚན་པ་གཉིས།

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།