དོལ་པོ་ཤེས་རབ་རྒྱལ་མཚན། (སྔ་འགྱུར་མཐོ་སློབ་ཆེན་མོ།)
དུས་འགྱུར་རླུང་ནག་འཚུབ་དུས།།
མེ་མདའི་དྲག་ཆར་ཁྲོད་ནས།།
གཡུལ་ལས་རྒྱལ་བའི་དཔའ་བོ།།
ཆ་མེད་གཞན་ཡུལ་ལུང་པར།།
རྒྱུས་མེད་གསར་འབྱོར་སྡུག་དུས།།
ཤི་གསོན་གཉིས་ཀའི་དེད་དཔོན།།
ཁྱེད་རང་དངོས་གནས་སུ་རེད།།
ཟས་གོས་རག་ལ་མི་རག།
རང་མགོ་སུ་ཐོན་ལྟ་དུས།།
བསྟན་དོན་ཁོ་ན་མཛད་མཁན།།
ཁྱེད་རང་དངོས་གནས་སུ་རེད།།
ཆོས་མིན་སྲིད་མིན་གང་ཡིན།།
མགོ་བདེ་དྲན་འཕྲུལ་ཅན་ཚོའི།།
ངན་གཡོའི་རྒྱ་རུ་མ་ཚུད།།
ཁྱེད་རང་དངོས་གནས་སུ་རེད།།
ཕ་ཁྱིམ་གཞན་ལག་ཤོར་ནས།།
རས་གུར་ནང་ལ་བཞུགས་དུས།།
སིདྡྷི་དུང་སྒྲུབ་འཛུགས་མཁན།།
ཁྱེད་རང་དངོས་གནས་སུ་རེད།།
རྫ་མའི་ཁང་པ་ཆུང་ཆུང་།།
གཟིམས་ཁང་མཛད་ནས་བཞུགས་སྐབས།།
དགོན་ཆེན་འདི་འདྲ་བཞེངས་པ།།
ཐུགས་ལ་འཁོར་མཁན་སུ་རེད།།
ས་དེ་མི་འཕྲོད་གཞན་རེད།།
ཆུ་དེ་མི་འཕྲོད་གཞན་རེད།།
གཞན་ཡང་གཞན་ལ་རེ་དགོས།།
ཐུགས་སྟོབས་མ་ཞུམ་དཔེ་རེད།།
རང་ལ་འདང་ངེས་མེད་ཀྱང་།།
ད་དུང་གཞན་ལ་གནང་མཁན།།
རང་དོན་གཞན་དོན་འཛོལ་བའི།།
ཁྱེད་རང་དངོས་གནས་སུ་རེད།།
ཀླ་ཀློས་བསྟན་པ་སྣུབ་དུས།།
ཁྱེད་རང་ཁོ་ན་བྲེལ་བ།།
བསྟན་དང་འགྲོ་བའི་དོན་ཆེན།།
ཁྱེད་རང་ཁོ་ནས་བཞེས་སམ།།
བླ་བྲང་ཡིག་ཚང་མེད་སྐབས།།
ཕྱག་མཛོད་དངུལ་གཉེར་མེད་སྐབས།།
བཤད་སྒྲུབ་བསྟན་པ་འཛུགས་པའི།།
ཐུགས་བསྐྱེད་གང་ནས་འཁྲུངས་སམ།།
དགེ་རྒན་ཡོད་པའི་དུས་ན།།
དགེ་ཕྲུག་མེད་པའི་འོ་བརྒྱལ།།
འོ་བརྒྱལ་ཅི་འདྲའི་ཆེ་ནའང་།།
བཤད་སྒྲུབ་བསྟན་པ་སྤེལ་ལམ།།
དགེ་ཕྲུག་ཡོད་པའི་དུས་ན།།
དགེ་རྒན་མེད་པའི་འོ་བརྒྱལ།།
འོ་བརྒྱལ་གཅིག་མཐུད་གཉིས་མཐུད།།
ཁྱེད་རང་དངོས་གནས་སུ་རེད།།
གྲྭ་མང་འཚོ་བའི་མཐུན་རྐྱེན།།
ཉིན་རེ་ཉིན་རེར་སྒྲུག་དུས།།
བླ་མ་འོ་མའི་ཚོང་པ།།
ཁྱེད་རང་དངོས་གནས་སུ་རེད།།
མཚམས་རེར་འོ་མ་རུལ་ནས།།
འོ་རིན་མེད་ནས་ཕེབས་དུས།།
མཚན་མོའི་མནལ་ཐབས་ཆག་མཁན།།
ཁྱེད་རང་དངོས་གནས་སུ་རེད།།
ཐོ་རེངས་བྱ་ཕོ་མིན་ལ།།
མཚན་མོའི་རྟ་ཕོ་མིན་ཡང་།།
སྔ་ལངས་ཕྱི་ཉལ་གནང་མཁན།།
ཁྱེད་རང་དངོས་གནས་སུ་རེད།།
ས་ཆ་རྒྱ་གར་ལུང་པར།།
ཉིན་མོའི་ཚ་གདུག་ནང་དུ།།
ཕྱི་ལྤགས་ཞུས་པའི་ཨར་པ།།
ཁྱེད་རང་དངོས་གནས་སུ་རེད།།
ཐན་དང་མུ་གེའི་འཇིགས་པས།།
ཞིང་པའི་བསོད་ནམས་ཟད་དུས།།
ཆར་པ་བླ་མར་འབོད་པ།།
ཁྱེད་རང་དངོས་གནས་སུ་རེད།།
ཐབ་ཚང་ནང་ལའང་ཁྱེད་ཡོད།།
གྲྭ་ཕྲུག་ཁྲོད་ནའང་ཁྱེད་ཡོད།།
གང་དང་གང་དུའང་ཁྱེད་ཡོད།།
ཁྱེད་རང་དངོས་གནས་སུ་རེད།།
༸སྐྱབས་རྗེའི་གྲུབ་དབང་པདྨ་ནོར་བུའི་དགོངས་རྫོགས་དུས་དྲན་ཉིན། ༢༠༢༣/༠༣/༢༢
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།