གནམ་ཞབས་མའི་སྦུབས་བཤད།

(མདོ་ཁམས་ཁྱུང་པོའི་གྲྭ་གཞོན་རྩོམ་པ་པོ་ཤེལ་སྐྱེས་ཁྲི་གསེར་རིག་པའི་མདའ་མོས་བརྩམས་པའི་དུང་བརྗོད་སྙན་དེབ་«ཚངས་སྲས་མེ་ཏོག་»གི་ཀླད་དུ་སྤེལ་བའི་ཤིས་བརྗོད།)

འབུམ་རམས་པ་དགེ་བཤེས་ཆོས་འཁོར་ཚང་རིན་པོ་ཆེ།

དག་སྣང་དཀྱིལ་འཁོར་ཡངས་པའི་གནའ་གྲོང་ན། །

སྒྲོ་འདོགས་ཤོབ་པོ་ཆེ་ཡི་འུད་དབྱངས་མཐོ། །

བསམ་གྱིས་མི་ཁྱབ་ཅེས་པའི་རྡབ་ཞོགས་གསེང་། །

དངོས་ཡོད་བདེན་པའི་ནུས་སྟོབས་ཡལ་ལ་ཁད། །

ཟོལ་མའི་གདོང་འབག་མཐུག་པའི་རྫུ་འཕྲུལ་གྱིས། །

རབ་བཏགས་གསོབ་ཚིག་སྣ་ཚོགས་འུར་བའི་དཀྱིལ། །

ཚོར་བ་སྒྲེན་མོར་འདོན་པའི་སྙིང་ཁམས་ཅན། །

སྒྱུ་རྩལ་དཔའ་བོ་ཁྲི་གསེར་རིག་པའི་མདའ། །

སྨན་ཆུང་ལྕང་ལོའི་ཉག་མ་མ་འབྱར་བའི། །

ངུར་སྨྲིག་མདོག་འཆང་གཟན་ཤམ་ཐུ་ཀློག་ནས། །

འཇེབས་པར་སྨྲས་པའི་སྙན་ངག་ཚོམ་བུ་དག །

ཚུལ་དང་ཁྲིམས་ཀྱིས་མ་བསྡམས་སྟབས་སུ་ལེགས། །

གངས་མོའི་ལང་ཚོའི་མཛེས་པ་བཏུངས་པ་ལས། །

བཙུན་ཆུང་དར་མའི་བློ་སེམས་སྦྲིད་པའི་རྐྱེན། །

དགའ་ཚོར་ཉམས་ཀྱིས་མྱོས་པའི་སེན་མོའི་རྗེས། །

སྒྱུ་རྩལ་བྲང་སྐྱེས་འོ་འཛིན་ངོས་སུ་དོད། །

མཐོ་སྒང་གངས་རིའི་གླུ་མ་གཞོན་ནུ་ཚོའི། །

ལྐོག་སྙན་གྲེ་བའི་འགྱུར་ཁུགས་སྣ་ཚོགས་ལ། །

ལོངས་སུ་རོལ་བས་བདེ་བའི་འཁུན་སྒྲ་ཡང་། །

སྡེ་ཚོགས་ཁྲོམ་པ་དག་གི་རྣ་བར་ལྷུང་། །

སེམས་ཚོར་ངོ་གྲུང་གླུ་རུ་བླངས་པའི་དབྱངས། །

སྤྲོ་དགའི་ཉམས་ཀྱིས་བྲོ་རུ་བརྡུངས་པའི་སྟབས། །

སྒྱུ་རྩལ་ཕབས་ལ་བསྙལ་བའི་ཆང་རྒོད་གླུམ། །

ཇི་སྙེད་བཙགས་ཀྱང་སྦང་མའི་སིངས་པོའང་ཞིམ། །

དག་སྣང་ཉེ་ཉེར་ཇི་ཙམ་བཅར་བ་ཡིས། །

དངོས་ཡོད་དེ་ཙམ་ཕར་ཕར་རིང་དུ་གྱེས། །

སེམས་ཀྱི་འཆར་སྒོར་ཕྱི་ནང་གསང་གསུམ་ལས། །

དོན་གྱི་དངོས་པོར་སྐོགས་དང་སྦུན་མ་བྲལ། །

སྦྱོར་སྒྲོལ་ཡར་འདྲེན་སྒྲོབ་བཤད་ཆེ་བའི་ནང་། །

རྫིང་ལམ་རྡུལ་ལམ་སོ་སོར་ཤེས་པ་དཀོན། །

གཡའ་ཆུ་འཛག་སའི་ཁུང་བུ་བཞི་པོ་དག །

བུད་མེད་རང་ལའང་རྒྱུས་མངའ་མེད་པར་གནས། །

དག་སྣང་ཞིང་ན་དེ་ཕོས་ངར་སྒོང་གཏོང་། །

དངོས་ཡོད་གླིང་ན་མཚའ་ལུའི་ཕོ་རྟགས་བུད། །

དེ་མཚུངས་ཁྱིམ་བྱ་དེ་མོ་ཆུ་མས་དབེན། །

སྒོ་ང་བཤང་བའི་ལམ་ནས་འཐོན་པ་དངོས། །

ཕ་ཝང་བྱ་མ་བྱི་ཉིད་སྒམ་ན་ཡང་། །

ཇི་ཙམ་འཁྲིག་པར་ཞུགས་ན་སྒོང་རྡོག་རྒྱས། །

རླིག་འབྲས་མཁྲང་བ་ཙམ་གྱིས་ཀླད་པ་འཁུམ། །

དགེ་འདུན་སྡེ་ལ་སྙན་པའི་གཏམ་དུ་འགྱུར། ། 

རྟོག་བཟོའི་འཆར་སྣང་རྒྱ་ཅན་ཕ་རོལ་གྱི། །

ཁྱིམ་གྱི་མདོ་དང་དགའ་བའི་བསྟན་བཅོས་ལས། །

གསང་བའི་སྒྱུ་རྩལ་འགའ་ལ་འདྲིས་པས་ཀྱང་། །

འཚོ་བར་ཁ་ཐོག་ལག་བཞག་ཕན་འདྲོང་སྨན། །

ནང་བཅུད་ལྷ་དང་ལྷ་མོའི་དག་སྣང་ཁྲོད། །

སྐྱེས་མའི་འགྲོ་དབང་འཕྲོག་པའི་མགོན་ཁང་མང་། །

སྒང་པ་བོད་ལ་བདེ་སྐྱིད་ལྡན་གྱུར་ན། །

རྒྱལ་པོ་བཙུན་མས་བྱས་ཀྱང་འགྲིག་པར་བསྙད། །

གང་གཱའི་ལྷ་མོས་ཕོ་ལུས་བླངས་པའི་རྗེས། །

གཞི་ནས་མངོན་སངས་རྒྱས་པར་བཀའ་འགྱུར་ལུང་། །

མི་ཆོས་གཙང་མ་བཅུ་དྲུག་བསྒྲགས་པའི་ནང་། །

སྐྱེས་མར་མ་བགྲོ་རང་ཐག་གཅོད་པར་བསྐུལ། །

ཆུང་རྨ་གཉོད་ཀྱིས་བླུ་བའི་སྲོལ་ངན་གྱིས། །

ཁྱི་དང་ནག་མོར་རྡུང་དགོས་ཁ་དཔེར་བཀོལ། །

བུ་མོ་ཁོ་ན་བཙས་པའི་སྐྱེད་མ་རྣམས། །

ཚང་ནག་མིང་བརྡས་གཙེར་ཞིང་ཁོལ་མོར་བཀོལ། །

སྡིག་པ་མི་དགེས་དབེན་པའི་མཐོ་སྒང་ན། །

མཚན་འགྲུལ་ཁྱི་རྡུང་བྱི་པོས་སྣགས་པའི་ལས། །

འགངས་ཆུང་སྣང་མེད་དཀྱུས་མར་བོར་བའི་སྲོལ། །

ཚབས་སུ་ཆེ་བས་སད་རྟོགས་དོ་གལ་ཆེ། །

མཁྱེན་པའི་གཙོ་མོ་ལྷ་མོ་དབྱངས་ཅན་མ། །

ནོར་གྱི་བདག་མོ་དཔལ་མོ་ནོར་རྒྱུན་མ། །

སྟོབས་ཀྱི་དབང་མོ་ནག་མོ་དཀའ་ཟློག་མ། །

རིག་བྱེད་སྐྱེས་པའི་ཁེངས་དྲེགས་ད་དུང་མཐོ། །

འཕགས་པའི་ཡུལ་དུ་ཡུགས་མོ་གསོན་པོར་སྲེག །

མི་རིགས་ནག་པོས་བུ་མོའི་མཚན་མ་འདྲུབ། །

ཁ་ཆེ་ཕལ་གྱིས་མནའ་མ་ཧྲིལ་གཏུམ་རྒྱག །

རྒྱ་ནག་ཕྱོགས་སུ་མཛེས་མའི་རྐང་མཛུབ་ལྟེབ། །

ཁྲམ་པ་ཟོག་པོ་འགྱིང་བའི་དུས་རབས་འདིར། །

རྫུན་དང་གཡོ་སྒྱུ་གཤོར་བར་ཕོད་ལྟ་ཞོག །

དྲང་པོ་ཁྲིམས་ལ་སྦྱོར་མཁན་མང་དྲགས་པས། །

དངོས་ཡོད་གྱོད་ལ་ཐོགས་པར་ཉེན་ཚབས་ཆེ། །

བློ་སྦུག་འཐུམས་པར་མི་སྡོད་ཤེལ་སྐྱེས་བུས། །

འཆག་འགྲེང་འདུག་ཉལ་སྒྱུ་རྩལ་ཁོ་ནར་བསྟིམས། །

དངོས་བྱུང་སེམས་ཚོར་གླེང་བའི་རྟུལ་ཕོད་ཀྱིས། །

རྫུ་བཟང་ཆོས་པའི་སེམས་པ་ཚེར་མར་བཏང་། །

ལུས་པོའི་ཕྱེད་ཀ་གཤེར་འཛིན་ཆུ་ལགས་ཀྱང་། །

མིག་ནས་ཟག་པའི་ཐིགས་པར་རིན་ཐང་ཆེ། །

རབ་འཛག་དྲི་ཆུར་རྩིས་དང་མཐོང་མེད་ཀྱང་། །

ཚོར་བ་སྐྱེན་པོས་འཆོར་ན་ངོ་མཚར་གནས། །

ལིང་ལིང་འཕག་ལ་རྡིག་རྡིག་གྲག་པ་ཡི། །

ངག་རིག་རྩལ་སྐྱེན་ཡང་བའི་དམར་ཆུང་སྙིང་། །

སྣང་ཤས་མིན་པའི་འདང་བརྩེ་བོད་མོ་ལ། །

དུངས་པས་«སྙན་དེབ་ཚངས་སྲས་མེ་ཏོག་»བཞད། །

མགོ་ལོག་དར་ལག་པད་མཚོ་སྙིང་ཁོང་བསྲེལ། །

ཡུལ་ཤུལ་རེ་བཟའ་བུ་མོ་པིར་རྩེས་བླངས། །

འཕྱོངས་རྒྱས་ཟླ་བ་སྒྲོལ་མ་ག་ལ་བསྐྱུད། །

ཆོལ་གསུམ་མེ་ཏོག་ཟིལ་མངར་སེམས་ཀྱིས་བཞིབས། །

རྫི་གླུ་རིང་མོས་མུ་མེད་རྩྭ་ཐང་གཞལ། །

ལ་གཞས་ཚིག་ཞགས་རོགས་ལོའི་སྙིང་ཁར་འཕངས། །

ནང་མའི་སྟོད་གཞས་ཆང་ཕོར་ཁ་རུ་འཁྱིལ། །

དབྱངས་སྣ་འཛོམས་པའི་མགྲིན་རྟ་རྣ་བར་སིམ། །

ཕོ་མོར་ལྟ་ཚུལ་དོ་རུ་མ་བསྙམས་པས། །

གཟུ་དང་དྲང་པོའི་སྐལ་བ་ངང་གིས་ཆད། །

བསྟོད་ན་འོས་ཤིང་རན་པའི་བོད་མོའི་ཚོགས། །

ཐོབ་ཀྱི་སྐལ་དམྱིགས་དེ་རིང་འདི་ནས་བསབས། །

འདི་ནི་དྲང་བདེན་ཡུལ་པོར་སེམས་གསོ་ཞིག །

འདི་ཡིས་ཚུལ་འཆོས་སེམས་ལ་ཟ་འཕྲུག་བསླངས། །

འདི་ནི་དངོས་ཡོད་ཁེར་རྐྱར་གཞོགས་འདེགས་ཤིག །

འདི་ཡིས་བྱ་པའི་འཚོ་བར་རེ་བ་བསྐྱིལ། །

བརྡ་ཆད་རྙིང་པས་གཏམས་པའི་མཛོད་ཅིག་ཡོད། །

ཉམས་འགྱུར་ཚིག་ལ་བྱང་བའི་རྩལ་ཞིག་ཡོད། །

ཞུམ་དང་འཁུམ་པ་མེད་པའི་ཕོད་ ཅིག་ཡོད། །

ཤེལ་སྐྱེས་རིག་པའི་བུ་ལ་ལྗིད་ཅིག་ཡོད། །

     ཅེས་པ་འདི་ནི་མདོ་ཁམས་ཁྱུང་པོའི་གྲྭ་གཞོན་རྩོམ་པ་པོ་ནམ་མཁའ་ལྷུན་གྲུབ་བམ། ཤེལ་སྐྱེས་ཁྲི་གསེར་རིག་པའི་མདའ་མོར་འབོད་པས་བརྩམས་པའི། སྙན་རྩོམ་ཕྱོགས་བསྒྲིགས་དེབ་ཕྲེང་ལྔ་པ་དུང་བརྗོད་སྙན་དེབ། «ཚངས་སྲས་མེ་ཏོག་»གི་འགོ་རུ་བརྗོད་པའི་ཤིས་ཚིག་གི་ཟོལ་དུ་སྐུལ་ངོ་མ་ཟློག་ཙམ་ཞིག དོལ་པོའི་རྒྱལ་ཁམས་པ་ཆེན་པོ་ཆོས་འཁོར་ཚང་ཉི་མ་འོད་ཟེར་དུ་འབོད་པས། “མཛེས་བྱེད་”(ཆུ་མོ་ཡོས་ལོ་)རྫོགས་ནས། “ཁྲོ་མོ་”(ཤིང་ཕོ་འབྲུག་ལོ་)ཤར་ལ་ཉེ་བ་སྟེ་ ༢༠༢༤།༠༡།༢༨ ཉིན་བགྱིས་པའོ།། །།