དོལ་པོ་པདྨ་བཀྲ་ཤིས། སྔ་འགྱུར་མཐོ་སློབ་ཆེན་མོ།
གཤིས་རྒྱུད་གསེར་ལས་དྭངས་པའི་ཡུལ་མི་གཅིག།
གནའ་དེང་སྲོལ་གཉིས་ཚང་བའི་ཡུལ་ལུང་གཉིས།།
བརྩེ་སེམས་དམ་ཚིག་གཙང་བའི་ནང་མི་གསུམ།།
མཆོད་རྟེན་རྣམ་གསུམ་གཙོས་པའི་གནས་ཆེན་གཅིག།
ཆོས་ལུགས་ལག་རྡང་སྦྲེལ་བའི་མཛའ་མཐུན་གཉིས།།
སྔར་སོང་ལོ་རྒྱུས་རིང་བའི་གཏམ་རྒྱུད་གསུམ།།
དྲུག་འཛོམས་ཡམ་བུའི་རྒྱལ་ས་བོར་ནས་ཐལ།།
བརྗིད་ཆགས་རི་བོའི་ངོས་ཡངས་རྩི་ཤིང་གཅིག།
དངས་གཙང་རླུང་གི་རྟ་ཕོའི་བང་འགྲོས་གཉིས།།
མ་བཅོས་རང་བྱུང་ཁམས་ཀྱི་མཛེས་སྡུག་གསུམ།།
དགུ་འཛོམས་བལ་ཡུལ་གླིང་ནས་ལྷོ་རུ་ཕྱོགས།།
ཧི་མ་ལའམ་བོད་རིགས་སྣ་འཛོམས་གཅིག།
འཛམ་གླིང་མི་རིགས་ལྷག་མེད་འདུས་པ་གཉིས།།
མགོ་ནག་མི་རིགས་དབུ་འཕང་མཐོ་ས་གསུམ།།
བཅུ་གཉིས་རྒྱན་ཏུ་བཏགས་པའི་ཡུལ་ནས་བརྟོལ།།
མནའ་ཉམས་དོད་པའི་ཁང་བཟང་བརྩེགས་མ་གཅིག།
ཞིམ་མངར་ཁ་ཟས་སྣེ་འཛོམས་རོ་བཅུད་གཉིས།།
ཚོན་མདངས་བཀྲ་བའི་དར་ཟབ་གོས་དང་གསུམ།།
བཅོ་ལྔས་གཞན་ལས་འཕགས་པའི་ཡུལ་ནས་འོངས།།
ལང་ཚོ་གསར་དུ་འབུས་པའི་གཞོན་ནུ་གཅིག།
རྣམ་འགྱུར་ཅི་ཡང་སྟོན་པའི་སྨན་ཆུང་གཉིས།།
བགྲེས་སོང་ལོ་ན་རྒན་པོའི་བརྗིད་ཉམས་གསུམ།།
བཅོ་བརྒྱད་ཚང་བའི་ཡུལ་ལྗོངས་རྒྱབ་ཏུ་བཞག།
འཇམ་པའི་སྐད་ངག་སྙན་མོའི་སྐྱེལ་བསུ་གཅིག།
ཞལ་འཛུམ་སོ་ཕྲེང་འོད་གུར་ཕུབ་སྟངས་གཉིས།།
གུས་པའི་བཀུར་སྟིས་གཞན་ཡིད་ཚིམ་བྱེད་གསུམ།།
ཉེར་གཅིག་དུས་ཀྱི་གོ་ལའི་ལྟེ་ནས་ཕྱོགས།།
ལན་གཅིག་སྒྱུ་ལུས་ཡུལ་གཞན་འཕངས་ཀྱང་རུང་།།
སེམས་ཀྱི་ཁ་ཕྱོགས་མ་འགྱུར་ཇེ་བརྟན་སོང་།།
ནང་མི་ཉེ་འབྲེལ་ཐག་རིང་བྲལ་ན་ཡང་།།
སླར་ཡང་ལྷན་འཛོམས་ཉི་མ་མགྱོགས་མྱུར་ཤོག།
ནང་མའི་ཉེ་འབྲེལ་ཚང་མས་རྒྱབ་སྐྱོར་རྒྱ་ཆེ་བསམ་ཡུལ་ལས་འདས་པ་གནང་སོང་བས། འདི་ནས་སྟབས་གཅིག་ཏུ་བཀའ་དྲིན་ཆེ་ཞུ། འབྲེལ་ཡོད་ཁྱེད་རྣམས་བྱ་བ་ལམ་འགྲོ་ནད་མེད་ཚེ་རིང་བསམ་དོན་ཆོས་བཞིན་འགྲུབ་པའི་བཀྲ་ཤིས་སྨོན་འདུན་དང་བཅས། ༢༠༢༤/༠/༡༣ སྟོད་བྱ་ལམ་གོང་མའི་མཁའ་དབྱིངས་སུ་ཉམས་དགའ་གླུ་རུ་བླངས་པའི་ཚིག་གསུམ་མོ།།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།