སྙན་རྩོམ་རིག་པའི་ཤེས་བྱ་གནད་བསྡུས།

དོར་ཞི་གདོང་དྲུག་སྙེམས་བློ།

ཡོང་ཁུངས། ཀུན་ཕན་ཁ་བའི་འཕྲིན་སྟེགས།

བརྗོད་བྱའི་རང་བཞིན་ཁྱད་ཆོས་འབུར་དོད་དུ། །

སྟོན་པ་སྐྱ་ཐིག་སྟེང་དུ་ཚོན་བསྒོས་འདྲ། །

བརྗོད་དོན་དངོས་སུ་བརྗོད་མིན་མཚོན་དོན་གྱི། །

དངོས་པོ་གཞན་ཞིག་བརྗོད་བྱར་བྱས་པ་ལས།

བརྗོད་དོན་དངོས་དེ་དོན་གྱིས་རྟོགས་བྱེད་པའི། །

བསྡུས་བརྗོད་སྙན་ཚིག་མཛོད་ཀྱི་ཡིད་བཞིན་ནོར། །

མིག་ཟུར་ལ་སོགས་བརྡ་ཐབས་ཕྲ་མོ་ཡིས། །

འདོད་དོན་སྦས་པའི་ཚུལ་གྱིས་མཚོན་པ་དང་། །

ཚིག་ཟུར་ལས་ནི་བརྗོད་དོན་གཞན་སྟོན་པའི། །

ཚིག་སྦྱོར་བུ་རམ་སྒོར་མའི་རོ་དང་འདྲ། །

ཕྱི་ཡི་ལུས་ཀྱི་བྱ་སྤྱོད་ཁ་ཡི་ཚིག །

གདོང་དང་མིག་གི་རྣམ་འགྱུར་བརྗོད་པ་ལས། །

ནང་སེམས་དགའ་སྡུག་ཆགས་སྡང་བག་ལ་ཉལ། །

སྟོན་པའི་ཚིག་སྦྱོར་བྱང་ཁོག་ལྟ་བའི་ཤེལ། །

སེམས་ལྡན་མི་ཡི་ཁྱད་ཆོས་སེམས་མེད་ཀྱི། །

དངོས་པོ་སྟེང་དུ་འདོད་པས་བཏགས་བྱས་ཏེ། །

སེམས་མེད་སེམས་ལྡན་ཁྱད་ཆོས་ལྡན་པ་ཡི། །

གསོན་ཉམས་སྟེར་བའི་ཐབས་མཆོག་རབ་རྟོག་བསྟེན། །

ཚིག་ཕྱིར་དོན་འཚོལ་ལོང་བས་ལག་སྙོབ་ལྟར། །

གང་བྱུང་མ་ཡིན་དོན་ཉམས་ཐོན་པའི་གསོས། །

སྒྲ་རྒྱན་སྙན་འཇེབས་གླུ་མའི་མགྲིན་པའི་གདངས།

པི་ཝང་གླིང་བུའི་སྒྲ་དང་བསྡེབས་བཞིན་སྙན། །

མཚོ་ཡི་ནང་གི་གསར་སྐྱེས་པདྨོ་བཞིན། །

དཔེ་ཡང་གསར་བ་གསར་བ་སྦྱོར་བ་དང་། །

ཉམས་ཡང་གསར་བ་གསར་བ་འདོན་པ་གལ། །

མི་བརྒྱ་ཚིག་གཅིག་རྩོམ་ལ་མཚར་ཅི་ཡོད། །

ཚིག་སྦྱོར་གྱོང་བ་མི་ལེགས་ནུས་མེད་པ། །

སོ་ཡིས་མི་ཆོད་རུས་ཀོང་ཁར་བཞག་དང་། །

ཤ་ལ་མི་འབྱར་ཀོ་སྐམ་ལུས་གཡོགས་དང་། །

གནད་ལ་མི་ཕིགས་ཞན་འབིགས་བཟུང་བ་བཞིན། །

བརྗོད་བྱའི་དོན་གྱི་གནད་འགག་སྤར་བཅངས་ཏེ། །

སྒྲ་ཇི་བཞིན་དང་ཇི་བཞིན་མིན་པ་དང་། །

དངོས་སྟོན་ཤུགས་སྟོན་དོན་གྱིས་སྟོན་པ་སོགས། །

རྩོམ་ལུགས་སྣ་མང་སྐབས་བབ་གང་མཁོ་གདམ། །

ནམ་མཁའི་དབྱིངས་སུ་ཟླ་བའི་རང་གཟུགས་མཐོང་། །

མཚོ་ཡི་ནང་དུ་ཟླ་བའི་གཟུགས་བརྙན་མཐོང་། །

ཀུ་མུད་འདབ་ལས་ཟླ་བ་འཆར་ནུབ་ཤེས། །

བརྗོད་བྱ་སྟོན་པའི་ཐབས་ཚུལ་དེ་ལས་ཤེས། །

ལ་ལས་ཉིན་བྱེད་ཚ་དྲོད་འབར་བ་དང་། །

འོད་སྣང་གསལ་བའི་ཆ་ནས་ཁྱད་འཕགས་སྟོན། །

ལ་ལས་གྲང་ངར་མུན་སྟུག་བཟློག་དཀའ་བ། །

ལྷག་མེད་བསལ་བའི་ཆ་ནས་ཁྱད་འཕགས་སྟོན། །

མེ་ཏོག་གསར་སྐྱེས་གཅིག་ལས་དབྱར་དུས་ཤེས། །

ཤིང་ལོ་སེར་བོ་གཅིག་ལས་སྟོན་དུས་ཤེས། །

སྙན་རྩོམ་བཟང་བོ་ཚིག་ཉུང་དོན་མང་བ། །

རྡུལ་ཕྲན་གཅིག་ཏུ་གཟུགས་ཁམས་འདོམས་པ་བཞིན། །

བསམ་པ་རྣམ་དག་སྤྱི་ཚོགས་དོན་ལ་དམིགས། །

ལྟ་བ་རྣམ་དག་ལོ་རྒྱུས་འཁོར་ཕྱོགས་མཐུན། །

སྤྱོད་པ་རྣམ་དག་གཞན་གྱིས་མ་ཐོན་པའི། །

མཐོ་ཟབ་གསར་བའི་ཁྱད་ཆོས་གདོན་པར་བྱ། །

འདམ་གྱི་རྒྱུ་ཆ་གཅིག་ཀྱང་བཟོ་བོ་ཡིས། །

ལག་རྩལ་ཁྱད་ཀྱིས་བཟོ་སྐུའི་ཉམས་བཟང་ངན། །

ཐ་དད་འབྱུང་བཞིན་རྩོམ་ཡང་རྩོམ་མཁན་གྱི། །

སྐྱེས་སྦྱངས་བློ་རྩལ་ལས་ནི་ཐ་དད་འབྱུང་། །

སྙན་རྩོམ་ཡིན་མིན་ངོ་བོའི་སྒོ་ནས་འབྱེད། །

ཚིགས་བཅད་སྙན་རྩོམ་ཁྱབ་མཉམ་འདོད་པ་འཁྲུལ། །

ཚིགས་བཅད་ཡིན་ལ་སྙན་རྩོམ་མིན་པ་དང་། །

སྙན་རྩོམ་ཚིགས་བཅད་མིན་པའང་མངོན་སུམ་གྲུབ། །

གཞུང་ལུགས་འཆིང་ཞགས་མ་ཡིན་སྒྲོན་མེ་ཡིན། །

གོ་རིགས་སྤྲང་ལག་མ་ཡིན་གཤོག་ཟུང་ཡིན། །

རྩོམ་འཆད་གཞན་ཟེར་དཔར་ཤིང་ཙམ་མིན་པར། །

ཉམས་རྟོགས་རང་འོད་འཕྲོ་བའི་ཉི་ཟླ་མཛོད། །

ནང་གི་མུན་པའི་གོ་འཕང་འཇིག་བྱེད་ཅིང་། །

མཚན་མོར་རྒྱུ་བ་རྣམས་ཀྱང་སྐྱོབ་བྱེད་པའི། །

རྩོམ་རིག་ལེགས་བཤད་ཉི་མ་གསར་བ་འདི། །

གདོང་དྲུག་སྙེམས་བློས་བློ་མཚོ་བསྲུབས་ལས་སྐྱེས། །