མི་ཕམ་འཇམ་དཔལ་དབྱངས་ཀྱི་ངང་ཚུལ་དང་སྔ་འགྱུར་རྙིང་མའི་གྲུབ་མཐའི་འཇོག་ཚུལ་ཅུང་ཟད་བརྗོད་པ་བཞུགས་སོ། །

རྩོམ་པ་པོ།: མདའ་མེ་ལྕེ། དཔལ་ཡུལ་དགོན།

ཡོང་ཁུངས།: སད་རན་འཕྲིན་སྟེགས།

ན་མོ་མཉྫུ་གྷོ་ཥཱ་ཡ།

རྣམ་འདྲེན་རྒྱལ་བ་མི་བསྐྱོད་མངོན་ཞིང་ནས།།

སྤྱན་སྔར་ཐུགས་བསྐྱེད་མཆོག་ཏུ་བྱས་པའི་མཐུས།།

རྣམ་དག་གྲུབ་པའི་གསང་ཆེན་མདོ་སྔགས་ལམ།།

སྤེལ་མཛད་ཀུན་མཁྱེན་བླ་མ་འགོས་ཕྱག་འཚལ།།

ཞིང་འདིར་བལྟམས་དང་རོལ་ཞིང་སྨིན་མཛད་པ།།

རྒྱལ་ཀུན་གྲུབ་པའི་བཀའ་ཡི་བསྡུ་བ་པོ།།

འཛིན་མའི་ཁྱོན་བཞིན་ཕྱོགས་བཅུར་མུ་མེད་ཁྱབ།།

ཡོངས་འཛིན་དགེ་བའི་བཤེས་གཉེན་ཁྱོད་ལ་འདུད།།

དཔག་ཡས་རྫོགས་སྨིན་སྦྱངས་གསུམ་རྩེ་མོར་སོན།།

བགྲང་ཡས་མི་ཟད་རྒྱལ་ཀུན་རིང་ལུགས་སྐྱོང་།།

མཐའ་ཡས་འགྲོ་བའི་རེ་སྐོང་ཡིད་བཞིན་ནོར།།

བསམ་ཡས་སྒྱུ་འཕྲུལ་དྲྭ་བ་ཁྱོད་ལ་འདུད།།

མདོ་ཁམས་ཟླ་ཆུའི་དགེ་བསྙེན་འཕེན་ཕྱུག་གནས།།

ཡ་ཆུའི་དིང་ཆུང་རིགས་རུས་སྐྱེ་བ་བཞེས།།

ཆུང་ནས་གཏེར་ཆེན་མཁྱེན་པའི་རྩལ་རྫོགས་པ།།

སྙན་གྲགས་མུ་མེད་འཕྲོ་བ་ཁྱོད་ལ་འདུད།།

འཇམ་དཔལ་སྒྱུ་དྲྭའི་གནད་ཀུན་གཅིག་བསྡུས་པ།།

འཇམ་དཔལ་ཡེ་ཤེས་སེམས་དཔའི་སྒྲུབ་ཐབས་མཆོག།

འཇམ་དཔལ་མཚན་བརྗོད་རྩེད་མོའི་ཞོར་ལ་ཡང་།།

འཇམ་དཔལ་དབྱངས་ཀྱིས་རྗེས་བཟུང་འགྲེལ་བ་མཛད།།

ལྷག་པའི་ལྷ་ཁྱོད་བྱང་སེམས་མཁྱེན་པའི་གཏེར།།

སྐྱེ་དགུའི་མིག་གྱུར་ཚད་མར་གྱུར་པ་དང་།།

རྒྱལ་བའི་གསུང་བཞིན་དབུ་ཚད་འཇིངས་བསྣོལ་ནས།།

ཤིང་རྟའི་ལམ་སྲོལ་སློང་མཁས་ཁྱོད་ལ་འདུད།།

མཁས་དགུའི་རལ་པ་གདན་བཏིང་རྨད་དུ་བྱུང་།།

སྨྲ་བའི་ཕྱོགས་ཀྱི་བཤེས་གཉེན་ཀུན་བསྟེན་ནས།།

རྨོངས་པའི་ཟུམ་ཁ་ཡེ་ནས་རྣམ་པར་གྲོལ།།

ལོག་སྨྲའི་ཚང་ཚིང་ཀུན་བསྲེགས་ཁྱོད་ལ་འདུད།།

དྲི་མེད་འོད་གསལ་སེམས་ཀྱི་བང་རིམ་རྩེར།།

འཇིགས་བྲལ་བསྙེལ་བ་མི་མངའ་གཞོན་ཚུལ་ཅན།།

མཁས་པའི་མཁས་པ་བགྲེས་རྒུད་དང་བྲལ་བ།།

སྨྲ་བའི་སེངྒེ་ཁྱོད་ལ་རྣམ་ཀུན་འདུད།།

གཞོན་བློ་ངང་ཚུལ་རབ་བརྗིད་ལྟ་ན་སྡུག།

མཁྱེན་ཡངས་རིས་མེད་འདོར་ལེན་མི་འགལ་སྒྲུབ།།

སྤྱི་དང་ཁྱད་པར་རབ་འབྱམས་གཞུང་ལུགས་ཀུན།།

སྤོབས་པའི་གཏེར་ཆེན་བརྒྱད་གྲོལ་ཁྱོད་ལ་འདུད།།

ཟབ་དོན་ཀུ་སཱའི་གདམས་ངག་དབྱིངས་ནས་ཆུབ།།

ནང་དུ་རིམ་གཉིས་ལྟ་དགོངས་མངའ་བརྙེས་ཤིང་།།

ཚིག་གིས་རྒྱས་འདེབས་ལྟ་རྟོགས་སྒྲོ་འདོགས་བསལ།།

པཎ་ཆེན་ལྔ་བརྒྱར་དབྱེར་མེད་གསོལ་བ་འདེབས།།

རྙོག་བྲལ་ཐེག་པའི་གཞལ་མེད་རྒྱ་མཚོ་ཆེར།།

མང་ཐོས་རྣམ་གྲོལ་དབུགས་ཆེན་ནོར་བུ་གཏམས།།

མཁས་མཆོག་ཀླུ་དབང་འབུམ་ཕྲག་རོལ་པས་བསྟེན།།

ཉམས་ལེན་གཏིང་རྫོགས་དྲོད་སྨིན་གསོལ་བ་འདེབས།།

དབང་འབྱོར་ཁྱོད་བློའི་རྣམ་དཔྱོད་ཆུ་ཤེལ་ལས།།

གྲུབ་པའི་ཀུན་གསལ་བརྒྱ་ཕྲག་ཅིག་ཅར་དུ།།

སྣང་བྱེད་རི་བོང་གཟུགས་ཀྱིས་འོད་ཟེར་དེས།།

ལོག་རྟོགས་འབྱུང་བྱ་གཏོར་ལ་གསོལ་བ་འདེབས།།

ཟབ་ཡངས་མཁའ་ལ་སྙིང་པོའི་སྤྲིན་ཆར་གྱིས།།

གདུལ་བྱའི་ཞིང་དུ་མྱུ་གུ་སྨིན་པར་མཛད།།

མི་ཤེས་ཁེངས་པའི་འཁྲུལ་བ་ཅིག་ཆར་བཅོམ།།

སྨྲ་བའི་ཀུན་མཁྱེན་དེ་ལ་གསོལ་བ་འདེབས།།

ལ་ལར་ཚིག་གི་རྟོན་པ་གཅིག་ཏུ་གོལ།།

ལ་ལར་དོན་གྱི་རྟོན་པ་གཅིག་ཏུ་འཁྱམས།།

ལ་ལར་སྒྲོ་འདོགས་མ་བྲལ་ངེས་ཤེས་གོལ།།

འདི་གསུམ་གཏན་བྲལ་ཁྱོད་ལ་ཕྱག་འཚལ་བསྟོད།།

གངས་ཅན་འདི་ན་ཚིག་དོན་རྣམ་པར་འཆེལ།།

ཚིག་ཙམ་བྱང་བའང་དཀོན་བཞིན་ཐོས་བསམ་གཞོལ།།

དཔྱད་པ་དང་བྲལ་ལ་ལར་བརྗོད་བྲལ་ཞེན།།

འདི་གསུམ་མཐར་ཕྱིན་དམ་པ་ཁྱོད་ལ་འདུད།།

ཤར་རི་སྤྲིན་དཀར་སྙེགས་པའི་ཀུན་གསལ་ངོས།།

སྒྲ་གཅན་མུན་སྒྲིན་གཏན་དུའང་མི་སྲིད་ན།།

དམ་པ་གང་གིས་དགོངས་གཏེར་ཟབ་མོ་ལ།།

འཁྲུལ་བྲལ་སྙེམས་ཐག་ཆོད་པ་ལ་ཕྱག་འཚལ།།

ལ་ལ་སྟོང་གསལ་དབྱེར་མེད་གྲུབ་མཐའ་འཇོག།

ལ་ལ་སྣང་སྟོང་དབྱེར་མེད་རྣམ་པར་འཆད།།

ལ་ལ་སྟོང་གསལ་སྣང་སྟོང་འགལ་འདུ་བཟུང་།།

དེ་གསུམ་འགལ་མེད་འཆད་པ་གུས་ཕྱག་འཚལ།།

ལ་ལ་རྫོགས་ཆེན་གཞིའི་བཞུགས་ཚུལ་ལམ།།

རིགས་བྲལ་ལུང་གིས་གྲུབ་མཐའ་ཁོ་ན་འཇོག།

ལ་ལ་རང་བྱུང་ཉག་ཅིག་ཐིག་ལེ་དེ།།

ལུང་ལ་མི་ལྟོས་གཏན་ཚིགས་ཁོ་ནའི་བསྒྲུབས།།

ཁྱོད་ཀྱིས་ལུང་བྲལ་རིགས་པའི་གཏན་ཚིགས་ལས།།

གཞི་དོན་ཡེ་ཤེས་ལྷུན་རྫོགས་འོད་གསལ་དེ།།

ལུང་རིགས་ཆེ་ཆུང་མེད་པར་འགོ་སྙོམས་པས།།

རྣམ་གྲོལ་ཉམས་སུ་ལེན་མཁས་ཁྱོད་ལ་འདུད།།

ཁ་ཅིག་ཉན་རང་གཙོར་བྱས་ཐེག་ཆེན་ལམ།།

སྤོང་ཞིང་རིགས་ཅན་བྱང་ཆུབ་ཐེག་པ་ལ།།

བགྲོད་པར་མི་ནུས་ཐེག་གསུམ་འགལ་བར་བཞེད།།

ཁྱོད་ཀྱིས་མི་འགལ་འཆད་མཁས་ལ་ཕྱག་འཚལ།།

ཁ་ཅིག་སྤྱོད་པ་ལམ་གོལ་ལྟ་བའི་རྫོང་།།

གསང་ཚིག་མི་ཤེས་གནོད་པ་ཁོ་ན་འཇོག །

ཁྱོད་ཀྱིས་ཕྲ་ཞིབ་སྤྱོད་པའི་ངེེས་བློ་ལས།།

ལྟ་བ་མཐར་ཐུག་ཟུང་འཇུག་ཡིན་པར་གསུངས།།

ལུང་རིགས་དོན་ལ་ཞིབ་མོའི་བློས་རྟོགས་ཅིང་།།

རང་ཤར་རང་གྲོལ་དགོངས་པའི་ཀློང་ནས་ནི།།

རིག་སྟོང་མ་བཅོས་དོན་གྱི་འཇམ་པའི་དབྱངས།།

དབྱེར་མེད་དྲིན་ཆེན་བླ་མ་གུས་ཕྱག་འཚལ།།

མདོ་སྔགས་ལམ་གྱི་རྫོང་གནད་དགོངས་པའི་འཐིལ།།

ལེགས་པར་བཤད་སྒྲུབ་འཛིན་པའི་གྲུབ་མཐའ་བརྒྱད།།

རང་སྣང་རིས་མེད་ཕན་ཚུན་གྲོགས་སུ་ཤར།།

འགལ་འདུ་མ་ཡིན་གཅིག་གྲོགས་གཅིག་བརྟེན་ནས།།

མི་འགལ་ལམ་གྱི་གལ་མདོ་གཅིག་ཏུ་བཟླུམས།།

ཆགས་སྡང་སྐྱེ་དབྲི་སྤྲོས་པ་རྒྱུན་བཅད་ནས།།

ས་རྙིང་བཀའ་དགེ་མི་འགལ་ལྟ་གྲུབ་གནང་།།

སྨྲ་བའི་ངག་གི་དབང་ཕྱུག་ལ་ཕྱག་འཚལ།།

འགའ་ཞིག་སྣང་སྲིད་བཅོས་བསྒྱུར་མ་ཞིག་པ།།

སེམས་ཉིད་སྤང་བྱར་རློམས་ཞིང་མཐའ་གཅིག་ཞེན།།

མདོ་ཡིས་ཁེངས་ནས་ཁ་བཤད་ཙམ་ལ་གོལ།།

ཁྱོད་ཀྱིས་མདོ་སྔགས་སེམས་ཉིད་གསལ་བ་དེ།།

བགྲོད་ཐབས་སྒོ་ཡངས་ཚེགས་ཆུང་དཀའ་བའི་གནད།།

མི་འགལ་གྲོགས་སུ་ཁྱེར་ཅིང་རྣམ་པར་གཟིགས།།

མདོ་སྔགས་མཐའ་དག་མི་འགལ་གཞིར་བཟུང་ནས།།

ཐེག་པའི་རྩེ་མོར་འགོད་མཛད་ལ་ཕྱག་འཚལ།།

མདོར་ན་མདོ་སྔགས་ལྟ་བའི་རྫོང་ཟིན་ཅིང་།།

སྤྱོད་པའི་འཕྲང་བཅོས་རིག་སྟོང་མི་ཤིགས་ལམ།།

སྲོག་གི་སྙིང་པོ་ཟབ་དོན་མྱོང་བས་ཤེས།།

དོན་འདི་ལྷག་པར་གསལ་བ་ཁྱོད་ལ་འདུད།།

ལ་ལ་ཞེན་སྐྲན་ཁོང་ནད་གཅོང་འབྱིན་ཅིང་།།

ལ་ལ་ཕྱོགས་ཞེན་དུག་གིས་རྣམ་པར་སྦགས།།

ལ་ལ་བཤད་སྒྲུབ་གཟུགས་བརྙན་ལྷག་པར་ཞེན།།

ཁྱོད་ཀྱིས་དེ་དག་རྣམ་པར་སྤངས་བའི་ཐབས།།

དག་སྣང་ཚིག་གིས་རིས་མེད་རྣམ་པར་གཞོལ།།

དོན་གྱི་ཤུགས་རྐྱེན་ཁོ་ནས་ཁོང་སྐྲན་དག།

མེད་པར་གསལ་བྱེད་སྨྲ་བའི་འཇམ་མགོན་མཆོག།

ཞབས་རྡུལ་པདྨོ་དྲི་མེད་གུས་ཕྱག་འཚལ།།

རྒྱུད་ལུང་མན་ངག་མཐའ་དག་གབ་སྦས་གཉིས།།

རྒྱུད་དོན་རིག་འཛིན་དགྱེས་པའི་ལམ་ལ་ཞུགས།།

བསྟན་པའི་སྙིང་པོ་གསལ་བྱེད་ཀུན་མཁྱེན་མཆོག།

སྔོན་མེད་ཞིང་དུ་ཕེབས་ལ་ཕྱག་འཚལ་ལོ།།

ཐུབ་བསྟན་མཐའ་དག་ཉིན་མོར་བྱེད་འདི་ཡང་།།

མུན་པའི་སྨག་རུམ་མཐའ་དག་མ་ལུས་བསལ།།

ཁ་བའི་ལྗོངས་སུ་རྒྱལ་བསྟན་ཆེས་ཆེར་གསལ།།

མཁས་མང་བསྔགས་པར་འོས་པ་ཁྱོད་ལ་འདུད།།

བདག་ནི་སྔ་འགྱུར་ཀུན་མཁྱེན་བླ་མའི་དྲུང་།།

རྗེས་སུ་འབྲང་ཕྱིར་དེ་ཡི་གཞུང་ལུགས་ལ།།

ཚུལ་བཞིན་ལོ་ཟླ་ཧྲིལ་བོར་བརྩོན་པ་ལས།།

འཇོག་ཚུལ་ཁྱད་ཆོས་རྨད་བྱུང་འདི་དག་མཐོང་།།

བདག་ཀྱང་ཀུན་མཁྱེན་རོང་ཀློང་མི་ཕམ་གསུམ།།

རྟག་ཏུ་གར་སྐྱེས་མཚན་ཐོས་གནས་སུ་སྐྱེ།།

ཚེ་རབས་སྐྱེ་བ་མ་ལུས་ཐམས་ཅད་དུ།།

བདག་ཉིད་ཁྱོད་བཞིན་རྒྱལ་བསྟན་སྲུང་བར་སྨོན།།

ཧ་ཅང་གཙོར་བྱས་མཆོག་འཛིན་མི་རློམས་པར།།

ཕྱོགས་ལྷུང་འཁྲུགས་ཡིད་རྣམ་པར་རིང་སྤངས་ནས།།

དག་སྣང་ཆོས་ཚུལ་འབྱོངས་བར་སྨོན་པ་དང་།།

བསྟན་འཛིན་ཐུགས་མཐུན་མཛད་འཕྲིན་རྒྱས་གྱུར་ཅིག།

     ཅེས་གངས་རིའི་ཁྲོད་འདིར་ཕྱིས་ཀྱི་བསྟན་འཛིན་ཆེན་པོ་འགྲན་ཟླ་དང་བྲལ། ཀུན་མཁྱེན་མི་ཕམ་འཇམ་དབྱངས་རྣམ་རྒྱལ་རྒྱ་མཚོ་དཔལ་གྱི་ངང་ཚུལ་མདོ་ཙམ་བརྗོད་ནས། བློ་དམན་གསར་བུ་བདག་གིས་ལོ་མི་ཉུང་བའི་ནང་། ཀུན་མཁྱེན་བླ་མའི་གཞུང་ལུགས་ཐོས་བསམ་ལས་རྙེད་པའི་གྲུབ་མཐའི་འཇོག་ཚུལ་ཁྱད་ཆོས་རྨད་དུ་བྱུང་བ་ཅན་འདི་དག་མཐོང་བ་དང་། དད་པའི་པད་མོ་རྒྱས་པར་བྱེད་པའི་བསྟོད་ཚིག་གི་ཉི་མ་ཞེས་བྱ་བ།  བྱང་ཕྱོགས་སོ་བདུན་གྱི་གྲངས་དང་མཐུན་པར་བྱེད་པ་པོ་ནི། ལྷ་གཉན་དཔལ་འཛོམས་རྡོ་རྗེ་དགྲ་འདུལ་གྱི་མདུན་རོལ། རྗེ་འབངས་ཉེར་ལྔ་ལས་རྨ་ཐོག་རིན་ཆེན་གྱི་སློབ་མ། ཀྱེ་རེ་མཆོག་སྐྱོང་དབང་པོའི་གདན་ས་ཁྱད་པར་ཅན་དེར། ཉ་སྐར་ས་གའི་ཚེས་༢༧-༢༨གཉིས་ལ་མདའ་མེ་ལྕེ་དེས་གྲུབ་པར་བགྱིས་པའོ།། དགེའོ།། དགེའོ།། སརྦ་མཾངྒ་ལཾ།། །།