༸ གྲུབ་དབང་བླ་མ་མཆོག་གི་ཆེ་བ་དྲན་པའི་གླུ་མ་བཅོས་དབྱངས་ཀྱི་འགྱུར་ཁུགས།

རྩོམ་པ་པོ། བླ་རུང་མཁན་མུ་ར་ཀུན་བཟང་།

ཡོང་ཁུངས། དགུ་ཚིགས་བོད་ཡིག་སྤྱི་སྟེགས།

མཁན་ཆེན་ཨ་ཁྱུག་རིན་པོ་ཆེ་གྲུབ་དབང་ལུང་རྟོགས་རྒྱལ་མཚན།

འཁོར་འདས་མཉམ་པར་བརྡལ་བ་སྟོང་ཆེན་གྱི་མཁའ་རུ།།

བདེ་སྟོང་གཡོ་བ་མེད་པ་ཏིང་འཛིན་གྱིས་སྨྱོས་ཏེ།།

ངེས་གསང་གདམས་པའི་དབྱངས་སྙན་འདོད་རྒུ་རུ་སྒྲོག་པའི།།

གྲུབ་རིག་བྱེ་བའི་གཙུག་རྒྱན་བླ་མ་དེ་མཁྱེན་ནོ།།

ལྟ་བ་གདེངས་སུ་གྱུར་པའི་དངོས་གྲུབ་ཅིག་སྩོལ་ཤོག།

མ་ངེས་ཀུན་རྟོག་དྲག་པོའི་རླབས་རྩེ་ན་བསྐྱོམས་ཤིང་།།

སྡུག་བསྔལ་ཆུ་བོ་བཞི་ཡི་རྦ་ཀློང་ལ་འཕྱན་པའི།།

ལས་ཉོན་དུཿཁས་མནར་བའི་སྲིད་གསུམ་གྱི་འགྲོ་ལ།།

ཐུགས་བརྩེའི་སྤྱན་རས་གཡོ་བའི་བླ་མ་དེ་མཁྱེན་ནོ།།

སྲིད་པའི་གདུང་བ་སེལ་བའི་དངོས་གྲུབ་ཅིག་སྩོལ་ཤོག།

འགྱུ་བ་རང་སར་གྲོལ་བའི་གདམས་པ་དེ་དྲན་ཡང་།།

འགྱུ་དྲན་དབྱིངས་སུ་བསྡུ་བའི་རྩལ་ཆེན་དེ་མ་རྫོགས།།

འདས་སོང་ལོ་ཟླའི་ཕྲེང་བ་ཡིད་ཡུལ་ལ་ཤར་ན།།

སྐྱོ་གདུང་སྨུག་སྤྲིན་སིལ་མའི་ཕྲེང་ཐག་དེ་ཆད་འགྲོ།།

སྐྱོ་གཞས་དབྱངས་སུ་གྱེར་བར་ཐུགས་ཁྲེལ་རང་མ་གནང་།།

མི་བརྟན་འདུ་འབྲལ་སྲིད་པའི་གར་སྟབས་ཀྱིས་གཙེས་པའི།།

ལས་ཉོན་སྒོང་རྒྱར་ཐིམ་པའི་ཉམ་ཆུང་གི་བུ་རུལ།།

སྐྱོ་སྣང་ན་བུན་སྟུག་པོར་དབང་མེད་དུ་འཕྱན་དུས།།

སྟོན་འཁོར་མཉམ་འཛོམས་སྐྱིད་པའི་རྨི་ལམ་དེ་དྲན་ནོ།།

མཚུངས་མེད་དཔལ་ལྡན་བླ་མའི་ཆེ་བ་དག་དྲན་ནོ།།

སྔར་ཞིག་ས་ལ་སྤྱོད་པ་འོག་མིན་གྱི་ཞིང་འདིར།།

སྟོན་འཁོར་ལྷན་དུ་འཛོམས་པའི་དགའ་སྐྱིད་ཀྱི་ཡོ་ལང་།།

རྔ་ཡབ་པདྨ་འོད་ཀྱི་གསང་གསུམ་གྱི་རོལ་བ།།

བསོད་ནམས་དཔྱིད་དུ་འཛུམ་པའི་སྤྲོ་དགའ་དེ་དྲན་ནོ།།

དགེ་ལེགས་འདབ་སྟོང་གྲོལ་བའི་ཆེ་བ་ཡང་དྲན་ནོ།།

ཐུགས་བསྐྱེད་སྐྱ་རེངས་གསར་བའི་ཤིང་རྟ་ལ་དྲངས་ཏེ།།

ལེགས་བྱས་མཁའ་རུ་བོས་པ་མཛད་བཟང་གི་ཉི་གཞོན།།

རྒྱལ་བསྟན་ཉིན་མོར་བྱེད་པའི་རྟེན་འབྱུང་དུ་འཛུམ་པ།།

ཧེ་རུ་ཀཿདཔལ་པདྨའི་ཞལ་སྐྱིན་དེ་དྲན་ནོ།།

འབྲེལ་ཚད་རྔ་ཡབ་འདྲེན་པའི་ཆེ་བ་ཡང་དྲན་ནོ།།

ངུར་སྨྲིག་ག་ཤལ་གཡོ་བའི་བླ་གོས་གྱིས་མཛེས་ཤིང་།།

བསླབ་གསུམ་རྒྱན་དུ་འཆང་བ་ཁྲིམས་ལྡན་གྱི་འཁོར་ཚོགས།།

ལི་ཁྲིའི་རླབས་ཕྲེང་གཡོ་བའི་གར་སྟབས་ལ་འགྲན་བཞིན།།

ཡངས་པའི་ས་ཆེན་ཁྱབ་པའི་ངོ་མཚར་དེ་དྲན་ནོ།།

བསྟན་སྲོག་རྨང་ནས་གསོས་པའི་ཆེ་བ་ཡང་དྲན་ནོ།།

གངས་ལྡན་རི་བོའི་ཁོར་ཡུག་འོད་དཀར་གྱིས་འཁྱུད་པའི།།

ཆོས་སྲིད་ཉི་ཟླའི་སྣང་བ་གླིང་བཞི་རུ་འཕྲོས་ཀྱང་།།

དུས་འགྱུར་མུན་པའི་སྨག་ཆེན་གློ་བུར་དུ་འཐིབ་དུས།།

ལུང་རྟོགས་ཉི་གཞོན་འདྲེན་པའི་ཐུགས་བསྐྱེད་དེ་དྲན་ནོ།།

བསྟན་པའི་རྒྱལ་མཚན་ཕྱར་བའི་ཆེ་བ་ཡང་དྲན་ནོ།།

རྩོལ་བཅས་ཐེག་པས་གདུལ་དཀའ་དུས་སྙིགས་ཀྱི་འགྲོ་ལ།།

རྩོལ་མེད་ཨ་ཏིའི་བསྟན་པ་ཉི་བཞིན་དུ་གསལ་ཏེ།།

དགག་སྒྲུབ་བློ་ལས་འདས་པའི་རང་བྱུང་གི་རིག་པ།།

མ་གསང་རྗེན་པར་བསྟན་པའི་བཀའ་དྲིན་དེ་དྲན་ནོ།།

ཡང་གསང་གདམས་པས་ཕྱུག་པའི་ཆེ་བ་ཡང་དྲན་ནོ།།

ཡོད་མེད་སྤྲོས་པའི་སྤྲིན་རིས་སྟོང་དབྱིངས་སུ་དག་ཀྱང་།།

སྟོང་གཟུགས་གར་གྱི་སྣང་བ་ཆུ་ཟླ་ལྟར་གཡོ་བའི།།

འཁྲུལ་སྣང་སྒྱུ་མའི་ཐང་གི་སྐལ་ལྡན་གྱི་སྐྱེ་བོར།།

ཀ་དག་ལྟ་བའི་རང་ཞལ་བསྟན་པ་དེ་དྲན་ནོ།།

གཟུང་འཛིན་དབྱིངས་སུ་བསྡུས་པའི་ཆེ་བ་ཡང་དྲན་ནོ།།

དབྱིངས་རིག་འདུ་འབྲལ་མེད་པ་ཏིང་འཛིན་གྱི་འཁྲུལ་འཁོར།།

རྒྱ་ཆད་ཕྱོགས་ལྷུང་བྲལ་བའི་མཁའ་མཐའ་རུ་བསྐོར་ཏེ།།

ལྷུན་འགྲུབ་སྣང་བཞིའི་རྩལ་ཆེན་སྐད་ཅིག་ལ་རྫོགས་པའི།།

སྔ་འགྱུར་རིག་འཛིན་བརྒྱུད་པའི་གདུང་འཚོབ་དེ་དྲན་ནོ།།

སྣང་སྲིད་དག་མཉམ་ལྟ་བའི་ཆེ་བ་ཡང་དྲན་ནོ།།

འཁྲུལ་རྟོག་ཨ་འཐས་དམ་པོས་དབང་མེད་དུ་བཅིང་བའི།།

ལས་ཉོན་དུཿཁས་མནར་བའི་ཉམ་ཐག་གི་འགྲོ་ལ།།

འཁྲུལ་སྣང་རང་སར་གྲོལ་བའི་གདམས་པ་དེ་བསྟན་ནས།།

སྲིད་རྒྱུན་དུམ་བུར་བཅད་པའི་ངོ་མཚར་དེ་དྲན་ནོ།།

སྙན་རྒྱུད་ཕ་ཆོས་གཙང་མའི་ཆེ་བ་ཡང་དྲན་ནོ།།

བརྒྱུད་གསུམ་རིག་འཛིན་བླ་མའི་དགོངས་ཀློང་ནས་བབས་ཏེ།།

ཐུགས་ཀྱི་བཅུད་དུ་འཁྱིལ་བ་གདམས་ཟབ་ཀྱི་བདུད་རྩི།།

རིས་མེད་སྐལ་བཟང་སྐྱེ་བོའི་བགོ་སྐལ་དུ་བསྩལ་ཏེ།།

དུག་ལྔའི་ཚ་གདུང་རྨང་ནས་བཅོམ་པ་དེ་དྲན་ནོ།།

འགྲོ་འདུལ་རིག་འཛིན་བརྒྱུད་པའི་ཆེ་བ་ཡང་དྲན་ནོ།།

ཆོས་བརྒྱད་སྤྲིན་སྣ་སྟུག་པོའི་འདུ་འགོད་དང་འགྲོགས་པའི།།

འདོད་ཡོན་བདུད་ཀྱི་གཡབ་མོས་མི་སེམས་དེ་སྒུལ་དུས།།

ཡིད་འོང་དབེན་པའི་རི་སིལ་ཉམས་དགའ་རུ་བཞུགས་ཤིང་།།

བསྒྲུབ་པའི་རྒྱལ་མཚན་མཐོན་པོར་བསྒྲེངས་བ་དེ་དྲན་ནོ།།

ཉམས་རྟོགས་རྩལ་ཆེན་རྫོགས་པའི་ཆེ་བ་ཡང་དྲན་ནོ།།

གཞི་འབྲས་དབྱེར་མེད་ལྟ་བའི་ཉམས་བརྒྱ་དང་འགྲོགས་པའི།།

རིམ་གཉིས་ཟབ་མོའི་གཤོག་ཡངས་མཁའ་མཐའ་རུ་བརྐྱངས་ཏེ།།

སྐུ་བཞིའི་ལྷ་ལམ་ཡངས་པོར་ཁྱུང་ལྡིང་བཞིན་སྐྱོད་མཁས།།

ཕ་ཅིག་དགའ་རབ་དཔའ་བོའི་ཐུགས་སྲས་དེ་དྲན་ནོ།།

ཕ་རྗེས་བུ་ཡིས་བསྙེགས་པའི་ཆེ་བ་ཡང་དྲན་ནོ།།

འདྲེན་མཆོག་དཔལ་ལྡན་བླ་མའི་གདམས་ཟབ་ཀྱི་བདུད་རྩི།།

དད་དམ་གཡོ་བ་མེད་པའི་བུམ་བཟང་དུ་བསྐྱིལ་ཞིང་།།

ལས་ཉོན་སྲིད་པའི་ཚ་གདུང་རྨི་ལམ་བཞིན་ཡལ་ཏེ།།

དངོས་གྲུབ་རྣམ་གཉིས་ཆར་དུ་བསྙིལ་བ་དེ་དྲན་ནོ།།

དག་སྣང་ཉམས་བརྒྱ་འབར་བའི་ཆེ་བ་ཡང་དྲན་ནོ།།

ལས་བཞི་ལྷུན་གྱིས་གྲུབ་པའི་རྩེད་འཇོ་ཡི་གར་སྟབས།།

སྣང་སེམས་དབང་དུ་སྡུད་པའི་ཐབས་མཁས་ལ་བརྟེན་ཏེ།།

འཛིན་མེད་སྟོང་གསལ་དབྱིངས་ཀྱི་བྲོ་ར་རུ་སྒྱུར་བའི།།

ངེས་དོན་རིག་འཛིན་དཔའ་བོའི་རྣམ་ཐར་དེ་དྲན་ནོ།།

ལྟ་བ་ཀློང་དུ་གྱུར་པའི་ཆེ་བ་ཡང་དྲན་ནོ།།

དེ་ལྟར་འགྱུ་དྲན་དྭངས་མའི་མེ་ལོང་གི་ངོས་སུ།།

འདྲེན་མཆོག་དཔལ་ལྡན་བླ་མའི་མཛད་བཟང་གི་གཟིགས་མོ།།

དད་གསུམ་སྒོ་བརྒྱ་འབྱེད་པའི་རྟེན་འབྱུང་དུ་ཤར་ཚེ།།

མ་བཅོས་དབྱངས་ཀྱི་མཆོད་པས་ཐུགས་རྒྱུད་དེ་བསྐུལ་ན།།

གཟུང་འཛིན་དབྱིངས་སུ་ཡལ་བའི་དངོས་གྲུབ་ཅིག་སྩོལ་ཤོག།

བདག་སོགས་འདི་ནས་སྲིད་པ་མ་སྟོང་གི་བར་དུ།།

ཡང་ཟབ་ཐེག་རྩེའི་སྙིང་པོའི་གསང་མཛོད་ལ་དབང་ཞིང་།།

འགྲོ་འདུལ་སྤྲུལ་བའི་རོལ་གར་ཆུ་ཟླ་བཞིན་བསྒྱུར་ཏེ།།

དཔག་ཡས་འགྲོ་བ་ཕན་བདེའི་ལམ་བཟང་ལ་འགོད་མཁས།།

ཕ་གཅིག་བླ་མའི་རྣམ་ཐར་སྐྱོང་བ་ལ་སྨོན་ནོ།།

ཞེས་པ་འདི་ནི། ངེས་དོན་རྫོགས་པ་ཆེན་པོའི་རྣལ་འབྱོར་པ་༸གྲུབ་དབང་བླ་མ་ལུང་རྟོགས་རྒྱལ་མཚན་དཔལ་བཟང་པོ་མཆོག དགོངས་པ་ཆོས་དབྱིངས་སུ་བསྡུས་པའི་ཚུལ་བསྟན་ཏེ། ལོ་འཁོར་ལྔ་ལོན་པའི་རྗེས་དྲན་གྱི་ཉིན་མོ་སྟེ། བོད་རབ་རྒྱན་ཤིང་སྤྲེལ་ལོའི་ཟླ་ ༠༥ ཚེས་ ༡༧ ཉིན། གང་གི་སློབ་འབངས་སུ་གཏོགས་པ་མུ་ར་ཀུན་བཟང་གིས། གསེར་ལྗོངས་བླ་མ་རུང་ནས་བྲིས།