ཆེད་བཀོད་བཤེས་བསྟོད་ཚན་པ་གཉིས།

མོས་པའི་བསྟོད་པ།

བསོད་ནམས་འོད་ཟེར། (སྔ་འགྱུར་མཐོ་སློབ་ཆེན་མོ།)

ངེས་འབྱུང་ཚུལ་ཁྲིམས་གཙང་མའི་ས་གཞི་ལ།།

ཐོས་བསམ་སྒོམ་པའི་ས་བོན་ལེགས་བཏབ་སྟེ།།

གཞན་ཕན་བྱང་སེམས་སྙིང་པོའི་ཉམས་ལེན་གྱིས།།

སྒོམ་རྟགས་ཉོན་མོངས་ཆུང་བ་ཁྱེད་མིན་སུ།།

ཡིད་འཕྲོག་ཤེལ་གྱི་གཞལ་ཡས་ཁང་བཟང་ནས།།

རྫོགས་ཆེན་ལྟ་བའི་ཆོས་ཀྱི་སྦྲང་ཆར་གྱིས།།

སྐལ་ལྡན་བུང་བའི་ཞིང་ས་གཤིན་པོ་ལ།།

སྐུ་གསུམ་ལྗོན་པའི་ས་བོན་བརླན་པར་བྱས།།

དེང་གི་འདུ་འཛི་ཆེན་པོའི་གཡུལ་ས་ནས།།

ཞི་གནས་གོ་ཆ་བརྟན་པོའི་བསམ་གཏན་གྱིས།

རྒྱལ་བསྟན་སྤྱི་དང་ཁྱད་པར་སྔ་འགྱུར་བའི།།

འོད་གསལ་རྡོ་རྗེ་ཐེག་པའི་བསྟན་པ་སྐྱོང་།།

ཡོན་ཏན་ནོར་གྱིས་ལྕི་བའི་བླ་མ་ལ།།

རྡོ་རྗེ་མཆེད་གྲོགས་ཡོངས་ཀྱིས་མགྲིན་གཅིག་ཏུ།།

བསྟོད་དབྱངས་ལྷ་མོའི་གླིང་བུ་འབུད་པ་འདི།།

གང་གི་བཀའ་དྲིན་མཚོན་པའི་ཆེད་དུ་ཕུལ།།

ཁྱེད་ཀྱི་གནའ་དེང་ཡོན་ཏན་ལྷ་ལམ་ནི།།

བློ་དམན་བདག་འདྲས་གཞལ་བའི་ཡུལ་མིན་ཡང་།།

དད་མོས་མིག་ལ་གང་ཤར་ཅུང་ཟད་ཙམ།།

སྨྲས་པ་འདི་ཉིད་བསོད་ནམས་རྒྱུ་རུ་བསྔོ།།

རོང་ཟོམ་པཎྜི་ཏ་ཆོས་ཀྱི་བཟང་པོས་མཛད་པའི་ཐེག་ཆེན་ཚུལ་འཇུག་དང་། ཀུན་མཁྱེན་ཀློང་ཆེན་པས་མཛད་པའི་སེམས་ཉིད་ངལ་གསོ་དང་། ཀུན་མཁྱེན་འཇིག་མེད་གླིང་པས་མཛད་པའི་བསྐྱེད་རིམ་ལྷ་ཁྲིད་དང་། དཔལ་སྤྲུལ་སེམས་དཔའ་ཆེན་པོས་མཛད་པའི་སྲོག་སྡོམ་གཟེར་བཞི་བཅས། འདི་དག་བཀའ་དྲིན་བླ་ལྷག་ཏུ་ཆེ་བའི་བདག་གི་དགེ་བའི་བཤེས་གཉེན་ཆེན་མོ། མཁན་པོ་གར་དབང་མཆོག་གི་མདུན་ནས་ཞུ་རྒྱུའི་སྐལ་བཟང་ཐོབ་སྟེ། དཔེ་ཁྲིད་མཐའ་ལེགས་པར་གྲུབ་སོང་བས། བསྟོད་རྩོམ་ཐུང་ངུ་འདི་ཉིད་མེ་ཏོག་ཆུང་ཡང་མཆོད་པའི་རྫས་གསུངས་པ་ལྟར། མཆོད་པའི་ཚུལ་དུ་བླ་མར་ཕུལ་ལོ།།🙏

བཤེས་གཉེན་བསྟོད་པ་ཉི་གཞོན་འཆར་ཀ་མ།

བསྟན་འཛིན་ལེགས་གྲུབ། (སྔ་འགྱུར་མཐོ་སློབ་ཆེན་མོ།)

ལུས་ལ་གོས་ཆེན་གསེར་གྱི་ལྭ་བ་མེད།།

ངག་ལ་གཏམ་ཆེན་ཚིག་བཀྲའི་ལྦུ་བ་དབེན།།

ཡིད་ལ་གྲགས་ཆེན་རེ་བ་རིང་ནས་དོར།།

ཆེན་པོ་གསུམ་གྱིས་ཕོངས་པ་ཁྱེད་ལ་འདུད།།

རང་མཁས་རང་མཐོ་སྙམ་པའི་སྤོབས་པ་མེད།།

རྙེད་བཀུར་ལམ་ཆེན་སྒྲུབ་པའི་རིགས་ནུས་མེད།།

ཉེ་རིང་ཡ་བཟུང་སྐྱོང་བའི་སྙིང་སྟོབས་མེད།།

མེད་པ་གསུམ་ལྡན་ཁྱེད་ལ་ཡིད་སྨོན་ཤོར།།

འདུ་འཛིའི་གྲོང་ཁྱེར་བསྒོམས་པ་ཡུན་རིང་ཡང་།།

ལྷ་མཐོང་འདྲེ་མཐོང་མངོན་ཤེས་ཁྱེད་མ་ཐོབ།།

བསླབ་པ་ནོར་འཚོང་ཙམ་ཡང་ཁྱེད་མི་ཐུབ།།

ཁྱེད་ཀྱི་གྲུབ་རྟགས་འདི་ལ་སུ་མི་མཚར།།

གཞུང་དོན་འགྲེལ་ཚེ་ཚིག་གི་ལོ་མ་མེད།།

གཞུང་གནད་སྡོམ་ཚེ་ཟིང་པའི་སྐྲ་ལོ་མེད།།

གཞུང་བསྒྲིགས་བྱེད་ཚེ་ལག་རྗེས་རྐང་བསུབ་མེད།།

མེད་ལམ་གསུམ་ནས་གོ་བ་སྤྲོད་སྟངས་འཕགས།།

མདོར་ན་ཕྱི་ཚུལ་མཁན་ཆེན་ཞི་བ་འཚོ།།

ནང་གི་རྣལ་འབྱོར་སློབ་དཔོན་པདྨ་འབྱུང་།།

གསང་བའི་མཛད་པ་སྲོང་བཙན་སྒམ་པོ་སྟེ།།

མེས་དབོན་རྣམ་གསུམ་ཁྱེད་ཉིད་ཁྱེད་ལ་བསྟོད།།

ཁྱེད་ཀྱི་མཁྱེན་པ་རབ་ཡངས་ཕ་མཐའ་ལ།།

འགྲན་འདོད་ནམ་མཁའ་འདྲ་བའི་སེམས་མེད་ཀྱང་།།

འོན་ཏེ་གང་གི་ཐུགས་རྗེའི་ལྕགས་ཀྱུ་འོག།

རྨོངས་རྒན་བདག་ཀྱང་རྗེས་སུ་ཟིན་པར་སྨོན།།

ཞེས་པ་འདི། སྤྱི་ལོ་ ༢༠༢༤ ཟླ་བ་ ༡༡ ཚེས་པ་ ༡༥ ཉིན། མཁན་པོ་གང་གི་སྐུ་མདུན་ནས་ལོ་རིམ་དགུ་པའི་དཔེ་ཁྲིད་ཡོངས་རྫོགས་ལེགས་པར་མཐའ་གྲུབ་པའི་བརྗེད་བྱང་ངམ་ཉིན་ཐོའི་ཚུལ་དུ། སྣང་བ་གང་དྲན་ཡི་གེར་བཀོད་པ་པོ་བསྟན་འཛིན་ལེགས་གྲུབ་ནས།

དཔེ་ཁྲིད་མཐའ་གྲུབ་པའི་ཉིན་དགེ་སློབ་ལྷན་འཛོམས་འདྲ་བརྙན།