མཛད་པ་པོ། ༸རྒྱལ་དབང་ཀརྨ་པ་ཨོ་རྒྱན་ཕྲིན་ལས་རྡོ་རྗེ།
ཡོང་ཁུངས། ༸རྒྱལ་དབང་མཆོག་གི་ངོ་དེབ་ངོ་ཤོག
མ་ལུས་ཞིང་གི་རྒྱལ་དང་རྒྱལ་སྲས་སློབ་མར་བཅས་པའི་
ཚོགས་ཐམས་ཅད། །
གཅིག་ཏུ་བསྡུས་ཀྱང་གང་གི་མཛད་པའི་ཆ་ཤས་ཙམ་ཡང་
མི་བསྒྲུན་པ། །
སྲིད་ཞིའི་འདྲེན་མཆོག་ལྷ་མིའི་རྣམ་འདྲེན་བསྟན་འཛིན་རྒྱ་མཚོར་
ཆེར་གྲགས་པའི། །
མགོན་པོ་ཁྱོད་ཀྱིས་དགེ་ལེགས་བྱེ་བས་འགྲོ་འདི་བྱང་ཆུབ་
སྲིད་པའི་གངས་ལ་མཐའ་དམག་གདུག་པས་ཁྲག་གི་སྨུག་རྩི་
བསྐུས་པའི་དུས། །
སྐོར་གསུམ་སྒང་དྲུག་རུ་བཞིའི་སྐྱེ་བོ་གཞིས་བྱེས་གཉིས་སུ་
གཏོར་བའི་ཚེ། །
ཨ་སྔོན་གནམ་ལས་འབོད་ས་མེད་པའི་ས་ཡ་དྲུག་གི་
བོད་འབངས་ལ། །
མེས་དབོན་དམ་པའི་ཕོ་ཉ་ཁྱོད་ནི་དུས་ཐོག་ཆར་པ་
བཞིན་དུ་ཕེབས། །
སྟོང་ཉིད་སྙིང་རྗེ་ཟུང་དུ་འཇུག་པའི་བདེ་གཤེགས་བསྟན་པའི་
རིང་ལུགས་ཆེ། །
ཧི་མ་ལ་ཡའི་རི་བོ་བརྒལ་ཏེ་རྒྱ་མཚོའི་ཕ་མཐར་
སྤེལ་བ་ཡིས། །
རྒྱལ་བསྟན་མི་ནུབ་སྲོག་གི་ཀ་ཆེན་གནམ་སའི་བར་དུ་
ལེགས་བཙུགས་ཏེ། །
རྒྱལ་བ་གཉིས་པའི་མཚན་གྱི་ཅོད་པན་ཁྱོད་ཉིད་ཁོ་ནས་
བདག་གིར་བཞེས། །
རྣལ་འབྱོར་པ་ལ་མངོན་སུམ་གྱུར་པའི་ལྟ་སྒོམ་སྤྱོད་པའི་
རྣམ་བཞག་དང་། །
ཚན་རིག་མཁས་པས་འཕྲུལ་གྱིས་རྙེད་པའི་དངོས་ཁམས་རིག་པའི་
ལྟ་གྲུབ་སོགས། །
གནའ་དེང་རིག་པ་ཟུང་དུ་སྦྲེལ་བའི་རྣམ་དཔྱོད་གསེར་གྱི་
ལྡེ་མིག་གིས། །
ལུས་སེམས་གཉིས་ལ་ཕན་བདེ་སྦྱིན་པའི་སྔོན་མེད་སྒོ་འཕར་
གསར་དུ་ཕྱེས། །
བོན་དང་བནྡེས་རིས་སུ་མ་བཅད་བོད་འབངས་ཡོངས་ཀྱི་
མགོན་དང་སྐྱབས། །
ཤར་དང་ནུབ་ཀྱི་ཕྱོགས་སུ་མ་ལྷུང་འཛམ་གླིང་ཞི་བདེའི་
དེད་དཔོན་ཆེ། །
ཕྱི་དང་ནང་གི་དབྱེ་བས་མི་ཕྱེད་དུས་རབས་འདི་ཡི་
སྟོན་པ་སྟེ། །
མ་འདྲིས་ཡོངས་ཀྱི་མཛའ་བཤེས་ཞེས་པ་དོན་དང་མཐུན་པ་
ཁྱོད་ཉིད་ཙམ། །
འཛམ་བུའི་གླིང་དུ་སྙན་པས་ཁྱབ་ཀྱང་ཆོས་བརྒྱད་བདུད་ཀྱིས་
བསླུ་མ་མྱོང་། །
ཉིན་མཚན་ཀུན་ཏུ་མཛད་པས་བྲེལ་ཡང་ཐོས་བསམ་སྒོམ་གསུམ་
ཆད་མ་མྱོང་། །
སྐུ་སྲོག་ཚུན་ལ་རྒོལ་བ་མང་ཡང་གཞན་ཕན་སེམས་མཆོག་
ཉམས་མ་མྱོང་། །
བགྲང་བྱ་དགུ་བཅུའི་ཁུར་གྱིས་ནོན་ཀྱང་སྙིང་སྟོབས་ཞུམ་པ་
ཡོད་མ་མྱོང་། །
མཆོག་དམན་ཀུན་ལ་གཅིག་ཏུ་མཛའ་བས་ངོ་ལྐོག་མེད་པའི་
ཐུགས་གཤིས་དང་། །
ཉེ་རིང་མེད་པ་འཛུམ་གྱིས་བསུ་བས་ཕ་ཁུ་ལྟ་བུའི་
བྱམས་བརྩེ་དང་། །
ཆགས་ཐོགས་མེད་པར་ལུགས་གཉིས་གཟིགས་པས་ཉི་ཟླ་ལྟ་བུའི་
མཁྱེན་རྒྱ་སོགས། །
ཁྱོད་ཀྱི་ཡོན་ཏན་ཇི་ཙམ་བསམས་ཀྱང་དེ་ཙམ་ཁྱོད་ཉིད་
ཁོ་ནར་དད། །
སྡང་བའི་སེམས་དང་འདོད་པའི་ཆང་གིས་རབ་ཏུ་མྱོས་པའི་
བརླང་སྤྱོད་ཀྱིས། །
ས་ཆེན་འདི་ཡང་བརླག་པར་བྱེད་པའི་མཚོན་གྱི་བསྐལ་པ་
དར་བའི་ཚེ། །
ཞི་དུལ་སྤྱོད་པས་ཐལ་མོ་སྦྱར་ནས་གོ་ལ་ཟླུམ་པོ་
སྐོར་བཞིན་དུ། །
མཁའ་ཁྱབ་འགྲོ་ལ་སེམས་ཁུར་སྦྱིན་པའི་སྐྱབས་གནས་ཁྱོད་ལས་
གཞན་མ་མཆིས། །
ཞབས་ཀྱི་ཆུ་སྐྱེས་བརྟན་པ་ཙམ་གྱིས་འགྲོ་བའི་ཡིད་ལ་
དགའ་བདེ་སྦྱིན། །
མཚན་ཙམ་གྱིས་ཀྱང་བོད་འབངས་ཉམ་ཆུང་མགོ་བོ་གྱེན་དུ་
འདེགས་པར་བྱེད། །
ཇི་ལྟར་བསམས་ཀྱང་ཁྱོད་ལས་གཅེས་པ་འཇིག་རྟེན་འདི་ན་
མ་མཆིས་པས། །
ས་ཆེན་ལྷུན་པོ་གནས་ཀྱི་བར་དུ་གཡོ་མེད་བརྟན་པར་
བཞུགས་སུ་གསོལ། །
ཨ་རིའི་རྒྱལ་ས་ཝ་ཤིན་ཊོན་དུ་༸གོང་ས་མཆོག་དགུང་གྲངས་དགུ་བཅུར་ཕེབས་པའི་གོ་སྟོན་གྱི་མཛད་སྒོ་གནང་བའི་སྐབས། བསྟོད་ཚིག་ཅིག་འབྲི་དགོས་ཞེས་བསྐུལ་མ་བྱུང་དོན་ལྟར། སློབ་འབངས་སུ་གཏོགས་པ་ཀརྨ་པ་ཨོ་རྒྱན་ཕྲིན་ལས་རྡོ་རྗེས། སྤྱི་ལོ་ ༢༠༢༥ ཟླ་ ༥ ཚེས་ ༣༡ ཉིན་བྲིས་ནས་ཕུལ་བ་དགེའོ།།
གང་ཉིད་ཀྱིས་མཛད་པའི་བསྟོད་རྩོམ་སྙན་སྒྲོན་གནང་བའི་བརྙན་ཟིན།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།