ཕ་རྒོད་ཆེད། །མ་མཆོག་སྐུལ། །

དགེ་བཤེས་ཆོས་འཁོར་ཚང་ཉི་མ་འོད་ཟེར།

ཀ་བསྟོད་ཀྱི། །ཁ་འདོན་ཞིག །

ག་ཤལ་ལྟར། །ང་ཡིས་བསྒྲིགས། །

སྒྲོན་མེ་སེར་པོ་ཁྱེད་ལ་སྒུག

ནུབ་རི་བ་པདྨ་མཚོ་མོ། ཤུག་གསེབ་དགོན།

བདག་སེམས་ཀྱི་སྒྲོན་མེ་སེར་པོ།

ཁྱེད་ནམ་ཞིག་ངེད་ཀྱི་འཇིག་རྟེན་ན་འོད་སྣང་སྦྱིན་ནམ།

ངས་ཁྱེད་ཉིད་དྲན་གྱིས།

ཁྱེད་མེད་པས། ངའི་མི་ཚེར་བྱམས་བརྩེ་ཡི་དྲོད་འཁོལ་མེད་ལ།

ཁྱེད་མེད་པས། ངའི་ཡོད་ཚད་ནས་ཡོད་ཚད་མུན་ནག་ཞིག་ལས།

མཛེས་སྡུག་གི་འོད་སྣང་ག་ལ་ཡོད།

ངེས་དོན་གྱི་རྒྱལ་སྲས་ཆེན་པོ།

སྡེ་དགེ་སྐལ་བཟང་། 

རིགས་གསུམ་སྒྱུ་འཕྲུལ་གར་གྱིས་བསླུ་མཛད་པ།།

ངེས་དོན་བསྟན་པའི་གཙུག་གི་མེས་དབོན་ཁྱེད།།

སྐབས་བབས་ས་གསུམ་གཡོ་བའི་བ་དན་གྱི།།

སྐུ་གསུམ་ལྷུན་གྱིས་བལྟམས་པའི་འཁྲུངས་སྐར་བསུ།།

འཛམ་གླིང་སྤྱི་བསང་།

སྤྲུལ་སྐུ་པདྨ་ཚེ་མཆོག་རྡོ་རྗེ། སྔ་འགྱུར་མཐོ་སློབ་ཆེན་མོ།

སྐྱབས་འགྲོའི་ཤིང་སྣ་སྨན་སྣ་རི་ལྟར་སྤུངས།།

བྱང་ཆུབ་སེམས་ཀྱི་ཕུད་སྐྱེམས་མཚོ་ལྟར་བཤམ།།

ཡང་དག་ལྟ་བའི་མེ་ལྕེ་ཆེར་འབར་ནས།།

འགྲོ་ཀུན་རྒྱུད་ཀྱི་མི་གཙང་དག་གྱུར་ཅིག།

དྲན་པ་ལྟེབ་རྩེག་མ།

དགའ་དགའ། ཐཱའི་ཝན།

                 

བདག་པོ་བོར་བའི་བདག་མེད་འཁྱམ་པོ་ཞིག །

སྙིང་ལ་ལྡེབ་ཚེ་གཡར་པོའི་བུ་ལོན་འདྲ།།

དུང་སེམས་མེ་ལྕེ་དྲོན་མོའི་བར་གསེང་ནས།།

བརྩེ་བའི་གཏམ་རྒྱུད་རིང་པོ་སུས་ཤེས་སོ།།

གསང་གསུམ་རྗེས་དྲན་དད་རླབས་བཞུར་རྒྱུན་མ། [སྨད་ཆ།]

༈ དཔལ་སྔ་འགྱུར་བའི་གདན་ས་ཆེན་མོ་ཐེག་མཆོག་རྣམ་གྲོལ་གླིང་གི་ཡན་ལག སྔ་འགྱུར་མཐོ་སློབ་ཆེན་མོའི་མཁན་ཐོག་དང་པོའི་གྲས་མཁན་རིན་པོ་ཆེ་བཀྲ་ཤིས་ཚེ་རིང་མཆོག་ དགོངས་པ་ཆོས་ཀྱི་དབྱིངས་སུ་གཟིམས་པར་ཚུལ་བསྟན་པའི་དགོངས་རྫོགས་མཆོད་སྤྲིན་དུ་དམིགས་ཏེ། མགོན་པོ་གང་གི་རྗེས་དྲན་དུ་ཕུལ་བའི་སྙན་ངག་འགའ་ཆེད་སྒྲིགས་ཞུས་པ་གསང་གསུམ་རྗེས་དྲན་དད་རླབས་བཞུར་རྒྱུན་མ།

༡. བཟོད་མེད་སྐྱོ་བའི་མིག་ཆུ།

མི་ཕམ་རྣམ་རྒྱལ། སྔ་འགྱུར་མཐོ་སློབ་ཆེན་མོ།

མཁན་རིན་པོ་ཆེ་ལགས། དགོངས་དག 

ང་ཚོ་བསོད་ནམས་ཀྱི་ལས་སྐལ་རྫོགས་པས། 
ཁྱེད་ཕེབས་པ་སྔ་སོང་།

བདག་གིས་དངོས་སུ་མཇལ་བའི་རྗེ་བཙུན་ཆེན་པོ།

སློབ་དཔོན་ཀརྨ་དབང་རྒྱལ། ཧྥ་རན་སི།

࿑ ན་མོ་གུ་རུ་བཛྲ་ས་ཏྭ་ཡེ།

མ་བཅོས་རིག་པ་ཆོས་སྐུའི་མཁའ་དབྱིངས་སུ།།

ཚད་མེད་སྙིང་རྗེའི་ཆུ་འཛིན་རབ་ཏུ་འཁྲིགས།།

གང་འདུལ་སྦྲང་ཆར་སིལ་མ་ཕྱོགས་ཀུན་འབབ།།

ངེས་དོན་དགེ་སློང་རྡོ་རྗེ་འཛིན་པ་ཁྱེད།།