རྩོམ་པ་པོ། སློབ་དཔོན་ཚུལ་ཁྲིམས་ཟླ་བ། རྣམ་གྲོལ་གླིང་།
ལོ་བརྒྱད་ཅུ་ཡི་སྔ་རོལ་སྔ་རོལ།།
གྲོང་ལྷིང་འཇགས་ཀྱི་ཁང་ཁུག་ཅིག་ན།།
ཁྱིམ་འཁོས་ཆུང་གི་ཆུང་མའི་པང་ནས།།
གསང་མཐོན་པོ་ཡི་ངུ་སྐད་གྲགས་སོང་།།
ནུབ་འོད་གསལ་གྱི་རྨི་ལམ་བརྟག་ས།།
མཚོ་མེ་ལོང་ལས་གཟུགས་བརྙན་བསྟན་ས།།
གསེར་བུམ་པ་ནས་མཛུབ་སྟོན་བྱེད་ས།།
བུ་རིགས་ཅན་ཁྱེད་ལྷ་མོ་དོན་གྲུབ།།
ངོ་ལྡིར་ལྡིར་དེ་འཛུམ་ཤ་དོད་པོ།།
ཞྭ་དམར་ཆུང་དེ་དབུ་ལ་ལན་པོ།།
བོད་གངས་ཅན་པའི་སྙིང་གི་ནོར་བུ།།
ལྷ་དཀོན་མཆོག་གི་དངོས་གྲུབ་ཡིན་ནོ།།
མཁར་པོ་ཏ་ལའི་ཚོམས་ཆེན་སྟོད་ན།།
དཔོན་མི་ཆེན་ཚོའི་གཟི་ཉམས་ཆེ་ཡང་།།
གསེར་སེར་པོ་ཡི་བཞུགས་ཁྲི་སྟེང་ནས།།
སྐུ་ཆུང་ཆུང་དེས་ཟིལ་གྱིས་མནན་སོང་།།
དུས་ཐུང་ཐུང་ལ་བློ་རྩེ་རྣོན་པོས།།
ནང་རིག་པ་ཡི་གདེང་ཆེན་རྙེད་དེ།།
སེམས་གཙོ་བྱས་ཀྱི་གྲུབ་མཐའ་བརྒལ་ནས།།
མི་མཁས་དགུ་ཡི་ཁེངས་པ་བསྙིལ་སོང་།།
གཟུགས་ལང་ཚོ་ཡི་གཞོན་ཤ་ཆེ་དུས།།
འོག་འབངས་མི་ཚོའི་འཚོ་བ་སྐྱོམ་ནས།།
ཆུང་བྱིས་པ་ཡི་རྩེད་མོ་བོར་ཏེ།།
ལུགས་ཐམ་ག་ཡི་ཡུ་བར་བཟུང་སོང་།།
རྡོ་མཁྲེགས་པོ་ལ་རྐང་པ་ཐོགས་ཀྱང་།།
ལུས་རོ་སྟོད་ནས་ཚོར་ཤེས་དབེན་དུས།།
ཁོག་ཟུག་གཟེར་དག་འཛུམ་གྱིས་སྦས་ནས།།
དགྲ་ཨ་ཞང་དང་གདོང་ཐུག་གནང་སོང་།།
མཁར་སྨུག་པོ་ལ་སྒྱོགས་ཁ་གཏད་ནས།།
འོག་སྤུན་ཟླ་རྣམས་ཁྲིམས་ལ་སྦྱར་དུས།།
ཕུག་ཞི་བདེ་ཞིག་ཐུགས་ལ་བཅངས་ནས།།
རི་གངས་རྒན་གྱི་རྒྱབ་ལ་ཆས་སོ།།
ཕྱི་སྤོང་བདུན་གྱི་གཡའ་ཡིས་མ་གོས།།
ནང་དམ་ཚིག་གི་སོ་ཁ་མ་རལ།།
མགོན་ཐུབ་པ་དེའི་རྗེས་འཇུག་རྣལ་མ།།
སྡུག་མུན་སེལ་གྱི་སྒྲོན་མེ་ཁྱེད་ཡིན།།
རྫས་བཟོ་རྩལ་གྱི་འགྲན་རྩོད་ཆེ་དུས།།
གླིང་རྡོག་རྡོག་འདི་འཕུང་ལ་ཉེ་སྐབས།།
ཕྱག་ཐལ་སྦྱར་གྱིས་ཞི་བདེར་བོས་པས།།
ས་ཆེན་པོ་འདི་འོད་ཀྱིས་བཀང་སོང་།།
མ་འགྲོ་དྲུག་ལ་བྱམས་པས་གཉོར་སྟངས།།
ཆོས་གྲུབ་མཐའ་དག་མཐུན་སྡེབ་བྱེད་སྟངས།།
སྙིང་རུས་སྟེང་ནས་ཉམས་སུ་བླངས་པས།།
འདྲིས་མ་དགོས་པའི་མཛའ་བཤེས་ཁྱེད་ཡིན།།
སྐུ་ཤམ་ལྭ་ཡི་འོད་མདངས་ཤིགས་སེ།།
ཐུགས་བྱམས་བརྩེ་ཡི་འཛུམ་མདངས་ཁྱུགས་སེ།།
གསུང་འགག་མེད་ཀྱི་ཆོས་སྒྲ་ལྷངས་སེ།།
ཁྱེད་ཡལ་མེད་ངང་ཡུན་དུ་གནས་ཤོག།
༢༠༡༥།༠༦།༠༡།
ཡོང་ཁུངས། རྩོམ་པ་པོ་ཉིད་ཀྱི་ངོ་དེབ་དྲྭ་བའི་མདུན་ངོས་ལས་བཤུས།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།